ТАРТИБИ ТАҲИЯ, ИСТИФОДАИ НУСХАҲО ВА НИГОҲДОРИИ ПАРВАНДАИ ЗАМИНСОЗӢ

1. МУҚАРРАРОТИ УМУМӢ

1. Тартиби таҳия, истифодаи нусхаҳо ва нигоҳдории парвандаи заминсозӣ (минбаъд – Тартиб) тартиби таҳия намудани парвандаи заминсозӣ, истифодабарии нусхаҳо ва нигаҳдории онҳоро ба танзим медарорад.

2. Дар Тартиби мазкур мафҳумҳои асосии зерин истифода мешаванд:

- парвандаи заминсозӣ – нусхаи аслии ҳамаи ҳуҷҷатҳое, ки дар рафти иҷрои корҳои омодагӣ, таҳқиқотӣ ва ҷустуҷӯйӣ таҳия гардидаанд, инчунин маводи харитавӣ, нақшаҳо, маводи мувофиқавӣ ва тасдиқӣ ва дигар маводу маълумот ба он дохил карда мешаванд;

- ҳуҷҷатҳои заминсозӣ – маҷмуи ҳуҷҷатҳо дар шакли чорабинӣ, барнома, нақша, лоиҳа, харитаи мавзуӣ, маводи таҳқиқотиву ҷустуҷӯйӣ, ки дар натиҷаи анҷом додани корҳои заминсозӣ таҳия карда мешаванд;

- координатҳо – рақамҳое, ки бо нишон додани онҳо мавқеи нуқта дар сатҳ ва ё дар фазо муайян карда мешавад;