Барномаи иммунопрофилактика дар Ҷумҳурии Тоҷикистон барои солҳои 2026-2030

1. МУҚАРРАРОТИ УМУМӢ

1. Барномаи иммунопрофилактика дар Ҷумҳурии Тоҷикистон барои солҳои 2026-2030 (минбаъд - Барнома) мутобиқи афзалиятҳои сиёсати давлатии кишвар дар соҳаи тандурустӣ, Ҳадафҳои Рушди Устувор, Стратегияи 6.0 Алянси глобалии ваксинаҳо ва иммунизатсия ва Рӯзномаи аврупоӣ оид ба иммунизатсия то соли 2030 таҳия гардида, барои таҳкими низоми иммунизатсияи устувору одилонаи ба одам нигаронидашуда, пешгирии пайдоиш ва паҳншавии бемориҳои сироятии ба воситаи иммунизатсия идорашаванда, беҳтар намудани саломатии модару кӯдак, таъмини дарозумрии аҳолӣ ва пурзӯр намудани кумаки аввалияи тиббию санитарӣ равона карда шудааст.

2. Дар Барнома мафҳумҳои асосии зерин истифода мешаванд:

- ваксина - маводи тиббии иммунобиологие мебошад, ки барои пайдо намудани масуният бар зидди бемориҳои сироятӣ истифода мешавад;

- ваксинаҳои зинда – ваксинаҳое, ки аз микроорганизмҳои зиндаи қобилияташон пасткардашуда омода карда шудаанд;

- ваксинаҳои ғайрифаъолкардашуда – ваксинаҳое, ки аз микроорганизмҳои кушташуда ё аз ҷузъҳои алоҳидаи ҳуҷайраҳои микробҳо ва маводи мубодилаи онҳо, инчунин бо усулҳои дигари биотехнологии бадастовардашуда омода карда шудаанд;

- воя - миқдори муайяни ваксина, ки барои иммунизатсия истифода мешавад;

- анатоксинҳо – маводи дорувориҳои иммунобиологие, ки аз токсинҳо омода мешавад ё бо усули технологияи рекомбинантӣ бадаст оварда шуда, хосиятҳои зоҳирии заҳролудиро надорад ва қобилияти коркарди антителоҳоро бар зидди токсинҳои аслӣ ба вуҷуд меорад;

- қобилияти иммуногенӣ - қобилияти пайдо намудани масуният бар зидди бемориҳои сироятӣ;