Ҳукумати Ҷумҳурии Тоҷикистон

ҚАРОР

Дар бораи тасдиқи Тартиби таъин ва пардохти кӯмакпулии давлатӣ ба кӯдакони то синни 16 сола, ки мубталои вируси норасоии масунияти одам ва бемории пайдошудаи норасоии масуният мебошанд

Мутобиқи моддаи 15 Қонуни Ҷумҳурии Тоҷикистон "Дар бораи муқовимат бо вируси норасоии масунияти одам ва бемории пайдошудаи норасоии масуният" Ҳукумати Ҷумҳурии Тоҷикистон қарор мекунад:

1) Тартиби таъин ва пардохти кӯмакпулии давлатӣ ба кӯдакони то синни 16 сола, ки мубталои вируси норасоии масунияти одам ва бемории пайдошудаи норасоии масуният мебошанд, тасдиқ карда шавад (замима мегардад).

2) Андозаи пардохти кӯмакпулии давлатӣ ҳар моҳ дар ҳаҷми 7 (ҳафт) нишондиҳанда барои ҳисобҳо ва санаи пардохти онҳо аз 1 январи соли 2011 муқаррар карда шавад.

3) Вазорати тандурустии Ҷумҳурии Тоҷикистон, Вазорати меҳнат ва ҳифзи иҷтимоии аҳолии Ҷумҳурии Тоҷикистон ва мақомоти иҷроияи маҳаллии ҳокимияти давлатӣ ҷиҳати татбиқи қарори мазкур тадбирҳои зарурӣ андешанд.

4) Вазорати молияи Ҷумҳурии Тоҷикистон ҳар сол дар буҷети давлатӣ ҷиҳати маблағгузории пардохти кӯмакпулии давлатӣ ба кӯдакони то синни 16 сола, ки мубталои вируси норасоии масунияти одам ва ё бемории пайдошудаи норасоии масуният мебошанд, маблағҳои заруриро пешбинӣ намояд.