Низомномаи Шӯро оид ба сиёсати саноати давлатҳои аъзои ИДМ

I. Муқаррароти умумӣ

1.1. Шӯро оид ба сиёсати саноати давлатҳои аъзои ИДМ (минбаъд - Шӯро) тибқи Созишнома оид ба ҳамкорӣ дар соҳаи саноат ва таъсиси Шӯро оид ба сиёсати саноати давлатҳои аъзои ИДМ аз 30 майи соли 2012 (минбаъд - Созишнома), бо мақсади ҳамоҳангсозии ҳамкории давлатҳои иштирокчии Созишнома дар соҳаи саноат (сиёсати саноат), таъсис дода мешавад.

1.2. Шӯро сохтори ҳамкориҳои соҳавии ИДМ буда, фаъолияти худро дар доираи ваколатҳояш ба амал бароварда, ба Шӯрои сарони ҳукуматҳои ИДМ ҳисоботдиҳанда мебошад.

1.3. Шӯро дар фаъолияти худ талаботи Оинномаи ИДМ, созишномаҳо, қарорҳои дар доираи ИДМ қабулгардида ва Низомномаи мазкурро дастури амал қарор медиҳад.

1.4. Шӯро фаъолияти худро дар ҳамкории наздик бо Кумитаи иҷроияи ИДМ ва дигар сохторҳои Иттиҳод ба роҳ мемонад.

II. Вазифаҳо ва ӯҳдадориҳои Шӯро

Вазифаҳо ва ӯҳдадориҳои асосии Шӯро аз инҳо иборатанд:

2.1. Гузаронидани машваратҳо ва мубодилаи фикру андешаҳо оид ба масъалаҳои рушди саноат (сиёсати саноат).

2.2. Таҳияи пешниҳодот оид ба ташкил ва гузаронидани мониторинг ва баҳодиҳӣ ба нерӯи рушди соҳаи саноати давлатҳои иштирокчии Созишнома ва дар ин асос тайёр намудани пешниҳодот оид ба фаъолияти муштараки субъектҳои хоҷагидор дар бозорҳои давлатҳои иштирокчии Созишнома.

2.3. Тайёр намудани пешниҳодот оид ба ташаккули робитаҳои мутақобилан судманди байни соҳаҳои саноат, инчунин субъектҳои хоҷагидории давлатҳои иштирокчии Созишнома.

2.4. Таҳияи тавсияҳо оид ба фароҳам овардани шароити мусоид ҷиҳати рушди инноватсионии саноат дар иқтисодиёти давлатҳои иштирокчии Созишнома, мусоидат барои ворид намудан ва самаранок истифода бурдани тадқиқоти илмию техникӣ ва лоиҳаҳои инноватсионии саноатӣ дар соҳаҳои саноати давлатҳои иштирокчии Созишнома.

2.5. Таҳияи пешниҳодот оид ба бунёди истеҳсолоти муштарак, ширкатҳои трансмиллӣ ва гурӯҳҳои молиявию саноатии давлатҳои иштирокчии Созишнома дар соҳаи мошинсозӣ, саноати киштисозӣ, ҳавопаймосозию асбобсозӣ, истеҳсоли техникаи тиббӣ ва ғайра.

2.6. Мубодилаи маълумот оид ба таҷрибаи мубориза бо маҳдудсозии табъизонаи маҳсулоти саноатии давлатҳои иштирокчии Созишнома дар бозорҳои давлатҳои сеюм.

2.7. Таҳияи тавсияҳо оид ба муқовимат ба содироти ғосибона ба бозорҳои давлатҳои иштирокчии Созишнома, ки бо риоя накардани шартҳо ва меъёрҳои савдои байналмилалӣ гузаронида мешавад.

2.8. Таҳияи тавсияҳо ҷиҳати дастгирии давлатии соҳаи саноати давлатҳои иштирокчии Созишнома.

2.9. Ҳамоҳангсозии амалиёт ҷиҳати татбиқи барномаҳо ва лоиҳаҳои муштарак.

2.10. Тайёр намудани маърӯзаҳо ва маводи таҳлилӣ оид ба рушди саноат дар давлатҳои иштирокчии Созишнома.

2.11. Мусоидат дар ташкили кор ҷиҳати тайёр намудани мутахассиссон ва такмили ихтисоси кормандони (муҳандисию техникӣ ва тахассусҳои коргарӣ) соҳаҳои гуногуни саноати давлатҳои иштирокчии Созишнома.

2.12. Таҳияи роҳҳои мувофиқгардида барои ҳалли масъалаҳои ҳифзи муҳити зист, ки дар натиҷаи фаъолияти объектҳои саноатӣ ба вуҷуд меоянд.

2.13. Мусоидат барои ташкили намоишгоҳҳо, семинарҳо, конференсияҳо ва симпозиумҳо.

2.14. Дигар вазифаҳо барои баамалбарории мақсад ва вазифаҳои аз ҷониби Шӯро гузошташуда.

III. Ҳуқуқҳои Шӯро

Барои иҷрои вазифаҳои худ Шӯро ҳуқуқ дорад:

3.1. Доир ба масъалаҳои дар фасли II ҳамин Низомнома зикргардида лоиҳаи ҳуҷҷатҳоро таҳия намуда, мувофиқи тартиби муқарраргардида ба баррасии мақомоти олии ИДМ пешниҳод намояд.

3.2. Мувофиқи тартиби муқарраргардида аз мақомоти ҳокимияти давлатии давлатҳои иштирокчии Созишнома, ки барои таҳия ва татбики сиёсати давлатӣ дар соҳаи саноат масъул мебошанд, иичунин аз мақомоти ҳамкории соҳавии ИДМ доир ба масъалаҳои мансуб ба салоҳияти Шӯро маълумот дархост намояд.

3.3. Дар ҳолатҳои зарурӣ гурӯҳҳои кории муваққатӣ ё доимии коршиносонро оид ба соҳаҳои алоҳидаи саноат (самтҳои сиёсати саноатӣ) таъсис диҳад.

3.4. Регламенти кори Шӯроро таҳия ва тасдиқ кунад, инчунин ба он тағйирот ворид намояд.

IV. Тартиби ташаккули Шӯро

4.1. Шӯро аз ҳисоби роҳбарони мақомоти ҳокимияти давлатии давлатҳои иштирокчии Созишнома, ки барои таҳия ва баамалбарории сиёсати давлатии саноат масъуланд, ташаккул дода мешавад (минбаъдаъзои Шӯро).

Ҳар давлати иштирокчии Созишнома дар Шӯро як овоз дорад. Дар мавриди ба маҷлиси Шӯро сафарбар намудани шахсони дигар ба ҷои аъзои Шӯро ваколати онҳо бояд тасдиқ карда шавад.

4.2. Дар ҳайати Шӯро бо ҳуқуқи овози машваратӣ сардори котиботи Шӯро ва намояндаи Кумитаи иҷроияи ИДМ метавонад шомил бошанд.

4.3. Раисии Шӯро аз тарафи ҳар давлати иштирокчии Созишнома дар шахси намояндаи он ба навбат бо тартиби алифбои русии номи давлатҳои аъзои ИДМ ба мӯҳлати то як сол ба амал бароварда мешавад, агар тартиби дигар бо қарори Шӯро муқаррар нашуда бошад.

Раисони собиқ ва ояндаи Шӯро ҳамраисони ӯ мебошанд.

Дар ҳолати муваққатан ҳузур надоштани раиси Шӯро, вазифаҳои ӯ ба зиммаи яке аз ҳамраисон вогузор карда мешавад.

V. Ташкили корҳо

5.1. Шӯро ҷаласаҳои худро на камтар аз як маротиба дар як сол мегузаронад. Дар ҳолати зарурӣ ҷаласаҳои ғайринавбатӣ даъват карда мешаванд.

5.2. Ҷаласаҳои ғайринавбатии Шӯро метавонад бо пешниҳоди ҳар давлати иштирокчии Созишнома, агар онро аксарияти аъзои Шӯро дастгирӣ намояд, баргузор карда шавад.

5.3. Қарорҳои Шӯро дар ҳолате эътибор пайдо менамоянд, ки дар ҷаласа аз се ду ҳиссаи аъзои Шӯро иштирок дошта бошанд.

5.4. Маҳалли гузаронидани ҷаласаҳо бо мувофиқаи пешакии аъзои Шӯро муайян карда мешавад.

5.5. Шӯро кори худро тибки нақшаҳои солонаи кор, ки аз тарафи Шӯро таҳия ва тасдиқ карда мешаванд, ба роҳ монда, аз фаъолияти солонаи худ ба Кумитаи иҷроияи ИДМ маълумот пешниҳод менамояд.

5.6. Бо қарори Шӯро дар кори он метавонанд намояндагони идораҳои манфиатдори давлатҳое, ки иштирокчии Созишнома намебошанд, инчунин ташкилотҳо, аз ҷумла ташкилотҳои байналмилалӣ ба ҳайси мушоҳидон иштирок намоянд.

5.7. Тибқи қарори Шӯро ба корҳои он ба сифати коршиносон намояндагони субъектҳои хоҷагидори давлатҳои иштирокчии Созишнома, ассосиатсия ва иттиҳодияҳои онҳо ҷалб карда мешаванд.

5.8. Қарорҳои Шӯро бо аксарияти овозҳои аъзои Шӯро, ки дар маҷлис иштирок менамоянд, қабул карда мешаванд, агар тартиби дигаре аз тарафи Шӯро муайян нагардида бошад.

Ҳар узви Шӯро метавонад дар бораи бетарафии худ нисбат ба ин ё он масъала изҳор намояд, ки ин набояд ҳамчун монеа ҳангоми қабули қарори Шӯро баррасӣ шавад.

Аъзои Шӯро, ки ҷонибдори қарор нестанд, метавонанд изҳори махсус намоянд, ки ба протоколи маҷлис ворид карда мешавад.

5.9. Қарори Шӯро аз ҷониби Раиси Шӯро ба имзо расонида мешавад.

5.10. Ҷаласаҳои Шӯро тибқи Регламенти тасдиқнамудаи Шӯро гузаронида мешаванд.

5.11. Маводи ҷаласаи навбатии Шӯро 30 рӯз пеш аз баргузории он ба аъзо фиристода мешавад.

5.12. Таъминоти ташкилию техникӣ ва иттилоотии фаъолияти Шӯро аз ҷониби котибот ба амал бароварда мешавад.

5.13. Вазифаҳои котиботи Шӯро ба зиммаи мақоми ҳокимияти давлатии давлати иштирокчии Созишнома, ки намояндаи он раисии Шӯроро ба ӯхда дорад, якҷоя бо воҳиди сохтории Кумитаи иҷроияи ИДМ вогузор карда мешаванд.

Роҳбари котиботи Шӯро намояндаи мақоми ҳокимияти давлатие, ки раисии Шӯроро ба ӯҳда дорад ва муовини роҳбари котибот намояндаи Кумитаи иҷроияи ИДМ мебошад.

5.14. Қарорҳои Шӯро, ки ба манфиатҳои яке аз давлати иштирокчии Созишнома дахолат дорад, наметавонанд бе иштироки намояндаи он қабул карда шавад.

5.15. Шӯро раисро дар ҷаласаи аввалин интихоб менамояд. Раис кори Шӯроро ташкил менамояд, ҷаласаҳои онро роҳбарӣ намуда, риояи Регламентро таъмин менамояд.

5.16. Ҳуҷҷатҳои дар ҷаласаҳои Шӯро қабулгардида ба ҳамаи аъзои он дар мӯҳлати ду ҳафта ирсол карда мешаванд.

5.17. Забони кории Шӯро забони русӣ мебошад.

VI. Муқаррароти хотимавӣ

6.1. Хароҷоти вобаста ба ташкил ва гузаронидани ҷаласаҳои Шӯро аз ҷониби мақомоти дахлдори ҳокимияти давлатии давлати даъваткунандаи иштирокчии Созишнома пардохт карда мешавад.

Хароҷоти сафарҳои аъзои Шӯро ва дигар иштирокчиёни ҷаласаҳоро мақомоти ҳокимияти давлатӣ ва ташкилотҳои равонкунандаи давлатҳои иштирокчии Созишнома пардохт менамоянд.

6.2. Масъалаи барҳам додани Шӯро аз ҷониби Шӯрои сарони ҳукуматҳои Иттиҳоди Давлатҳои Мустақил баррасӣ карда мешавад.