Ҳукумати Ҷумҳурии Тоҷикистон

ҚАРОР

Дар бораи ворид намудани тағйирот ба қарори Ҳукумати Ҷумҳурии Тоҷикистон аз 20 феврали соли 2009, № 106

Мутобиқи моддаи 42 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1. Дар ном ва бандҳои 1,2,3 қарори Ҳукумати Ҷумҳурии Тоҷикистон аз 20 феврали соли 2009, № 106 калимаи "назоратии" ба калимаи "нозирони" иваз карда шавад.

2. Низомнома ва Ҳайати Шӯрои назоратии Корхонаи воҳиди давлатии "Ширкати Алюминийи Тоҷик", ки бо қарори Ҳукумати Ҷумҳурии Тоҷикистон аз 20 феврали соли 2009, № 106 "Дар бораи таъсиси Шӯрои назоратии Корхонаи воҳиди давлатии "Ширкати Алюминийи Тоҷик" тасдиқ гардидаанд, дар таҳрири нав тасдиқ карда шаванд (замимаҳои 1 ва 2).

Низомномаи Шӯрои нозирони Корхонаи воҳиди давлатии "Ширкати Алюминийи Тоҷик"

1. МУҚАРРАРОТИ УМУМӢ

1. Низомномаи мазкур тартиби ташкил ва фаъолияти Шӯрои нозирони Корхонаи воҳиди давлатии "Ширкати Алюминийи Тоҷик"-ро (минбаъд - Шӯрои нозирон), инчунин ҳуқуқ ва ӯҳдадориҳои аъзои Шӯрои нозиронро муайян месозад.

2. Шӯрои нозирон бо мақсади баланд бардоштани самаранокии идоракунии фаъолияти Корхонаи воҳиди давлатии "Ширкати Алюминийи Тоҷик" таъсис дода мешавад. Шӯрои нозирони Корхонаи воҳиди давлатии "Ширкати Алюминийи Тоҷик" ҳамчун мақоми идоракунии давлатӣ фаъолияти самараноки молиявию хоҷагидории Корхонаи воҳиди давлатии "Ширкати Алюминийи Тоҷик"-ро (минбаъд - Корхона) танзим менамояд.

3. Дар фаъолияти худ Шӯрои нозирон санадҳои меъёрии ҳуқуқии Ҷумҳурии Тоҷикистон, Низомномаи Корхона ва Низомномаи мазкурро ба роҳбарӣ мегирад.

2. ТАРТИБИ ТАЪСИСИ ШӯРОИ НОЗИРОН

4. Ҳукумати Ҷумҳурии Тоҷикистон Шӯрои нозиронро таъсис медиҳад ва Низомномаву ҳайати онро тасдиқ менамояд.

5. Директори идоракунандаи Корхона узви доимоамалкунандаи Шӯрои нозирон интихоб гардида, вале ҳамчун Раиси он интихоб шуда наметавонад.

6. Аъзои Шӯрои нозирон, ба истиснои намояндагони Корхона, ҳуқуқ надоранд, ки бо Корхона дар муносибатҳои меҳнатӣ қарор дошта бошанд.

3. ВАЗИФАҲО ВА САЛОҲИЯТИ ШӯРОИ НОЗИРОН

7. Шӯрои нозирон ба фаъолияти Корхона роҳбарии умумӣ мекунад, роҳбарии умумии фаъолияти Корхонаро танзим ва назорат менамояд.

8. Ба вазифаҳои Шӯрои нозирон масъалаҳои зайл марбутанд:

- муайян намудани вазифа ва самтҳои стратегии фаъолият ва рушди минбаъдаи Корхона;

- ташкили таҳияи барномаҳои миёна - ва дарозмӯҳлати рушди Корхона;

- ташкил ва назорати татбиқи барнома ва лоиҳаҳои азнавкунонии техникию технологӣ, ҷорӣ намудани технологияҳои истеҳсолии муосир;

- пешбурди сиёсати инвеститсионии Корхона, тасдиқ намудани бизнес-нақшаҳои фаъолияти Корхона, барномаҳои сармоягузорӣ ва дигар чорабиниҳои ташкилию техникӣ;

- муайян намудани усул ва шароитҳои идоракунии корпоративии Корхона;

- муайян ва тасдиқ намудани ҳудудҳои ҳамкории тарафайн бо давлатҳои хориҷӣ ва шахсони ҳуқуқӣ, ки ба таҳвил ва таъмини корхона бо ашёи хоми стратегӣ, таҷҳизот, нерӯи барқ, ва монанди онҳо машғуланд.

9. Ба салоҳияти Шӯрои нозирони Корхона масъалаҳои зайл марбутанд:

- мувофиқа намудани нақшаҳои тиҷоратӣ ва молиявии Корхона, ҳисобот дар бораи иҷрои онҳо, инчунин сметаҳои ҳарсолаи Корхона;

- тасдиқ намудани арзёбии (баҳогузории) амволи Корхона;

- муайян намудани ҳаққи хизматрасонии аудитор;

- кушодани намояндагиҳои Корхона ва барҳамдиҳии онҳо;

- тасдиқ намудани ҳуҷҷатҳои дохилиидоравии Корхона, ки тартиби ташаккулёбӣ ва истифодабарии фондҳои Корхонаро муайян мекунад;

- тасдиқи пешакии ҳисоботи истеҳсолии солона ва молиявии солонаи Корхона;

- муайян намудани шартҳои шартномаи меҳнатӣ бо роҳбари аввали Корхона;

- қабули қарор дар бораи ба ҷавобгарии молумулкӣ кашидани шахсони мансабдори Корхона;

- қабули қарор дар бораи иштироки Корхона дар фаъолияти дигар ташкилотҳои тиҷоратӣ ва ғайритиҷоратӣ, тағйир додани ҳиссаи иштирок ва қатъ намудани иштироки Корхона дар фаъолияти дигар ташкилотҳо;

- ба ҷавобгарии маъмурӣ кашидани Директори идоракунандаи Корхона ва мукофотонидани ӯ мувофиқи қонунгузории меҳнати Ҷумҳурии Тоҷикистон;

- баррасии ҳисоботи Директори идоракунанда ва дигар директорони Корхона дар бораи фаъолияти Корхона (аз ҷумла дар бораи иҷро намудани ӯхдадориҳои вазифавии онҳо);

- тасдиқ намудани тартиби ҳамкории Корхона бо ташкилотҳое, ки дар фаъолияти онҳо Корхона иштирок менамояд;

- аз ҷониби Корхона пешкаш намудани номзадҳои аудитории Корхона, ки дар онҳо Корхона иштирок менамояд;

- тасдиқ намудани номзадии нархгузори мустақил (нархгузорон) барои муайян намудани арзиши амвол ва дигар дороиҳои Корхона дар ҳолатҳои пешбининамудаи қонунгузории Ҷумҳурии Тоҷикистон;

- қаблан маъқул донистани шартномаи коллективӣ, созишномаҳое, ки бояд аз ҷониби Корхона дар доираи танзими муносибатҳои иҷтимоию меҳнатӣ баста шаванд;

- муайян намудани сиёсати харидорӣ дар Корхона ва қабули қарор дар асоси ҳуҷҷатҳои дар Корхона тасдиқгардидае, ки фаъолияти харидории Корхонаро ба танзим медароранд;

- қабули қарор дар бораи пешниҳод намудани Директори идоракунандаи Корхона ба мукофотҳои давлатӣ;

- интихоб намудани Котиби масъули Шӯрои нозирон;

- муайян намудани сиёсати қарзии Корхона дар қисмати гирифтани қарзҳо ва бастани созишномаҳои қарзӣ;

- муайян намудани ҳаҷми маошҳои вазифавӣ, шартҳои пардохти музди меҳнат ва мукофотонидани аъзои мақоми иҷроия.

10. Аъзои Шӯрои нозирон ҳангоми амалӣ намудани ҳуқуқҳои худ ва иҷрои вазифаҳо бояд ба манфиати Корхона амал намуда, амалигардонии ҳуқуқҳои худ ва иҷрои ӯхдадориҳоро дар муносибат бо Корхона содиқона ва оқилона анҷом диҳанд.

11. Аъзои Шӯрои нозирон дар назди Корхона барои зарарҳое, ки ба Корхона бо амалҳои ҷавобгарона (бефаъолиятӣ) ҷавобгар мебошанд, агар асосҳои дигар ва андозаи масъулиятнокӣ бо қонунгузории Ҷумҳурии Тоҷикистон муқаррар нашуда бошад.

12. Ба Директори идоракунандаи Корхона, яке аз аъзо, ё директорони соҳавии ширкат додани ваколат ва салоҳиятҳои Шӯрои нозирон манъ мебошад.

13. ӯҳдадориҳои аъзои Шӯрои нозирон, инчунин фаъолияти Шӯрои нозирон дар асоси қарори Ҳукумати Ҷумҳурии Тоҷикистон қатъ карда мешавад.

4. РАИСИ ШӯРОИ НОЗИРОНИ КОРХОНА, ӯҲДАДОРӢ ВА ВАКОЛАТҲОИ ОН

14. Раиси Шӯрои нозирони Корхона кори Шӯрои нозиронро ташкил менамояд, ҷаласаи онро даъват менамояд, фаъолияти Шӯрои нозиронро ҳамоҳанг сохта дар он раисӣ менамояд, дар ҷаласаҳои Шӯро тартиб додани протоколро ташкил менамояд.

15. Муовини Раиси Шӯрои нозирони Корхона бо овоздиҳии аъзои Шӯрои нозирони Корхона интихоб карда мешавад.

16. Дар сурати набудани Раиси Шӯрои нозирони Корхона иҷрои вазифаҳои ӯ ба муовини Раиси Шӯрои нозирони Корхона вогузор карда мешавад.

17. Раис бояд бо Директори идоракунанда робитаи доимӣ дошта, бо ӯ стратегияи рушди умумии Корхона ва масъалаҳои марбут ба идоракунии хатарҳоро муҳокима намояд.

18. Директори идоракунанда оид ба ҳамаи ҳодисаҳои муҳим, ки барои баҳодиҳии вазъият ва рушди Корхона аҳамияти муҳим доранд, таъҷилан ба Раис иттилоъ медиҳад.

19. Раис бояд онро ба иттилои аъзоёни Шӯрои нозирон вазъияти баамаломадаро расонида, ҳангоми зарурат ҷаласаи ғайринавбатии Шӯрои нозиронро даъват намояд.

5. ҶАЛАСАҲОИ ШӯРОИ НОЗИРОНИ КОРХОНА

20. Ҷаласаҳои Шӯрои нозирон аз рӯи зарурат на камтар аз ду маротиба дар як сол гузаронида мешаванд.

21. Ҷаласаи Шӯрои нозирон аз ҷониби Раиси Шӯрои нозирон (ё муовини Раиси Шӯрои нозирон) бо ташаббуси ӯ ё тибқи талаботи аъзои Шӯрои нозирон даъват карда мешавад.

22. Дар ҷаласаи якуми Шӯро нозирон, ки дар ҳайати нав интихоб шудаанд, ҳатман масъалаҳои интихоби муовини Раиси Шӯрои нозирон баррасӣ мегарданд.

23. Қарори Шӯрои нозирони Корхона тариқи овоздиҳии ғоибона (бо роҳи пурсиш) метавонад қабул карда шавад. Ҳангоми овоздиҳии ғоибона ба ҳамаи аъзои Шӯрои нозирон мавод оид ба масъалаҳои рӯзномаи корӣ ва варақаи пурсиш барои овоздиҳӣ, бо нишон додани мӯҳлате, ки аз ҷониби аъзои Шӯро варақаи пурсишии пур кардашуда ва ба имзо расонидашуда бояд ба Шӯрои нозирони Корхона пешниҳод карда шавад.

24. Аъзои Шӯрои нозирони дар ҷаласаи Шӯрои нозирон ҳузурнадошта ҳуқуқ дорад ба таври хаттӣ фикрҳои худро аз рӯи масъалаҳои рӯзномаи корӣ бо тартиби муқаррарнамудаи дастури фаъолияти Шӯрои нозирон баён намояд.

25. Супоридани ҳуқуқи овоздиҳии аъзои Шӯрои нозирон ба дигар шахс, аз ҷумла ба дигар аъзои Шӯрои нозирон роҳ дода намешавад.

26. Қарор дар ҷаласаи Шӯрои нозирон бо аксарияти овозҳои аъзоёни Шӯрои нозирон, ки дар ҷаласа иштирок менамоянд, ба истиснои ҳолатҳои пешбининамудани қонунгузории Ҷумҳурии Тоҷикистон ва Низомномаи мазкур карда мешавад.

27. Таъмини ташкилию техникии фаъолияти Шӯрои нозиронро Котиби масъули он, ки узви Шӯрои нозирон набуда, аз ҷониби Раиси Шӯрои нозирон таъин мегардад, ба роҳ мемонад.

28. Раиси Шӯрои нозирон на дертар аз 10 рӯз то санаи баргузории ҷаласаи Шӯрои нозирон маводи зеринро тасдиқ менамояд ва ба аъзои Шӯрои нозирон расонидани онро таъмин мекунад:

1) лоиҳаи рӯзномаи ҷаласаи навбатӣ ва ё ғайринавбатии Шӯрои нозирон;

2) ҳуҷҷатҳо ва маводи иттилоотӣ аз рӯи масъалаҳои рӯзномаи ҷаласа.

6. ПРОТОКОЛҲОИ ШӯРОИ НОЗИРОН

29. Протоколи ҷаласаи Шӯрои нозирон аз тарафи Котиби масъули он дар рафти ҷаласа бурда мешавад.

30. Ба протокол Раисикунандаи ҷаласа, аъзои он ва Котиби масъул, ки масъулияти дуруст тартиб додани онро бар зимма дорад, имзо мегузоранд.

31. Фикру андешаи узви Шӯрои нозирон, ки зидди қарори қабулшуда овоз додааст, ба протокол ворид карда мешавад.

32. Протоколи ҷаласаи Шӯрои нозирон на дертар аз 3 рӯз аз санаи баргузории ҷаласа тартиб дода мешавад.

33. Дар протоколи Шӯрои нозирон ин маълумот зикр мегардад:

1) ҷой ва вақти баргузории ҷаласаи Шӯрои нозирон;

2) шахсони дар ҷаласаи Шӯрои нозирон ҳузурдошта;

3) рӯзномаи ҷаласа;

4) масъалаҳое, ки ба овоздиҳӣ гузошта мешаванд ва натиҷаҳои овоздиҳӣ аз рӯи онҳо;

5) қарорҳои қабулшуда.

34. Протокол аз рӯи натиҷаҳои овоздиҳӣ бо роҳи пурсиш на дертар аз 2 рӯз аз санаи муайян шудани натиҷаҳои овоздиҳӣ бо роҳи пурсиш тартиб дода мешавад ва ба он Раиси Шӯрои нозирон ва дар сурати ҳозир набудани ӯ аз ҷониби муовини Раиси Шӯрои нозирон имзо гузошта мешавад.

35. Варақаҳои пурсиш қисми ҷудонопазири протокол маҳсуб меёбанд.

36. Дар протоколе, ки аз рӯи натиҷаҳои овоздиҳии ғоибона тартиб дода шудааст, чунин маълумот дарҷ мегардад:

1) вақт ва ҷойи таҳияи протокол;

2) аъзои Шӯрои нозирон, ки ҳангоми қабули қарор варақаҳои пурсиши онҳо ба эътибор гирифта мешаванд;

3) аъзои Шӯрои нозирон, ки варақаҳои пурсиши онҳо беэътибор дониста шудаанд;

4) масъалаҳое, ки ба овоздиҳӣ гузошта шудаанд, натиҷаҳои оводиҳӣ аз рӯи онҳо;

5) қарорҳои қабулшуда.

37. Нигоҳдории нусхаи аслии протоколҳои Шӯрои нозиронро Котиби масъули он таъмин менамояд.

38. Протоколҳо бо тартиби хронологӣ рақамгузорӣ шуда, рақамгузории дутарафа доранд, дар парвандаи алоҳида ҷой дода мешаванд ва бо тартибе, ки барои ҳуҷҷатҳои дорои маълумоти иҷозаташ маҳдуд муқаррар гардидаанд, нигохдорӣ мешаванд. Нусхаи протоколҳои Шӯрои нозирон, ки аз ҷониби Котиби масъули он имзо гардидааст, ба Раиси Шӯрои нозирон, аъзои он ва Директори идоракунандаи Корхона фиристода мешаванд.

7. БАРХӯРДИ МАНФИАТҲО

39. Ҳар як узви Шӯрои нозирон вазифадор аст, ки манфиатҳои Корхонаи воҳиди давлатии "Ширкати Алюминийи Тоҷик"-ро ба роҳбарӣ гирифта, дар доираи муқаррароти санадҳои меъёрии ҳуқуқӣ ва Низомномаи мазкур фаъолият намояд.

40. Узви Шӯрои нозирон ҳуқуқ надорад, ки ҳангоми қабули қарорҳо манфиатҳои худро пеш гузорад, ё имкониятҳои соҳибкорӣ, маъмурӣ ва имкониятҳои дигареро, ки бинобар узвияти ӯ дар Шӯрои нозирон пайдо мешаванд, ба манфиати худ истифода барад.

41. Муносибати дуҷонибаи Шӯрои нозирон бо Директори идоракунанда ва ҳайати Шӯрои нозирон дар асоси ҳамкории зич ва мудохила накардан ба салоҳияти ҷонибҳо ба роҳ монда мешавад.

Ҳайати Шӯрои нозирони Корхонаи воҳиди давлатии "Ширкати Алюминийи Тоҷик"

Давлаталӣ Саид                   - Муовини якуми Сарвазири Ҷумҳурии Тоҷикистон - Раиси Шӯрои нозирон

Аъзои Шӯрои нозирон:

Буриев Неъматҷон Ҳикматуллоевич  - Муовини якуми Вазири рушди иқтисод ва савдои Ҷумҳурии Тоҷикистон

Холов Ҳайдар Сангович            - Муовини Вазири саноат ва технологияҳои нави Ҷумҳурии Тоҷикистон

Муҳиддинов Пӯлод Муҳиддинович    - Муовини Вазири энергетика ва захираҳои оби Ҷумҳурии Тоҷикистон

Наимӣ Аламхон                    - Муовини Вазири молияи Ҷумҳурии Тоҷикистон

Шарипов Садриддин Файзиевич      - Директори Корхонаи воҳиди давлатии "Ширкати Алюминийи Тоҷик"

Кабиров Шералӣ Олимович          - Директор оид ба тиҷорат ва молияи Корхонаи воҳиди давлатии "Ширкати Алюминийи Тоҷик"

Муродиён Асрор Шарипович         - Сармуҳандиси Корхонаи воҳиди давлатии "Ширкати Алюминийи Тоҷик"

Ҳайдаров ӯктам Фаёзович          - Директори ҳифзи меҳнат, экология ва сифати Корхонаи воҳиди давлатии "Ширкати Алюминийи 

                                   Тоҷик"    

Муъминов Шавкат Аслонович        - Директори истеҳсолоти электролизи Корхонаи воҳиди давлатии "Ширкати Алюминийи Тоҷик"

Дик Павел Иванович               - Директор оид ба иқтисод ва ҳайати кормандони Корхонаи воҳиди давлатии "Ширкати Алюминийи

                                   Тоҷик"