Бо қарори Ҳукумати
Ҷумҳурии Тоҷикистон
аз 6 марти соли 1998
№ 84 тасдиқ шудааст
ҚОИДАҲОИ ИСТИФОДАИ ҚУВВАИ ГАРМӢ
1.Қисми умумӣ
1.1.Ҳамин «Қоидаҳои истифодаи қувваи гармӣ» дар асоси Қарори Ҳукумати Ҷумҳурии Тоҷикистон аз 17 октябри соли 1996 № 465 интишор ва бо Вазорати иқтисод ва робитаҳои иқтисодии хориҷии Ҷумҳурии Тоҷикистон, Вазорати адлияи Ҷумҳурии Тоҷикистон ва Кумитаи меъморӣ ва сохтмони назди Ҳукумати Ҷумҳурии Тоҷикистон мувофиқа шудаанд ва муносибатҳои мутақобилаи ташкилотҳои таъминкунандаи гармии Ширкати давлатии саҳомию холдингии «Барқи Тоҷик»-ро дар мавриди шартҳои ҳисоббаробаркунӣ барои қувваи гармӣ бо истифодакунандагони қувваи гармӣ, ки дар қаламрави Ҷумҳурии Тоҷикистон ҷойгиранд, муайян менамоянд.
Иҷрои ҳамин Қоидаҳо чи барои ташкилотҳои таъминкунандаи қувваи гармӣ ва чи барои истифодакунандагони қувваи гармӣ, сарфи назар аз тобеияти идорӣ ва шакли моликияташон, ҳатмӣ мебошад.
1.2.Истифодаи қувваи гармӣ танҳо дар асоси шартномаи дар байни ташкилоти таъминкунандаи қувваи гармӣ ва истифодакунанда (муштарӣ), ки дастгоҳҳои он бевосита ба шабакаҳои ташкилоти таъминкунандаи қувва пайваст шудаанд, иҷозат дода мешавад.
Ба шартнома акт дар бораи ҷудо кардани тобеияти балансии шабакаҳои гармӣ ва масъулияти истифодабарии тарафҳо замима мегардад.
Шартнома барои истифодаи қувваи гармӣ мутобиқи шартномаҳои намунавие, ки ба ҳамин Қоидаҳо замима мегарданд, баста мешавад.
1.3.Муштариёни фаръӣ барои истифодаи қувваи гармӣ бо муштариён шартнома мебанданд.
Дар шартнома ё замимаи шартномаи байни муштарӣ ва ташкилоти таъминкунандаи қувваи гармӣ дар бораи ба муштариёни фаръии ба шабакаҳои гармии муштарӣ пайвастшуда маълумот дода мешавад (номгӯй, бори ҳадди аксари яксоата, гармии истифодашаванда, миқдори бозгардондашавандаи конденсат (бо тонна фоиз, бо тақсими он ба моҳҳо, тарифҳо ва маълумоти дигар).
_________________________
1.Истилоҳоти асосие, ки дар ҳамин Қоидаҳо истифода мешаванд, дар охири китоб оварда шудаанд.
1.4.Муштарӣ танҳо бо иҷозати ташкилоти таъминкунандаи қувва метавонад, ки бо муштариёни фаръӣ дар бораи таъминоти қувваи гармӣ шартнома бандад.
Муштарӣ вазифадор аст, ки бо талаби ташкилоти таъминкунандаи қувва мувофиқи имкониятҳои техникии муқарраршуда ба шабакаҳои гармии худ дигар муштариёни фаръиро пайваст кунад.
1.5.Ба шакли буғ ва оби гарм додани қувваи гармии ҳадди аксари яксоата барои корхонаҳо ва ташкилоту муассисаҳо вобаста бо имкониятҳои техникии истгоҳҳои гармӣ (дегхонаҳо) ва имкониятҳои гармигузаронии хатҳои интиқоли гармӣ аз тарафи ташкилоти таъминкунандаи гармӣ муқаррар карда мешавад ва дар шартнома қайд мегардад.
Аз тарафи истифодакунанда зиёд карда шудани бори ҳадди аксар ва миқдори қувваи гармии истифодашаванда нисбат ба миқдори дар шартнома нишондодашуда танҳо бо иҷозати ташкилоти таъминкунандаи қувва баъди иҷро намудани шартҳои техникӣ аз тарафи истифодакунанда ва дохил намудани тағьироти дахлдор ба шартнома мумкин аст.
2. Шартҳои технинии пайваст намудани истифодакунандагони қувваи гармӣ
2.1.Истифодакунанда вазифадор аст, ки барои пайваст намудани муштариёни нави истифодакунандаи қувваи гармӣ ё зиёд кардани қувваи гармӣ барои объектҳои амалкунанда, сарфи назар аз тобеияти балансии шабакаҳои гармӣ, ки истифодакунанда ба онҳо пайваст карда мешавад, аз ташкилоти таъминкунандаи қувва иҷозат гирад.
2.2.Ташкилоти таъминкунандаи қувва баъди гирифтани дархост аз корхонаи фармоишгар (сохтмончӣ) ё бо супориши вай аз ташкилоти генералии лоиҳакашӣ дар мӯҳлати 2 ҳафта барои бо гармӣ таъмин намудани корхонаҳои нав сохташуда, биноҳо, иморатҳо, навбатҳои онҳо ё бахшҳои алоҳидаи корхонаҳо шартҳои пешакӣ медиҳад.
2.3.Ба мувофиқа расонидани лоиҳаҳои пешбинишуда дар бораи бо гармӣ таъмин намудани корхонаҳо, биноҳо, иморатҳо, навбатҳои онҳо, бахшҳои алоҳидаи корхонаҳо ё объектҳои амалкунандаи васеъкардашаванда ва аз нав сохташаванда, ки тағир додани нақшаи гармирасонии берунии истифодакунандаро талаб мекунанд, аз тарафи ташкилоти таъминкунандаи қувва ҳангоми интихоби майдони сохтмон иҷро карда мешавад.
2.4.Ташкилоти таъминкунандаи гармӣ шартҳои техникиро барои пайваст намудани корхонаҳо, биноҳо, иморатҳо, навбатҳои онҳо ё бахшҳои алоҳидаи корхонаҳо ба шабакаҳои ташкилоти таъминкунандаи қувва ба истифодакунандаи фармоишгар дар муддати як моҳи баъди бо тартиби муқарраршуда ба тасдиқ расидани акт дар бораи интихоби майдони сохтмон ва барои объектҳои истиқоматӣ дар муддати як моҳи баъд аз қабули қарор аз тарафи мақомоти дахлдор дар бораи ҷудо кардани қитъаи замин медиҳад.
Якҷоя бо дархости зикршуда оид ба додани шартҳои техникӣ барои ба шабакаи гармии ташкилоти таъминкунанда пайваст шудан истифодакунанда ва ташкилоти лоиҳакашӣ - лоиҳакаши генералӣ ба ташкилоти таъминкунандаи гармӣ мухтасар дар бораи мӯҳлатҳои меъёрии давомнокии лоиҳакашии объект, сохтмон ва мӯҳлатҳои пешбинишудаи ба истифода додани он, тавсифномаи бор аз рӯи намуди истифодабарӣ (эҳтиёҷоти технологӣ, гармидиҳӣ ва системаи таҳвия, бо оби гарм таъмин намудан ва ғайра) ва талабот оид ба эътимоднокии таъминоти гармӣ маълумот медиҳанд.
2.5.Ҳангоми аз нав сохтан ё васеъ кардани дастгоҳҳои гармии истифодакунанда (муштарӣ), ки тағир додани миқдори гармии истифодашаванда ё параметрҳои ҳомили ҳароратро талаб мекунанд, истифодакунанда ҳамчунин бояд аз ташкилоти таъминкунандаи гармй барои пайваст намудани онҳо ба шабакаҳои гармӣ шартҳои техникӣ гирад.
2.6.Истифодакунандагони дастгоҳҳои истифодакунандаи гармӣ, ки аз шабакаҳои муштариёни харидафурӯш ё муштариёни ташкилоти таъминкунандаи гармӣ (муштариёни асосӣ) таъмин мегарданд, шартҳои техникиро аз ташкилоти мазкур мегиранд.
Пеш аз ба муштариёни фаръӣ додани шартҳои техникӣ истифодакунандагони харидафурӯш ё муштарӣ вазифадоранд, ки онҳоро бо ташкилоти таъминкунандаи гармӣ мувофиқа кунанд.
2.7.Дар шартҳои техникӣ барои пайваст намудани объект ба шабакаи ташкилоти таъминкунандаи гармӣ инҳо нишон дода мешаванд:
а) манбаъ ва эътимоднокии гармирасонӣ, нуқтаи пайвастшавӣ ба шабакаҳои гармӣ, тарзи танзими миқдори қувваи гармии додашаванда);
б) параметрҳои ҳомили гармӣ ва низоми гидравликӣ дар нуқтаҳои пайвастшавии асосӣ ва эҳтиётӣ бо дарназардошти бори истифодакунандагони дигар;
в) бори истифодакунандаи асосӣ бо дарназардошти дурнамои пайваст намудани бори истифодакунандагони дигар;
г) асоснок будани талабот дар бораи зиёд кардани имконияти гармигузаронии шабакаи мавҷуда ва иқтидори манбаи гармии ташкилоти таъминкунанда бо сабаби пайдо шудани объекти нав;
д) миқдор, сифат ва низоми кашида гирифтани конденсати бозгардандаи истеҳсолӣ, нақшаи ҷамъоварӣ ва бозгардондани конденсат;
е) тавсияҳо дар бораи истифодаи захираҳои энергетикии корхонаҳо;
ж) манбаъҳои гармирасонии эҳтиётӣ бо дарназардоштӣ талабот оид ба эътимоднокии онҳо;
з) талабот дар мавриди ба ҳисоб гирифтан ва насб кардани асбобҳои баҳисобгирӣ ва назоратию андозагирӣ;
и) талабот дар мавриди қубуркашӣ ва сохти каналҳо, камераҳо, арматураи тамба ва танзимкунанда, доир ба оиқи қубурҳо, муҳофизат аз зангзанӣ, таҷҳизонидани нуқтаҳои гармӣ;
к) нақшаи пайваст кардани бори гармкунию таҳвия ва технологӣ ва бори таъминот бо оби гарм;
л) ҷадвали ҳарорат ва сарфи оби шабакавӣ;
м) тобеияти балансӣ ва истифодабарии шабакаҳои гармии сохта ва таъмиршаванда ва ҳудуди ҷудошавии шабакаҳои гармии ташкилоти таъминкунандаи гармӣ ва истифодакунанда.
2.8.Иҷрои шартҳои техникии аз тарафи ташкилоти таъминкунанда додашуда барои истифодакунандагони фармоишгар ва ташкилотҳои лоиҳакашӣ, ки таҳияи лоиҳаи гармирасонӣ ба онҳо супорида мешавад, ҳатмӣ мебошад.
Мӯҳлати эътибори шартҳои техникӣ ҳангоми интихоб намудани майдони сохтмон ё тайёр намудани супориш барои лоиҳаи азнавсозии корхона, сохтмон бе ишғол намудани ҳудуди иловагӣ ва объектҳои сохтмони манзил муқаррар гардида, дар шартҳои техникӣ зикр карда мешавад.
Зимнан мӯҳлати зикршуда набояд аз мӯҳлати зарурӣ барои лоиҳакашӣ ва сохтмони корхона, бино, иморат, навбатҳои онҳо ё бахши алоҳидаи корхона, ки мутобиқи меъёрҳои амалкунандаи давомнокии сохтмон муайян шудааст, камтар бошад.
Ҳангоми ба анҷом расидани мӯҳлати меъёрии барои лоиҳакашӣ ва сохтмони корхона муайяншуда истифодакунанда бояд дароз кардани мӯҳлати шартҳои техникиро дар ташкилоти таъминкунанда ба расмият дарорад.
2.9.Лоиҳаҳои (лоиҳаҳои кории) корхонаҳо, биноҳо, иморатҳо, навбатҳои онҳо ё бахшҳои корхонаҳои алоҳида, ки мутобиқи лоиҳаҳои ҳангоми интихоби майдони сохтмон ё тайёр намудани супориш барои лоиҳакашӣ мувофиқат карда шудаанд, шартҳои техникӣ барои пайваст кардани объект ба шабакаҳои ташкилотҳои таъминкунанда қоидаҳо ва меъёрҳои сохтмон (ки бояд аз тарафи сармуҳандиси лоиҳа бо навиштаҷоти дахлдор дар маводи лоиҳа тасдиқ шуда бошад) мувофиқаи иловагиро бо ташкилоти таъминкунандаи гармӣ талаб намекунанд.
Дар ҳолатҳои ҷудогона, агар ҳангоми кашидани лоиҳаи корхона, бино, иморат, навбатҳои он ё бахши корхонаи алоҳида зарурати қисман аз нишондодҳои лоиҳаҳои мувофиқашуда ва шартҳои техникӣ инҳироф кардан ба миён ояд, инҳирофоти мазкур бояд пешакӣ аз тарафи ташкилотҳои лоиҳакашӣ бо ташкилоти таъминкунанда, ки пештар лоиҳаҳоро мувофиқ дониста, шартҳои техникӣ додааст, ба мувофиқа расонида шаванд.
2.10.Фармоишгар (истифодакунанда) бо иштироки ташкилоти лоиҳакашӣ то сар шудани корҳои сохтмони объект қисматҳои дахлдори лоиҳаи (лоиҳаи кории) корхона, бино, иморат, навбатҳои он ё бахши алоҳидаи корхона ва тарҳҳои кориро ба ташкилоти таъминкунандаи гармӣ пешниҳод мекунад.
Ташкилоти мазкур дар муддати 10 рӯз мутобиқати қарорҳои лоиҳавии қабулшударо бо шартҳои техникӣ, дастурҳои қоидаҳо ва меъёрҳои амалкунандаи сохтмон баррасӣ намуда, барои ба шабакаи худ пайваст намудани объект иҷозат медиҳад. Дар баъзе ҳолатҳо, вақте ки зарурати санҷиши иловагӣ ба миён меояд, мӯҳлати баррасии ҳуҷҷатҳои лоиҳавии зикршуда метавонад то 1 моҳ дароз карда шавад.
Дар мавриди мувофиқат надоштани ҳуҷҷатҳои лоиҳавии баррасишуда бо талаботи шартҳои техникӣ ё ҳуҷҷатҳои амалкунандаи меъёрӣ ба истифодакунанда дар бораи ба шабака пайваст накардани объект мактуби асоснок фиристода мешавад.
Фармоишгар (истифодакунанда), ки барои ба шабакаи истифодакунандаи харидафурӯш ё муштарӣ пайваст шудан шартҳои техникӣ гирифтааст, ба вай ҳуҷҷатҳои лоиҳавии таҳияшударо оид ба пайваст намудани корхона, бино ва иморат ба шабакаҳои истифодакунандаи харидафурӯш ё муштарӣ пешниҳод менамояд.
2.11.Насб кардани дастгоҳҳои гармиистифодакунандаи нав, васеъ кардан ва азнавсозии дастгоҳҳои гармиистифодакунандаи амалкунандаи муштариён бо қувва ва маблағи истифодакунандагон анҷом дода мешавад.
3.Иҷозати ба кор андохтани системаи гармиистифоданунии муштариён
3.1.Ҳамаи системаҳои гармиистифодакунии нав пайвастшаванда ва азнавсохташавандаи истифодакунандагон бояд мутобиқи ҳуҷҷатҳои лоиҳавие, ки бо ташкилоти таъминкунандаи гармӣ бо тартиби муқарраргардида мувофиқа шудаанд, меъёр ва қоидаҳои сохтмон, дигар ҳуҷҷатҳои меъёрӣ ба низом оварда шаванд ва бояд бо талаботи «Қоидаҳои истифодабарии техникии дастгоҳҳои гармиистифодакунанда ва шабакаҳои гармӣ”-и ҳамин Қоидаҳо мутобиқат дошта бошанд, инчунин бо ҳуҷҷатҳои техникӣ ва қабулу супоридан таъмин карда шаванд.
3.2.Системаҳои гармиистифодакунӣ пеш аз ба кор дароварда шудан бояд аз қабули таҷрибавӣ гузаранд ва баъд аз он истифодакунанда онҳоро бо акти мутобиқи Қоидаҳои ҷорӣ тартибдодашуда аз идораҳои васлкунанда қабул намояд. Баъд аз ин истифодакунанда вазифадор аст, ки ҳуҷҷатҳои лоиҳавӣ ва техникӣ, ҳуҷҷатҳои қабулу супоридани дастгоҳҳоро дар ҳаҷми зарурӣ ва системаи истифодабарии гармиро барои муоина ва ба истифода иҷозат додан ба намояндаи ташкилоти таъминкунандаи гармӣ пешниҳод намоянд.
Ба кор даровардан баъд аз қабули онҳо аз тарафи комиссияҳои идорӣ ва давлатӣ бо иштироки ҳатмии нозири «Тоҷикгосэнергонадзор» анҷом дода мешавад.
Барои ба кор андохтан ва корҳои танзимотӣ мувофиқи дархости истифодакунанда ташкилоти таъминкунандаи гармӣ системаи гармиистифодакуниро барои мӯҳлати дархостшуда ба кор медарорад.
Системаи аз нав сохташудаи гармиистифодакунии муштариён пеш аз ба кор даровардан бояд аз муоинаи намояндаи ташкилоти таъминкунандаи гармӣ гузаронида шавад. Санҷиш бояд бо иштироки нозири «Тоҷикгосэнергонадзор» анҷом дода шавад.
3.3.Ҳангоми дар системаи гармиистифодакунии муштариён ошкор гардидани камбудиҳо доир ба васли он, инҳирифот аз шартҳои додашудаи техникӣ, лоиҳаи бо ташкилоти таъминкунандаи гармӣ мувофиқашуда, инчунин қоидаҳои ҷорӣ ва дигар ҳуҷҷатҳои меъёрӣ ё ҳангоми мавҷуд набудани корманди таълимдидаи хизматрасони ин дастгоҳҳо ба кор андохтани онҳо мумкин нест.
3.4.Ташкилоти таъминкунандаи гармӣ баъд аз ду ҳафтаи кори санҷишӣ, бартараф намудани камбудиҳои дар ин давра ошкоргардида, аз тарафи намояндаи ташкилоти гармирасон муоина гардидани системаи гармиистифодакунӣ, бастани шартнома барои додани гармӣ ва дода шудани ҳуҷҷатҳои иҷроия ба истифодакунанда барои истифодаи доимии системаи гармиистифодакунӣ иҷозат медиҳад.
Иҷозат барои ба кор андохтани системаи гармиистифодакунӣ, танҳо дар сурате имкон дорад, ки мутахассиси тайёри дахлдор, кормандони инженерию техникӣ ва шахсӣ масъул барои ҳолати техникӣ ва бехатарии истифодаи дастгоҳҳои гармиистифодакунанда ва шабакаҳои гармӣ мавҷуд бошанд.
4.Насб ва истифодаи аобобҳои ба ҳисобгирии қувваи гармӣ
4.1.Системаи гармиистифодакунии ҳамаи муштариёни қувваи гармӣ бояд бо асбобҳои зарурии баҳисобгирӣ таъмин бошанд.
Ин асбобҳо барои ҳисобу китоби истифодакунанда бо ташкилоти таъминкунандаи гармӣ хизмат мекунанд.
4.2.Ба шабакаи гармии ташкилоти таъминкунандаи гармӣ, инчунин ба шабакаи муштарӣ, истифодакунандаи харидафурӯш пайваст намудани муштарии фаръии системаи гармиистифодакунӣ, ки асбобҳои баҳисобгирии қувваи гармӣ надорад, мумкин нест. Дар сурати набудани асбобҳои баҳисобгирӣ ҳисобу китоби қувваи гармӣ дар асоси ӯҳдадориҳои шартномавӣ анҷом дода мешавад.
4.3.Асбобҳои назоратию андозагирӣ барои ҳисобу китоби қувваи гармӣ дар байни ташкилоти таъминкунандаи гармӣ ва истифодакунанда аз тарафи худи истифодакунандагон, ки барои ҳифозат ва ҳолати онҳо ҷавобгар мебошанд, харида насб ва таъмир карда мешаванд.
Ташкилоти таъминкунандаи гармӣ назорати даврии ин асбобҳоро анҷом медиҳад.
Дар ҳолатҳои ошкор гардидани нуқсҳо дар асбобҳои баҳисобгирӣ ё пайдо шудани шубҳа дар дурустии нишондиҳандаҳои онҳо истифодакунанда вазифадор аст, ки фавран аз ин бобат ташкилоти таъминкунандаи гармиро огоҳ намояд.
4.4.Баҳисобгирии гармидиҳӣ ва ҳисобу китоби гармии додашаванда бояд дар ҳудуди тақсимшавии шабакаҳои гармии ташкилоти таъминкунандаи гармӣ ва истифодакунанда гузаронида шавад.
Ҳангоми насби асбобҳои баҳисобгирӣ берун аз ҳудуди тақсимшавӣ ҳисобу китоби қувваи гармӣ бо дарназардошти камшавии гармӣ дар қитъаҳои шабака аз ҳудуди тақсимшавӣ то ҷои насби асбобҳои баҳисобгирӣ гузаронида мешавад.
Ҳисобу китоби гармии камшуда ё гузаронидани санҷиш доир ба камшавии гармӣ аз тарафи ташкилоти таъминкунандаи гармӣ ва истифодакунанда анҷом дода мешавад.
4.5.Аз як ҷо ба ҷои дигар гузаронидан ё кушода гирифтани асбобҳои баҳисобгирии қувваи гармӣ танҳо аз тарафи корманди ташкилоти таъминкунандаи гармӣ анҷом дода мешавад. Музди кори иҷрокардаи ӯ бояд пардохта шавад.
Санҷиши давлатии даврии асбобҳои баҳисобгирӣ бояд дар мӯҳлатҳои аз тарафи мақоми давлатии оид ба стандартҳо муқарраршуда гузаронида шавад. Мавҷуд набудани тамғаи тафтиши давлатӣ ё гузаштани мӯҳлати тафтиши асбобҳо баҳисобгирии аз рӯи онҳо гузаронидашавандаро беэътибор мегардонад.
5.Истифодаи системаи гармиистифодабарӣ аз тарафи муштариён
5.1.Ҳудуди ҷавобгарӣ барои ҳолат ва хизматрасонии системаи истифодабарии гармӣ дар байни ташкилоти таъминкунандаи гармӣ ва истифодакунанда аз рӯи тобеияти балансии онҳо муайян карда шуда, дар акт оид ба тақсими тобеияти балансии шабакаҳои гармӣ ва масъулияти истифодабарии тарафҳо, ки ба шартнома замима мегардад, қайд карда мешавад.
5.2.Дар қубурҳои гармирасоние, ки ба ташкилоти таъминкунанда тааллуқ доранд, набояд ягон таҷҳизот ва асбоби ба истифодакунанда тааллуқдошта насб шуда бошад.
Дар як камера, хатти интиқоли гармӣ ва эстакада набояд таҷҳизоте, ки аз тарафи ташкилотҳои гуногун хизмат расонида мешаванд, мавҷуд бошад. Дар дастгоҳҳои амалкунанда, ки дар онҳо асбобҳои ба ташкилотҳои гуногун тааллуқдошта мавҷуданд, ҳамаи таҷҳизот ба баланс ва хизматрасонии яке аз ташкилотҳо гузаронда мешавад.
5.3.Хатҳои интиқоли гармӣ барои истифодакунандаи танҳо, нуқтаҳои гармӣ, системаи дохилии истифодабарии гармӣ дар баланс ва истифодаи вай қарор доранд.
5.4.Истифодакунанда барои ҳолати техникӣ ва истифодаи системаи истифодабарии гармии дар ихтиёраш буда, истифодаи сарфакоронаи қувваи гармӣ ва риояи интизоми оперативию диспетчерӣ, инчунин ҳифозати иншоот, хатҳои интиқоли гармӣ ва дастгоҳҳои гармидиҳандае, ки дар ҳудуди ӯ ҷойгиранд, вале ба ташкилоти таъминкунандаи гармӣ ё дигар ташкилотҳо тааллуқ доранд, ҷавобгар аст.
5.5.Бо мақсади таъмини устувори гармирасонӣ ва истифодаи сарфакоронаи дастгоҳҳои истифодакунандаи гармӣ муштарӣ вазифадор аст, ки:
а) «Қоидаҳои истифодабарии техникии дастгоҳҳои истифодакунандаи гармӣ ва шабакаҳои гармӣ» ва «Қоидаҳои техникаи бехатарӣ ҳангоми истифодаи дастгоҳҳои истифодабарандаи қувваи гармӣ ва шабакаҳои гармӣ»-ро ба таври қатъӣ риоя намояд;
б) дастгоҳҳои истифодабарандаи гармӣ, хатҳои интиқоли гармӣ, асбобҳои назоратию андозгирӣ, оиқи қубурҳои гармигузар ва дастгоҳҳои истифодакунандаи гармиро дар ҳолати дурусти техникӣ нигоҳ дорад;
в) таъмир ва санҷишҳои нақшавии хатҳои интиқоли гармӣ, дастгоҳҳои истифодакунандаи гармӣ, арматураҳои танба ва танзимкунандаро сари вақт гузаронад, ҳаҷм, мӯҳлат ва ҷадвали гузаронидани таъмири дастгоҳҳоро бо ташкилоти таъминкунандаи гармӣ мувофиқа намояд;
г) якҷоя бо намояндаи ташкилоти таъминкунандаи гармӣ тамғазании милҳои сардиҳӣ, арматураҳо, асбобҳои назоратию андозагирӣ ва ғайраро анҷом диҳад, ҳифозати тамғаҳои муқарраршуда ва кушодани онҳоро бо иҷозати ташкилоти гармирасон таъмин намояд;
д) ба истифодаи барзиёд аз ҳаҷмҳои дар шартнома зикршудаи гармӣ роҳ надиҳад ва низоми аз тарафи ташкилоти гармирасон муайяншудаи истифодабарии гармиро риоя намояд;
е) супоришҳои оперативии ташкилоти таъминкунандаи қувваи гармиро оид ба низоми истифодабарии гармӣ иҷро намояд;
ж) аз рӯи миқдор, сифат ва ҳарорати дар шартнома зикршуда бозгардондани конденсат ва оби шабакаро таъмин намояд, ба камшавии об, ки дар шартнома пешбинӣ нашудааст, инчунин зиёд кардани ҳарорати об дар қубури қафогардии об нисбат ба ҳарорати дар ҷадвал нишон додашуда, роҳ надиҳад;
з) нақшаҳои чорабиниҳои ташкилию техникиро доир ба сарфакории қувва, беҳтар кардани истифодабарии гармӣ, зиёд кардани бозгардонии конденсат, баланд бардоштани сифати он, истифодаи захираҳои фаръии энергетикӣ бо дарназардошти дастурҳои аз тарафи Бозрасии давлатӣ ва ташкилоти таъминкунандаи гармӣ додашаванда, инчунин паст кардани ҳарорати оби баргарданда таҳия ва татбиқ намояд;
и) балансҳои буғ ва конденсати корхонаро дар маҷмӯъ ва дастгоҳҳои алоҳидаи гармидиҳӣ, ҳамчунин ҳуҷҷатҳоро оид ба гармирасонии устувори корхона тартиб диҳад;
к) нақшаҳои иҷроия ва паспорти ҳамаи шабакаҳои гармӣ ва дастгоҳҳои истифодакунандаи гармӣ, инчунин дастуруламалҳои истеҳсолиро оид ба истифодаи онҳо дошта бошад;
л) воситаҳои автоматии шабакаҳои гармӣ ва дастгоҳҳои истифодакунандаи гармиро ҷорӣ намояд, дар мӯҳлатҳои муайяншуда таъмири нақшавии воситаҳои автоматиро гузаронад;
м) хизматрасонии системаи гармирасониро тавассути корманди таълимдида таъмин намояд, дониши ӯро давра ба давра санҷад;
н) дар ҳолатҳои садама қитъаи харобшударо ба таври оперативӣ аз шабака қатъ намояд, онро пешакӣ бо ташкилоти таъминкунанда мувофиқа кунад, инчунин таъмири онро ба таври таъҷилӣ бо қувва ва маблағи худ таъмин намояд, оид ба пешгирии ҳодисаҳои бо сабаби яхбандӣ вайрон шуда, аз кор баромадани дастгоҳҳои системаи гармиистифодабарӣ тадбирҳо андешад;
о) o)системаи гармиистифодабарии таъмиршуда ё қисмҳои алоҳидаи онро баъди таъмири нақшавӣ ва садамавӣ, инчунин объектҳои навро бо иҷозат ва иштироки намояндаи ташкилоти таъминкунанда ба кор андозад;
п) дар хатти интиқоли гармӣ ба сохтмон, ҷамъ кардани масолеҳ, шинондани дарахт дар масофаи камтар аз 5 м аз хатҳои интиқоли гармӣ, бе иҷозати ташкилоти таъминкунанда анҷом додани корҳои заминканӣ, инчунин дар биноҳое, ки аз онҳо хатти асосии интиқоли гармӣ мегузарад, қарор доштани одамон роҳ надиҳад;
p)дар ҳама лаҳзаи шабонарӯз барои назорат аз болои низоми истифодабарии қувваи гармӣ, истифодаи оқилонаи он, ҳолати техникӣ ва истифодаи системаи истифодабарии гармӣ намояндагони мақомоти назорати гармиро аз рӯи ҳуҷҷатҳои хизматии онҳо бемамониат роҳ диҳад;
с) ба ҳудуди корхона кормандони ташкилоти таъминкунандаи гармиро барои гузаронидани корҳои таъмир ва сохтмони шабакаҳои гармӣ бемамониат роҳ диҳад. Ташкилоти таъминкунандаи гармӣ вазифадор аст, ки баъд аз анҷоми корҳо ҳудуд ва биноҳоеро, ки дар он ҷой корҳо иҷро карда шудаанд, аз ҳисоби худ ба тартиб дарорад;
т) дар мӯҳлатҳои муқарраршуда дастурҳои намояндаи назорати энергетикиро дар бораи бартараф намудани камбудиҳои дар сохтор, истифода ва хизматрасонии системаи истифодабарии гармӣ, инчунин дар истифодаи қувваи гармӣ ҷойдошта иҷро намояд;
у) ба ташкилоти таъминкунандаи гармӣ аз рӯи намуна ва мӯҳлатҳои муқарраршуда дар бораи иҷрои меъёрҳои сарфи гармӣ, инчунин ҷадвалҳои мушаххаси шабонарӯзии истифодабарии гармӣ ҳисобот пешниҳод намояд.
6. Назорати давлатии энергетикӣ аз болои системаи гармиистифодабарии муштариён
6.1.Назорати давлатӣ аз болои системаи гармиистифодабарии муштариён, сарфи назар аз тобеияти идории онҳо, аз тарафи Назорати давлатии гармии Ширкати давлатии саҳомию холдингии «Барқи Тоҷик» анҷом дода мешавад.
6.2.Мақомоти назорати давлатии гармӣ дар асоси «Низомномаи назорати давлатии гармӣ», ки бо қарори Ҳукумати Ҷумҳурии Тоҷикистон аз 17 октябри соли 1996 № 465 тасдиқ шудааст, амал мекунанд.
6.3.Иҷрои назорати давлатии гармӣ вазоратҳо, идораҳо, ташкилотҳои кишоварзӣ ва манзилу коммуналиро аз назорат кардани ҳолати техникӣ ва истифодаи системаи гармиистифодакунӣ дар корхонаҳо ва ташкилотҳои тобеи онҳо озод намекунад, масъулиятро аз зиммаи ташкилоту корхонаҳо дар мавриди риояи «Қоидаҳои истифодабарии техникии дастгоҳҳои гармиистифодабарӣ ва шабакаҳои гармӣ», «Қоидаҳои истифодабарии техникии дастгоҳҳои гармиистифодакунанда ва шабакаҳои гармии муштариён, инчунин «Қоидаҳои истифода бурдани қувваи гармӣ» ва дигар ҳуҷҷатҳои директивӣ кам намекунад.
7.Шартҳои қатъ ва кам кардани қувваи гармӣ
7.1.Додани қувваи гармӣ дар асоси шартномаи дар байни истифодакунанда ва ташкилоти таъминкунандаи гармӣ басташуда анҷом дода мешавад.
Кам ва қатъ кардани истифодакунандагон бо тартиби муқарраркардаи дастуруламали махсусе, ки ташкилоти таъминкунандаи гармии «Тоҷикгосэнергонадзор» таҳия кардааст, гузаронда мешавад.
7.2.Ташкилоти таъминкунандаи гармӣ ҳақ дорад, ки истифодакунандаро пешакӣ огоҳ карда, дар ҳолатҳои зерин додани гармиро пурра ва ё қисман қатъ намояд:
а) дар мӯҳлатҳои муқарраршуда напардохтани арзиши қувваи гармии истифодашуда;
б) худсарона ба шабакаи гармӣ пайваст карда шудани муштариён, цехҳо ва дастгоҳҳои нав ё қисматҳои алоҳидаи онҳо, инчунин худсарона ба шабакаи гармӣ пайваст намудани муштариёни фаръии ташкилотҳои дигар;
в) бе иштироки нозири «Тоҷикгосэнергонадзор» ба кор даровардани системаи истифодаи қувваи гармӣ;
г) пайваст кардани системаи истифодаҳои қувваи гармӣ пеш аз асбобҳои баҳисобгирӣ;
д) исрофкории қувваи гармӣ, дуздидани он, ба ифлосшавӣ ва камшавии оби шабака роҳ додан;
е) ҳолати ғайриқаноатбахши системаҳои истифодаи қувваи гармӣ, ки хавфи садама дошта, барои ҳаёти коргарони хизматрасон хатарнок аст;
ж) нисбат ба нақшаи дар шартнома муқарраршуда барзиёд истифода карда шудани қувваи гармӣ дар соатҳои бори ҳадди аксар бе иҷозати ташкилоти таъминкунандаи гармӣ ё дар ҳолате, ки ҳарорати оби пасгардандаи шабака нисбат ба нишондоди ҷадвал ба андозаи 3 С зиёд аст;
з) бозгардондани камтар аз 90% миқдори конденсати дар шартнома пешбинишуда;
и) набудани мутахассиси хизматрасони системаи истифодабарии қувваи гармӣ;
к) иҷозат надодани намояндаи ташкилоти таъминкунандаи гармӣ ва нозири «Тоҷикгосэнергонадзор» ба системаи истифодаи қувваи гармӣ ё ба назди асбобҳои баҳисобгирандаи қувваи гармӣ.
7.3.Ҳангоми мавҷуд набудани манбаи таъминоти эҳтиётӣ барои гузаронидани таъмири нақшавии дастгоҳҳо ва пайваст намудани истифодакунандагони нав ташкилоти таъминкунандаи гармӣ бояд дар шартнома барои гузаронидани ин корҳо миқдор ва давомнокии қатъ кардани истифодабарии қувваи гармиро пешбинӣ намояд.
Огоҳ кардани истифодакунанда дар бораи қатъи қувваи гармӣ 10 рӯз пеш барои мувофиқа кардани санаи муайяни (рӯз ва соат) танаффус дар додани қувваи гармӣ сурат мегирад. Агар истифодакунанда дар муддати 5 рӯзи баъд аз гирифтани огоҳинома вақти қатъ карданро мувофиқа накунад, ташкилоти таъминкунандаи гармӣ ҳақ дорад, ки худаш ин вақтро муайян намояд.
Танаффус дар додани қувваи гармӣ бояд бо огоҳ кардани истифодакунанда аз ин кор на кам аз 24 соат пеш аз қатъ кардан анҷом дода шавад.
7.4.Барои қабул кардани чораҳои фаврӣ дар мавриди пешгирӣ ё бартараф намудани садама ташкилоти таъминкунандаи гармӣ ҳақ дорад, ки системаи гармиистифодабарии муштариёнро қатъ намояд ва баъд аз ин ба ӯ сабаби қатъ гардонданро хабар диҳад.
8.Масъулияти ташкилоти таъминнунандаи қувваи гармӣ
8.1.Ташкилоти таъминкунандаи гармӣ вазифадор аст, ки дар асоси шартнома ба истифодакунанда, қувваи гармӣ диҳад, параметрҳои ҳомили гармиро (буғ ва оби гарм), ки аз коллекторҳои манбаи гармӣ дода мешавад, тибқи шартнома нигоҳ дорад, ба инҳирофот аз меъёрҳои параметрҳои буғ зиёда аз + —10 С нисбат ба меъёри дар шартнома нишон додашуда роҳ надиҳад.
Ташкилоти таъминкунандаи гармӣ вазифадор аст, ки ҳарорати оби аз шабака додашавандаро мутобиқи ҷадвали муқарраршуда нигоҳ дорад, ба каму зиёд шудани ҳарорати об роҳ надиҳад, майли ҳарорати об бояд аз + — 10 С зиёд набошад, дар ин сурат ҳарорат ҳамчун ҳисоби миёнаи ҳарорати шабонарӯзӣ шуморида мешавад.
Инҳирофи ҷоиз аз шартҳои дар шартнома зикршудаи миқдори гармии ба истифодакунанда дар давоми шабонарӯз дар шакли буғ ё оби гарм додашаванда набояд аз 10% зиёд бошад.
8.2.Дар сурати бо айби ташкилоти таъминкунандаи гармӣ паст шудани параметрҳои ҳомили барои мақсадҳои технологӣ додашаванда ба андозаи камтар аз нишондоди дар банди 8.1. овардашуда ташкилоти таъминкунандаи гармӣ ба истифодакунанда ба андозаи 25% арзиши қувваи гармии бо параметрҳои паст додашуда ҷарима месупорад.
8.3.Ҳангоми бо айби ташкилоти таъминкунандаи гармӣ паст шудани параметрҳои буғи барои мақсадҳои технологӣ додашаванда зиёда аз 25% нисбат ба параметрҳои дар шартнома зикршуда истифодакунанда ҳақ дорад, ки ташкилоти таъминкунандаи гармиро пешакӣ огоҳ карда, истифодаи гармиро қатъ намояд.
Дар ин ҳолат ташкилоти таъминкунандаи гармӣ дар назди истифодакунанда мутобиқи банди 8.4. ҷавобгар аст.
8.4.Агар бо айби ташкилоти таъминкунандаи гармӣ дар таъмини гармӣ танаффус ба вуҷуд ояд, он гоҳ ташкилоти мазкур ба андозаи 3-каратаи арзиши гармии доданашуда аз рӯи шартҳои шартнома ба истифодакунанда ҷарима месупорад.
8.5.Вақти кам кардани истифодаи гармӣ ва сабаби кам додани он аз рӯи нишондоди асбобҳои бақайдгирӣ дар ҳудуди тақсимоти шабакаҳои гармӣ ва сабти воқеии аввал ва охири вақти камкунӣ дар китоби оперативии хизмати диспетчерии ташкилоти таъминкунандаи гармӣ ё муҳандиси навбатдори истгоҳи гармӣ (дегхона)-и, ки қувваи гармӣ медиҳад, муайян карда мешавад.
Бо айби ташкилоти таъминкунандаи гармӣ барои эҳтиёҷи технологии истифодакунанда кам додани гармӣ ҳар шабонарӯз аз рӯи нишондоди асбобҳои баҳисобгирӣ ҳамчун фарқи байни нишондоди се шабонарӯзи охири пеш аз камкунӣ ва истифодаи воқеии гармӣ дар ҳамон шабонарӯзҳое, ки гармӣ кам дода шудааст, муайян карда мешавад.
Эзоҳ: 1. Ҳангоми муайян намудани ҳисоби миёнаи шабонарӯзии истифодаи гармӣ дар 3 шабонарӯзи пеш аз камкунӣ рӯзи истироҳат дохил карда намешавад.
2.Дар ҳолате ки пурра надодани қувваи гармӣ ба рӯзи истироҳат рост меояд, он ҳамчун фарқи байни ҳисоби миёнаи шабонарӯзии истифодабарии гармӣ дар 3 рӯзи истироҳати пешгузашта ва истифодаи воқеии он дар рӯзи истироҳат, дар муддате, ки камкунӣ роҳ дода шудааст, муайян карда мешавад.
3.Ҳодисаҳои садама, танаффуси маҷбурӣ ё дигар чорабиниҳое, ки бо истифодакунанда мувофиқа нашудаанд ва дар шартнома пешбинӣ нагардидаанд, айби ташкилоти таъминкунандаи гармӣ ҳисобида мешавад.
8.6.Ташкилоти таъминкунандаи гармӣ барои камшавии параметрҳои ҳомили гармӣ ва пурра надодани қувваи гармӣ, ки бо ҳолатҳои форс мажорӣ ва сабабҳои зер ба амал омадааст, дар назди истифодакунанда масъулияти моддӣ надорад:
а) офатҳои табиат: раъду барқ, тӯфон, обхезӣ, заминларза, сӯхтор, хунукии давомнок, ки ҳарорати ҳаво бештар аз 48 соат ба андозаи 3оС камтар ва зиёдтар нисбат ба ҳарорати бо лоиҳаи гармидиҳӣ дар ҳамин маҳал пешбинишуда нигоҳ дошта мешавад;
б) амали нодурусти коргарони истифодакунанда ё шахсони бегона (вайрон кардани қубурҳои об ва буғ);
в) шартҳои камкунӣ ё қатъ намудани гармидиҳӣ, ки дар банди 7.1. ҳамин Қоидаҳо пешбинӣ шудаанд.
8.7.Ташкилоти таъминкунандаи гармӣ барои бо параметрҳои паст додани гармӣ дар ҳамон шабонарӯзҳое, ки дар давоми онҳо истифодакунанда қувваи гармиро нисбат ба меъёри дар шартнома (лимит) нишон додашуда бештар истифода кардааст ё низоми барои ӯ муқарраршудаи истифодаи қувваи гармиро риоя накардааст, дар назди истифодакунанда масъулияти моддӣ надорад.
8.8.Ташкилоти таъминкунандаи гармӣ дар муддати 6 моҳи ба шабакаҳои гармӣ пайваст намудани истифодакунанда барои додани қувваи гармӣ бо парометрҳои паст ё барои пурра надодани қувваи гармӣ аз истгоҳҳои барқӣ ё шабакаҳои гармӣ, ки дар истифодаи муваққатӣ қарор доранд, дар назди истифодакунанда масъулияти моддӣ надорад.
8.9.Ташкилоти таъминкунандаи гармӣ аризаи истифодакунандаро дар бораи пурра надодани қувваи гармӣ дар муддати 10 рӯзи баъди гирифтани он баррасӣ намуда, дар муддати мазкур мутобиқи ҳамин Қоидаҳо ҷарима месупорад.
8.10.Истифодакунандаи қувваи гармӣ барои аз меъёри дар шартнома нишондодашуда барзиёд истифода бурдани қувваи гармӣ ба ташкилоти таъминкунандаи гармӣ ба андозаи 5-каратаи арзиши қувваи гармии барои давраи дахлдор пешбинишуда музд месупорад.
9.Ҳисоббаробарнунӣ барои истифодаи қувваи гармӣ
9.1.ТАРИФҲО БАРОИ ҚУВВАИ ГАРМӢ
9.1.1.Ҳисоббаробаркунӣ бо истифодакунандагони қувваи гармӣ тибқи тарифҳои амалкунанда (Нархномаи № 09-01) дар асоси нишондоди асбобҳои баҳисобгирандаи қувваи гармӣ ва бо роҳи дар шартнома нишон додашудаи ҳисобкунӣ анҷом дода мешавад.
9.1.2.Тарифҳои Нархномаи № 09-01 ба қувваи гармии ба истифодакунандагон ҳам бевосита ва ҳам ба воситаи муштариёни харидафурӯш ва муштариёни системаҳои энергетикӣ, дегхонаҳои ноҳиявӣ ва дигар ташкилотҳои таъминкунандаи гармии Ширкати давлатии саҳомию холдингии «Барқи Тоҷик» додашаванда татбиқ мегарданд.
9.1.3.Тарифҳои Нархномаи № 09-01 ба ҳисобу китоби ташкилотҳои манзилу коммуналӣ (идораҳои истифодабарии манзил, идораи хонаҳо ва ғ.) бо аҳолӣ татбиқ намегарданд.
9.1.4.Барои истифодакунандагоне, ки қувваи гармиро (буғ, оби гарм) барои гарм кардан, таҳвия, эҳтиёҷоти технологӣ мегиранд. Нархномаи № 09-01 тарифҳои якставкагӣ муқаррар кардааст. Барои буғи ба истифодакунандагон додашаванда аз рӯи параметрҳои ҳомили гармӣ тарифҳои инфиродӣ (интихобӣ, тез ва буғи кам кардашуда) муқаррар шудаанд. Параметрҳои буғи интихобшудаи дар Нархнома овардашуда (зидди фишор) барои турбинаҳои буғ номиналӣ мебошанд. Пасту баландшавии параметрҳои буғ дар доираи танзимшаванда тарифро тағир намедиҳад.
9.1.5.Бо мақсади истифодаи пурсамари қувваи гармӣ ва бозгашти ҳадди аксари конденсат тарифҳо барои қувваи гармии ба истифодакунанда додашаванда (дар шакли буғ ва оби гарм) аз рӯи бозгашти пурраи (100%) конденсат (оби шабака) муқаррар шудаанд ва хароҷот барои об ва аз ҷиҳати химиявӣ тайёр кардани онро ҳангоми аз тарафи муштариён пас нагардондани конденсат ё гирифтани оби гарм аз системаи кушода ва маҳками таъминоти оби гарм ба ҳисоб намегиранд.
Истифодакунандагони буғ ё оби гарм хароҷоти ташкилоти таъминкунандаи гармиро барои об ва аз ҷиҳати химиявӣ тайёр намудани он аз рӯи тарифи муқаррарнамудаи Ширкати давлатии саҳомию холдингии «Барқи Тоҷик» мепардозанд.
9.1.6.Ба истифодакунандагони харидафурӯш, ташкилотҳои ҳисоби хоҷагие, ки ба ШДСҲ «Барқи Тоҷик» тобеъ нестанд (ё бахшҳои ҳисоби хоҷагии онҳо) ва дар баланси худ шабакаи гармии истифодабарандаи онро доранд, хариди яклухт ва фурӯхтани қувваи гармӣ аз ташкилоти таъминкунандаи барқ барои истифодакунандагони гуногун: ташкилотҳо, муассисаҳо ва корхонаҳо гирифташуда, до хил мешаванд.
9.1.7. Корхонаҳои саноатӣ ва дигар корхонаҳое, ки қувваи гармиро асосан барои эҳтиёҷоти худ (муштариён) гирифта, қисман онро ба воситаи шабакаҳои худ ба дигар ташкилотҳо, муассисаҳо ва корхонаҳо (муштариёни фаръӣ), ки бо системаи энергетикӣ муносибатҳои шартномавӣ надоранд, медиҳанд, ба истифодакунандагони харидафурӯш дохил намешаванд.
9.1.8.Қувваи гармии дар шабакаҳои асосии истифодакунандагон (муштариён) камшуда дар байни онҳо ва муштариёни фаръӣ мутаносибан бо ҳиссаи истифодашудаи қувваи гармӣ ва дарозии шабакаи гармӣ тақсим карда мешавад.
9.1.9.Хароҷоти аз ҷиҳати химиявӣ тайёр кардани об дар истгоҳи барқию гармӣ (ТЭЦ), ҳангоми боз нагардондани конденсат аз тарафи истифодакунандагон ё гирифтани оби гарм аз системаи кушода ва маҳками таъминоти об ба тарифҳо барои қувваи гармӣ дохил намешаванд. Аз ин рӯ истифодакунандагон ғайр аз пардохти қувваи гармӣ аз рӯи тариф, инчунин барои буғ ва оби гарм хароҷоти ташкилоти таъминкунандаи барқро, ки бо бозгашт нашудани конденсат ё оби гарм аз рӯи тарифи дар ташкилоти таъминкунандаи гармӣ барои аз ҷиҳати химиявӣ тайёр намудани об ва таҳияи оби бенамак вобаста аст, мепардозанд.
9.1.10.Ташкилоти таъминкунандаи гармӣ метавонад, ки як қисми арзиши қувваи гармии истифодашударо дар шакли маҳсулоти истеҳсолшаванда (дар асоси созишномаи ҷудогона, ки ба шартнома замима мешавад) гирад.
Корхонаҳое, ки дар асоси моликияти давлатҳои хориҷӣ, ташкилотҳои байналхалқӣ, шахсони ҳуқуқӣ ва воқеӣ бунёд ёфтаанд, ҳамчунин корхонаҳои муштараке, ки дар фонди муқарраршудаи онҳо инвестицияҳои хориҷӣ 10% ва аз ин зиёдро ташкил медиҳанд, арзиши қувваи гармии истифодакардаашонро, агар бо шартномаи байналхалқӣ (созишнома) тартиби дигар муқаррар нашуда бошад, аз рӯи нархҳои ҷаҳонӣ мепардозанд.
9.2.МУАЙЯН НАМУДАНИ МИҚДОРИ ҚУВВАИ ГАРМӢ ДАР ШАКЛИ БУҒ, КИ БА ИСТИФОДАКУНАНДАГОН ДОДА МЕШАВАД ВА ТАРТИБИ ҲИСОББАРОБАРКУНӢ
9.2.1.Миқдори қувваи гармӣ дар гигакалорияҳои ба истифодакунандагон додашуда дар ҳудуди ҷудошавии шабакаҳои гармии ташкилоти таъминкунандаи гармӣ ва истифодакунанда ба ҳисоб гирифта мешавад.
Ҳудуди тақсимот мувофиқи тобеияти баланси шабакаҳои гармӣ муайян гардида, дар шартнома сабт карда мешавад.
Ҳамаи хароҷот оид ба интиқол ва камшавии қувваи гармӣ то ҳудуди тақсимоти шабакаҳои ташкилотӣ таъминкунандаи гармӣ ва истифодакунанда дар тарифҳо ба ҳисоб гирифта мешавад ва пардохти иловагии зиёда аз тарифҳоро талаб намекунад.
Ҳамаи хароҷот ва камшавии қувваи гармӣ баъд аз ҳудуди тақсимоти шабакаҳо ба ҳисоби истифодакунанда мансуб аст.
9.2.2.Миқдори қувваи гармии дар шакли буғ ба истифодакунанда додашаванда ҳамчун миқдори буғи истеҳсолшуда барои таъминоти гармии ӯ, ки бо параметрҳои муқарраршуда истеҳсол шуда, дар шартнома зикр шудааст, муайян карда мешавад.
Дар ин ҳолат миқдори гармии дар баромади оби манбаи таъминот ҳосилшуда ба ҳисоб гирифта мешавад.
Миқдори қувваи гармие, ки бо конденсат аз тарафи истифодакунанда бозгардонда мешавад, ҳамчун миқдори конденсати хосилшудаи дар гармиғунҷоиш ва ҳарорат бо дарназардошти гармии дар оби бароянда мавҷуда, муайян карда мешавад.
Андозаи пардохти истифодакунанда барои конденсати бозгардондашуда мувофиқи Шартнома бо дарназардошти гармӣ аз рӯи арзиши аслии сӯзишвории ҷамъшудаи 1 Гкал гармии ташкилоти таъминкунандаи гармӣ муайян карда мешавад.
9.2.3.Дар шартномаҳои байни ташкилоти таъминкунандаи қувваи гармӣ ва истифодакунанда барои додани қувваи гармӣ ба ҳар як намуд ва параметри гарминигоҳдорӣ бори ҳадди аксари яксоата, инчунин моҳона, семоҳа ва солонаи ба истифодакунанда додани қувваи гармӣ муқаррар карда мешавад.
Барои бе иҷозати ташкилоти таъминкунандаи қувваи гармӣ нисбат ба миқдори дар шартнома муқарраршудаи бори ҳадди аксари соатинаи ҳар як параметри ҳомили гармӣ барзиёд истифода намудани қувваи гармӣ дар шакли буғ ва оби гарм, истифодакунанда ба ташкилоти таъминкунандаи гармӣ миқдори аз меъёр зиёд истифодашудаи қувваи гармиро ба андозаи 5 каратаи арзиш, бо дарназардошти тариф, пардохт мекунад.
9.2.4.Агар дар истгоҳҳои барқӣ ҳангоми мавҷуд будани иқтидори миқдори зарурии буғи интихобӣ набошад ва ташкилоти таъминкунандаи гармӣ бо ин сабаб барои қонеъ гардондани эҳтиёҷоти истифодакунанда ба таври иловагӣ буғи тез диҳад, он гоҳ ҳисоббаробаркунӣ бо истифодакунанда ба таври ҷудогона - барои буғи интихобӣ ва буғи тез анҷом дода мешавад. Дар сурати аз тарафи истифодакунанда рад карда шудани истифодабарии буғи тез шартнома барои додани қувваи гармӣ дар шакли буғ танҳо ба ҳамон миқдори буғи интихобӣ баста мешавад, ки истгоҳи барқӣ имконияти бо ин буғ таъмин кардани истифодакунандаро дошта бошад.
Агар дар истгоҳи барқӣ турбина бо буғи интихобии зарурӣ мавҷуд набошад, истгоҳи барқӣ маҷбур аст, ки барои қонеъ гардондани талаботи истифодакунанда буғи интихобиро то параметрҳои зарурӣ гарм кунад. Ҳисобу китоби ин гуна буғ монанди буғи тез анҷом дода мешавад.
9.2.5.Дар ҳолати бе ризоияти истифодакунанда ба вай ба ҷои буғи интихобӣ додани буғи тез ё буғи камкардашуда, ки дар шартнома пешбинӣ шудааст, ҳисоббаробаркунӣ бо истифодакунанда аз рӯи тарифи барои буғи интихобӣ муқарраршуда анҷом дода мешавад.
9.2.6.Ҳангоми аз тарафи истифодакунанда ба истгоҳи гармӣ баргардондани буғи фишурда ташкилоти таъминкунандаи гармӣ барои буғи қабулшуда аз рӯи арзиши барои буғи интихобии параметрҳои дахлдор муқаррашуда ва мувофиқи Нархномаи № 09-01 бо коэффициенти 0,5 музд мепардозад.
9.2.7.Ҳангоми аз тарафи истифодакунанда ошкор карда шудани нодурустӣ дар нишондоди асбобҳои назоратию андозагирӣ ё дар ҳисоби қувваи гармӣ, истифодакунанда бояд дар муддати як ҳафта дар ин бобат ба ташкилоти таъминкунандаи гармӣ хабар диҳад.
Ташкилоти таъминкунандаи гармӣ вазифадор аст, ки дар муддати 10 рӯз (аз рӯи воридшавии аризаи истифодакунанда) асбобҳои назоратию андозагирӣ ё дуруст будани ҳисобҳои асбобҳои мазкурро тафтиш карда, аз натиҷааш истифодакунандаро огоҳ созад.
9.2.8.Дар ҳолати нодуруст будани нишондоди асбобҳои назоратию андозагирӣ ташкилоти таъминкунандаи қувваи гармӣ вазифадор аст, ки сарфи қувваи гармиро дар давраи охирини ҳисоботӣ аз нав ҳисоб кунад.
Аз нав ҳисоб кардан дар асоси нишондоди асбобҳои дуруст кардашуда ё аз нав насбшуда барои давраи охирини баҳисобгирӣ анҷом дода мешавад. Дар ин ҳолат ҳуҷҷати навбатии пардохт бо дарназардошти истифодаи гармӣ дар давраи ҳисоботии ҷорӣ навишта мешавад.
9.2.9.Инҳирофот дар нишондоди асбобҳои назоратию андозагирӣ дар сурате дуруст ҳисоб карда мешаванд, ки онҳо аз меъёрҳои муқаррарнамудаи мақомоти стандарти давлатӣ зиёд набошанд.
Агар сарфи ҳомили гармӣ аз рӯи нишондоди асбоб аз 30% андозаи ҳадди аксари ҷадвал камтар бошаду асбобҳои баҳисобгирандаи сарфи камтарин низ мавҷуд набошанд, дар мавриди ҳисоббаробаркунӣ сарфи ба 30% баробари андозаи ҳадди аксари ҷадвали асбоб ҳамчун асос қабул карда мешавад.
9.2.10.Дар бораи гузаронидани тафтиши ҳолати асбобҳои назоратию андозагирӣ ариза додан истифодакунандаро аз пардохти арзиши қувваи гармии истифодашуда дар муҳлати муайянгардида озод намекунад.
9.2.11.Барои худсарона пайваст намудани системаи гармиистифодакунӣ ё пайваст кардани онҳо пеш аз нуқтаҳои насби асбобҳои баҳисобгирӣ истифодакунанда ба ташкилоти таъминкунандаи гармӣ арзиши 5-каратаи қувваи гармии истифодашуда, аз ҷумла гармии истифодабурдаи ин системаҳоро бо татбиқи тарифҳо мепардозад. Пардохт аз рӯзи санҷиши охирини истифодакунанда, барои дастгоҳҳои гармкунанда бошад, аз ибтидои мавсими гармидиҳӣ то лаҳзаи ошкор гардидани пайвасткунии худсаронаи асбобҳо, вале на зиёда аз мӯҳлати даъво, анҷом дода мешавад. Аз тарафи истифодакунанда имзо нашудани акт ӯро аз пардохти музд бо тартиби муқарраршуда озод намекунад.
9.3.МУАЙЯН НАМУДАНИ МИҚДОРИ ҚУВВАИ ГАРМИИ ДАР ШАКЛИ ОБИ ГАРМ БА ИСТИФОДАКУНАНДА ДОДАШУДА ВА ТАРТИБИ ҲИСОББАРОБАРКУНӢ
9.3.1.Миқдори қувваи гармии дар шакли оби гарм додашуда ҳамчун миқдори оби дар гармиғунҷоиши он истеҳсолшуда ва фарқи ҳарорати оби додашаванда ва баргардандаи шабака муайян карда мешавад.
Дар ҳолати кушода будани системаи тақсими об, миқдори қувваи гармии дар шакли оби гарм ба истифодакунанда додашуда, ҳамчун миқдори оби дар гармиғунҷоиши он истеҳсолшуда ва фарқи ҳарорати оби гарм (додашаванда) ва бароянда, ҳарорати оби бароянда ҳамчун ҳисоби миёнаи моҳона қабул карда мешавад.
9.3.2.Ҳангоми дар шакли оби гарм истифода кардани қувваи гармӣ истифодакунанда вазифадор аст, ки оби пасгардандаи шабакаро бо ҳарорати на зиёда аз андозаи дар Ҷадвал зикршуда бозгардонад.
Ҳарорати оби барои шабакаи гармӣ ва истифодакунанда додашаванда дар асоси пешгӯиҳои маркази обу ҳавосанҷӣ дар бораи ҳарорати ҳавои берунӣ ва тибқи ҷадвали ҳароратии танзимкунӣ аз тарафи системаи энергетикӣ муайян карда мешавад.
Танзим намудани гармидиҳӣ дар як шабонарӯз ҳангоме, ки фарқи ҳарорати берунии рӯзона нисбат ба ҳарорати шабона ба андозаи 8оС ва аз ин зиёд бошад, 2 маротиба ва дар вақти камтар аз 8оС будани фарқи ҳавои берунии рӯзона ва шабона - 1 маротиба гузаронида мешавад.
Дар вақти танзим намудан бояд имконияти дар шаб паст кардани ҳарорати оби додашаванда, ки барои эҳтиёҷоти маишӣ ва дар системаи гармкунии биноҳои ҷамъиятӣ истифодашаванда, инчунин оид ба кам кардани истифодаи вай дар корхонаҳои саноатӣ дар рӯзҳои ғайрикорӣ дар назар дошта шавад.
9.3.3.Ҳангоми аз тарафи истифодакунанда зиёд карда шудани ҳарорати миёнаи шабонарӯзии оби пасгардандаи шабака ба андозаи бештар аз 5оС нисбат ба нишондоди ҷадвал, ташкилоти таъминкунандаи гармӣ ба шарти риоя намудани ҳисоби миёнаи шабонарӯзии оби аз шабака додашаванда бо инҳирофи на зиёда аз +—5оС ҳақ дорад, ки додани қувваи гармиро кам кунад ё ба истифодакунанда додани онро тамоман қатъ намояд ё ки ҳисобро барои гармии додашуда мувофиқи камузиёдшавии ҳарорат, ки дар ҷадвал барои истифодакунанда пешбинӣ шуда, аз тарафи системаи энергетикӣ ва замима ба шартнома дар назар дошта шудааст, ҳисобӣ кунад.
9.3.4.Қувваи гармие, ки ба истифодакунанда зиёда аз миқдори дар ҷадвал муқарраашуда дода шудааст, ҳангоми нисбат ба ҷадвал ба андозаи аз 5оС зиёдтар будани оби додашавандаи шабака аз тарафи истифодакунанда пардохт карда намешавад, ба шарте ки дар ин бобат дар байни истифодакунанда ва ташкилоти таъминкунанда мувофиқа ҳосил шуда бошад.
Истифодакунандае, ки гармии аз истгоҳи барқӣ гирифтаашро барои иҷрои ягон чорабинӣ истифода мекунад ва ба ин восита ҳарорати оби пасгардандаи шабакаро нисбат ба нишондоди ҷадвал пасттар мегардонад, барои истифода бурдани ҳамон миқдоре, ки аз ҳисоби пастшавии ҳарорат истифода кардааст, ба ташкилоти таъминкунандаи барқӣ музд намепардозад.
9.3.5.Ҳангоми кушода будани системаи таъминот бо оби гарм, агар андозаи тақсимоти об аз миқдори иҷозатдодашуда ва дар шартнома зикршуда зиёд набошад, истифодакунанда вазифадор аст, ки арзиши оби барояндаи гирифтаашро бо хароҷоти тозакунии химиявии об аз рӯи тарифи муқарраркардаи Ширкати давлатии саҳомию холдингии «Барқи Тоҷик» ба таври иловагӣ пардозад.
9.3.6.Ҳангоми аз тарафи истифодакунанда нисбат ба миқдори дар шартнома нишондодашуда зиёд кардани ҳаҷми тақсимоти об ё зиёд намудани сарфи оби шабака нисбат ба миқдори дар шартнома муқаррашудаи ҳадди аксари яксоата ё ҳангоми худсарона тақсим намудани оби шабака, истифодакунанда вазифадор аст, ки арзиши 5-каратаи об, аз ҷумла арзиши тарифиро вобаста ба паст шудани курби рубл ба ташкилоти таъминкунандаи қувваи барқ пардозад.
Камшавии зиёда аз меъёри ҳомили гармӣ аз тарафи ташкилоти таъминкунандаи гармӣ муайян ва дар акти дар ҳузури истифодакунанда тартибдодашуда зикр карда мешавад. Истифодакунанда барои давраи тафтиши охирин, вале на зиёда аз мӯҳлати даъво, музд мепардозад.
Ба акт имзо нагузоштан истифодакунандаро аз пардохти музд мувофиқи тартиби муқарраршуда озод намекунад.
9.3.7.Ҳангоми кушода будани системаи таъминот бо оби гарм, агар ҳаҷми тақсимоти об аз меъёри муқарраршудаи дар шартнома қайдшуда зиёд набошад, истифодакунанда вазифадор аст, ки арзиши оби барояндаи гирифтаашро бо хароҷоти тозакунии химиявии он, аз рӯи тарифе, ки аз тарафи ташкилоти таъминкунанда барои тозакунии химиявӣ ва оби бенамак муайян шудааст, пардозад.
9.4.МУАЙЯН НАМУДАНИ МИҚДОРИ КОНДЕНСАТИ АЗ ТАРАФИ ИСТИФОДАКУНАНДАГОН БОЗГАРДОНДАШАВАНДА ВА ТАРТИБИ ҲИСОББАРОБАРКУНӢ
9.4.1.Ҳангоми дар шакли буғ барои гармкунӣ, тозакунии ҳаво ва таъминот бо оби гарм истифода кардани қувваи гармӣ истифодакунандагон вазифадоранд, ки на кам аз 95% конденсат ва дар вақти ба мақсадҳои технологӣ истифода бурдани буғ - аз рӯи миқдор ва сифати дар шартнома зикршударо ба ташкилоти таъминкунандаи гармӣ бозгардонанд.
Меъёри бозгардонии конденсат дар вақти бастани шартнома мувофиқи фоизи буғи истифодашаванда ва сифати он аз ҷониби тарафҳо муайян карда мешавад.
Миқдори конденсати аз тарафи истифодакунанда - ба истгоҳи барқӣ бозгардондашаванда дар асоси маълумоти лоиҳавии системаи истифодабарии гармӣ, баланси конденсати буғи ташкилот ва бо дарназардошти натиҷаҳои бадастомадаи бозгардондани конденсат, инчунин захираҳои мавҷуда муқаррар карда мешавад.
Ташкилоти таъминкунандаи гармӣ ҳақ дорад, ки мувофиқи тартиби муайянкардаи «Тоҷикгосэнергонадзор» иҷрои чорабиниҳои марбут ба зиёдшавии бозгардонии конденсат ва муқаррар намудани мӯҳлати иҷрои ин чорабиниҳоро ба истифодакунанда пешниҳод намояд.
9.4.2.Конденсати аз тарафи истифодакунанда бозгардондашаванда бояд ба миқдор ва сифати дар шартнома зикршуда мувофиқ бошад.
Миқдор ва сифати конденсати бозгардондаи истифодакунанда дар истгоҳи гармӣ (дегхона) муайян карда мешавад. Сифати конденсати истеҳсолии барои таъминоти дегҳои дар истгоҳҳои барқӣ мавҷуда (дегхонаҳо) истифодашаванда, ки тозакунаки конденсат надоранд ва ё тозакунак доранду он то меъёри оби таъминоти тоза кардани конденсатро таъмин карда наметавонад, бояд тавре бошад, ки омехтаи он бо дигар қисмҳои таркибӣ ба меъёри оби таъминотӣ барои ҳамон дегҳо мувофиқат дошта бошад.
Миқдори конденсати истеҳсолии барои таъминоти дегҳои дар истгоҳҳои барқии мавҷуда (дегхонаҳо) истифодашаванда, ки бо тозакунакҳои конденсати ҷиҳозонида шуда, то меъёри оби таъминоти тоза кардани ҳамаи конденсатро таъмин менамоянд ё барои истгоҳҳои барқии аз нав сохташаванда бояд ба талаботи дар «Меъёрҳои лоиҳакашии технологии истгоҳҳои барқию гармӣ ва шабакаҳои гармӣ» зикршуда мувофиқат дошта бошад.
9.4.3.Истифодакунандагоне, ки қувваи гармиро дар шакли буғ мегиранд, ғайр аз он ки қувваи гармии истифодакардаашонро аз рӯи тариф (Нархномаи №09-01) пардохт мекунанд, инчунин хароҷоти марбут ба боз нагардондани конденсатро ба ташкилоти таъминкунандаи барқ мепардозанд.
Истифодакунанда барои мувофиқи меъёри дар шартнома зикршуда боз нагардондани миқдори конденсати лозимӣ ба андозаи як баробар ва барои миқдори конденсати нисбат ба нишондоди шартнома зиёд истифодашуда арзиши даҳкаратаро бо истифодаи тарифи муқаррарнамудаи Ширкати давлатии саҳомию ҳолдингии «Барқи Тоҷик» мепардозад.
9.4.4.Дар ҳолатҳое, ки миқдори конденсати аз тарафи истифодакунанда бозгардондашаванда дар сурати риоя намудани сифати конденсати дар шартнома муқарраршуда нисбат ба уҳдадориҳои шартномавӣ зиёд аст, ташкилоти таъминкунандаи гармӣ аз маблағи умумии барои истифодаи қувваи гармӣ пардохтшаванда ба истифодакунанда дар хаҷми 2-каратаи арзиши конденсате, ки нисбат ба миқдори дар шартнома зикршуда зиёд бозгардонда шудааст, ба таври тахфиф имтиёз муқаррар мекунад.
Имтиёзи мазкур ба истифодакунанда аз ҳисоб ва дар ҳаҷми маблағе, ки барои дар давоми сол боз нагардондани конденсат ба даст омадааст, дода мешавад.
9.4.5.Ҳангоми ба истгоҳи барқӣ баргашта омадани конденсате, ки сифати он бо шартҳои шартнома мувофиқ нест, ташкилоти таъминкунандаи гармӣ ба миқдори бозгаштаи конденсат коэффициенти ислоҳшудаи зеринро ҷорӣ мекунад, дар ҳолати истифодаи конденсат барои таъминоти бухоркунандаҳо, тағирдиҳандаҳои бухор ё барои таъминоти дастгоҳҳои бухоркунанда ба андозаи 0,8 ва ҳангоми қабули конденсат барои то меъёри лозима тозакунӣ, обтозакунӣ - 0,5. Дар вақти мавҷуд набудани имконияти истифодаи конденсати ифлосшуда, он ба заҳбур (дренаж) рехта мешавад. Дар ин маврид чунин ҳисоб карда мешавад, ки истифодакунанда конденсатро боз нагардонидааст.
Миқдори қувваи гармӣ дар конденсати боз гардондашуда ҳамчунин аз рӯи миқдори аз тарафи ташкилоти таъминкунандаи гармӣ ба ҳисоб гирифташуда ҳисоб карда мешавад.
Ҳангоми зиёд будани ифлосии конденсат ба мақсад мувофиқ будани тозакунии он дар истгоҳҳои гармӣ (дегхона) ё тавассути дастгоҳҳои истифодакунанда дар асоси ҳисоби техникию иқтисодӣ муайян карда мешавад.
Зимнан дар ҳама ҳолатҳо аз нав тоза кардани конденсат аз ҳисоби истифодакунанда анҷом дода мешавад.
Конденсати бозгардонидашуда, ки аз рӯи сифат бо шартҳои шартнома мувофиқат намекунад ва дар истгоҳҳои гармӣ истифода нашудааст, баробар ба бозгардонда нашудани он мебошад.
9.4.6.Агар аз наздикии истифодакунанда шабакаҳои оби гарми ташкилоти таъминкунанда гузаранд, истифодакунанда вазифадор аст, ки бори гармкунӣ, таҳвия ва таъминоти оби гармро аз буғ ба оби гарм гузаронад.
9.4.7.Дар ҳолати дар байни ташкилоти таъминкунандаи гармӣ ва истифодакунанда пайдо шудани ихтилофи назар дар бораи миқдор ва сифати конденсати бозгардондашаванда, экспертизаи техникӣ гузаронида мешавад. Экспертизаи техникӣ аз тарафи истифодакунанда дар ҳайати намояндагони ҳарду тараф бо ҷалб намудани мутахассисони ташкилотҳои дигари ғайриманфиатдор дар мудлати на дертар аз 2 моҳи баъди ба расмият даровардани протоколи ихтилофи назар дар байни истифодакунанда ва ташкилоти таъминкунанда ҷамъ оварда мешавад.
Агар тарафҳо баъди гузаронидани экспертизаи техникӣ ба созиш наоянд, он гоҳ қарор дар бораи миқдор ва сифати конденсат аз тарафи Назорати давлатии барқи Ҷумҳурии Тоҷикистон қабул карда мешавад.
9.5. ТАРТИБИ ПЕШНИҲОД НАМУДАН ВА ПАРДОХТИ ҚУВВАИ ГАРМӢ
9.5.1.Ҳисоббаробаркунӣ барои қувваи гармии ба ташкилотҳои саноатӣ, истифодакунандагони харидафурӯш ва дигар муштариён додашаванда аз рӯи варақаҳои пардохти ташкилоти таъминкунандаи гармӣ бо тартиби беакцептӣ анҷом дода мешавад.
9.5.2.Ҳисоббаробаркунии истифодакунанда бо ташкилоти таъминкунанда барои қувваи гармӣ метавонад бо тартиби пардохтҳои нақшавӣ анҷом дода шавад.
Андозаи пардохтҳои нақшавӣ, мӯҳлатҳо ва шакли пардохт дар шартнома барои истифодаи қувваи гармӣ муайян карда мешаванд.
Пардохти нақшавӣ дар асоси ҳуҷҷатҳои пардохтӣ истифодакунанда ё талабномаи пардохти ташкилоти таъминкунанда (бо иҷозати роҳбари муассисаи бонк) анҷом дода мешавад.
Дар ҳолати дар мӯҳлати муайяншуда ба ҳисобномаи истифодакунанда нарасидани маблағ аз истифодакунанда (ҳангоми бо варақаҳои пардохт баробар кардани ҳисоб), ташкилоти таъминкунанда ҳақ дорад, ки аз пардохткунанда маблағи заруриро ба таври беакцептӣ бо роҳи ба бонк пешниҳод намудани ҳуҷҷатҳои пардохт рӯёнад.
9.5.3.Аз пардохткунандагоне (пардохткунандагони муттаҳидшуда), ки дар бонк суратҳисоб доранд, барои қувваи гармии истифодашуда баробари ба бонк расидани ҳувҷатҳои пардохт маблағ ба таври беакцептӣ, бо роҳи аз ҳисоби онҳо баровардани маблағи зарурӣ музд гирифта мешавад.
Ташкилоти таъминкунанда метавонад, ки бо мувофиқаи пардохткунанда бо як ҳуҷҷати пардохт арзиши барқ ва қувваи гармии истифодашударо якҷоя созад.
9.5.4. Камкунӣ ва зиёдкунӣ ба тарифи қувваи гармӣ барои бозгардонидани конденсат дар ҳисоби ҷамъбастӣ ба назар гирифта мешавад.
9.5.5.Дар сурати дар рӯзи дигар напардохтани ҳуҷҷатҳои пардохти ба бонк пешниҳодшуда, бо кадом сабабе, ки набошад, аз ҷумла бо сабаби дар суратҳисоби пардохткунанда набудани маблағ, ба маблағи дар ҳуҷҷати пардохт зикршуда ба ҳар як шабонарӯз то рӯзи пардохт ба андозаи 5% пеня зам карда мешавад.
9.5.6.Сарфи назар аз ҳуқуқи ситонидани пеня ташкилоти таъминкунанда ҳақ дорад, ки дар ҳолати напардохтани ҳуҷҷати пардохт аз рӯзи пешниҳоди он дар муддати чордаҳ рӯз додани гармиро баъди огоҳ кардан то пардохти қарз қатъ намояд.
Ин ҷазо ба ташкилотҳои саноатӣ, коммуналӣ ва нақлиёт аз тарафи ташкилоти таъминкунанда бо огоҳ намудани онҳо дар бораи кам кардан як рӯз ва дар бораи қатъ кардан се рӯз пеш истифода мегардад. Барои истифодакунандагони дигар қайдҳои дар варақаҳои пардохт сабтшуда ҳамчун огоҳӣ ба шумор меравад ва дар ин маврид огоҳии иловагии ташкилоти таъминкунанда лозим нест.
9.5.7.Ҳангоми додани қувваи гармӣ барои гарм кардан ва бо оби гарм таъмин намудани биноҳои истиқоматии фонди давлатии манзил, инчунин фонди манзили ташкилотҳои кооперативию ҷамъиятӣ, (аз ҷумла хонаҳои идораҳои сохтмон ва истифодабарии манзил) ташкилоти таъминкунанда ҳисоббаробаркуниро на бо соҳибхонаҳо, балки бо мақомоти хоҷагии манзилу коммуналие, ки истифодабарии фонди манзил ба зиммаи онҳост, анҷом медиҳад.
9.5.8.Имтиёзҳо барои истифодаи қувваи гармӣ ба истифодакунандагон тибқи асноди қонунгузории Ҷумҳурии Тоҷикистон аз рӯзи ба ташкилоти таъминкунанда пешниҳод намудани ҳуҷҷатҳои дахлдор муқаррар карда мешаванд.
ИСТИЛОҲОТИ АСОСИИ дар «Қоидаҳои истифодаи қувваи барқ ва гармӣ» истифодашаванда
Қабулкунандаи қувваи барқ (гармӣ) - дастгоҳ ё асбобе, ки барои қабул кардан ва истифода бурдани қувваи барқ (гармӣ) таъин шудааст.
Истифодакунандаи қувваи барқ (гармӣ) - корхона, ташкилот, муассиса, цехи ҳудуди ҷудогонадошта, объект, майдон, сохтмон, хона ва ғ., ки бо шабакаҳои барқ (гармӣ) пайваст шуда, қувваро ба воситаи қабулкунандаҳои барқӣ (гармӣ) истифода мекунанд.
Муштарии ташкилоти таъминкунандаи қувваи барқ - истифодакунандае, ки бевосита ба шабакаи ташкилоти таъминкунандаи қувваи барқ, ки бо вай ҳудуди тобеияти балансии шабакаҳои барқӣ (гармӣ) дошта, ҳуқуқ ва шартҳои истифодаи қувваи барқ (гармӣ), ки дар шартномаи ташкилоти таъминкунандаи қувваи барқ ва истифодакунанда ё ташкилоти болоии он зикр шудааст. Барои истифодакунандагони маишӣ-хона, сохтмон ё гурӯҳҳои аз руи ҳудудашон сохтмонҳои муттаҳидаи истифодаи шахсӣ дошта.
Муштарии фаръии ташкилоти таъминкунандаи қувваи барқ - истифодакунандаи бевоситаи шабакаҳои барқӣ (гармӣ)-и Муштарии ташкилоти таъминкунандаи қувваи барқ, ки бо онҳо дар бораи истифода кардани қувваи барқ (гармӣ) шартнома дорад.
Пардохткунанда - муштарие, ки бо ташкилоти таъминкунандаи қувваи барқ шартнома доранд ва барои истифодаи қувваи барқ (гармӣ) ва иқтидор музд месупоранд.
Ҳудуди тобеияти балансии шабакаҳои барқӣ (гармӣ) — нуқтаи тақсимоти шабакаҳои барқ (гармӣ) дар байни ташкилоти таъминкунандаи қувваи барқ ва Муштарӣ, ки аз рӯи тобеияти балансии шабакаҳои барқӣ (гармӣ) муайян карда мешавад.
Нуқтаи баҳисобгирии сарфи қувваи барқ (гармӣ) нуқтаи нақшаи таъминоти қувваи барқ (таъминоти гармӣ), ки ба воситаи асбоби андозагирӣ - (ҳисобкунаки барқӣ, системаи баҳисобгирӣ, ченкунаки гармӣ, ченкунаки об ва ғ.) ё ба воситаи методҳои дигар ҳаҷми сарфи қувваи барқ (гармӣ) ва иқтидор, ки дар вақти ҳисобу китоби тиҷоратӣ истифода мегардад, муайян карда мешавад. Нуқтаи баҳисобгирӣ ба ҳудуди тобеияти баланси шабакаҳои гармӣ (барқӣ) мувофиқат дорад.
Асбоби баҳисобгирии қувваи барқ (гармӣ) ва иқтидор - асбоби баҳисобгирӣ, системаи баҳисобгирӣ, дар асоси нишондоде, ки дар нуқтаи баҳисобгирӣ сарфи қувваи барқ (гармӣ)-и Муштарӣ (муштарии фаръӣ), ки пардохт кардан лозим аст, муайян карда мешавад.
Асбоби назорати баҳисобгирӣ - асбоби баҳисобгирие, ки дар асоси нишондоди он дар ҳамин нуқтаи шабака сарфи қувваи барқи (гармӣ)-и барои назорат кардан истифодашаванда, муайян карда мешавад,
Иқтидори пайвастшудаи истифодакунанда - ҷамъи иқтидори ба шабакаи гармӣ пайвастшудаи трансформаторҳои истифодакунанда, ки қувваро дар ҷараёни корӣ ва муҳаррикҳои гармии ҷараёнашон аз 1000 В баланд ҳосил мекунад. Дар ҳолатҳое, ки таъминоти дастгоҳҳои гармии истифодакунанда аз трансформаторҳо ё шабакаҳои пастволти ташкилоти таъминкунандаи қувваи гармӣ ҳосил мешавад, иқтидори барои истифода иҷозатдодашуда ҳамчун иқтидори пайвастшудаи истифодакунанда қабул карда мешавад. Андозаи он аз тарафи ташкилоти таъминкунандаи қувваи гармӣ муқаррар гардида, дар шартнома барои додани қувваи гармӣ нишон дода мешавад.
Эзоҳ: ҳангоми интихоби тариф барои истифодакунандагони саноатӣ ва ба онҳо монанд (тарифи якставкагӣ ҳангоми иқтидори пайвастшудаи камтар аз КВА ва дуставкагӣ ҳангоми 750 КВА ва аз он зиёд) ҷамъи умумии иқтидори пайвастшудаи Муштарӣ дар ҳаҷми бори истифодакунандагони тарифи якставкагии аз трансформаторҳои Муштарӣ таъминшаванда, кам карда мешавад.
Давраи ҳисоботӣ - даврае, ки истифодаи қувваи барқ (гармӣ) ва иқтидор ба ҳисоб гирифта мешавад ва Муштарӣ пардохткунанда барои истифодаи он маблағ месупорад.
Ҳисоби мобайнӣ - қисман пардохт кардани Муштарӣ - пардохткунанда барои қувва ва иқтидори дар давоми давраи ҳисоботӣ истифодашуда.
Ҳисоби охирин (ҷамъбастӣ) - ҳисоббаробаркунӣ бо Муштарӣ (пардохткунанда) барои истифодаи қувва ва иқтидор дар тамоми ҳамин давра.
Ҳуҷҷати пардохт — талабномаи пардохт, варақаи пардохте, ки дар асоси он ба суратҳисоби ташкилоти таъминкунандаи қувваи барқ ё пардохткунанда маблағ гузаронда мешавад, инчунин варақае, ки ба воситаи он пардохт бо пулӣ нақд анҷом дода мешавад.
Истифодакунандагони мавсимӣ — истгоҳҳои насосӣ, лагерьҳои пионерӣ, мактабҳо, хонаҳои истироҳатӣ, заводҳои коркарди пахта, бори муҳаррикҳои майда ба шумор мераванд.
