ADLIA

Фармони Президенти Ҷумҳурии Тоҷикистон аз 27 феврали соли 2025, № 970 "Дар хусуси лоиҳаи Низомномаи Котиботи Қолаби «Осиёи Марказӣ- Чин»"

Санаи амалкуни:

Ҳолати ҳуҷҷат: Амалкунанда

ФАРМОНИ ПРЕЗИДЕНТИ ҶУМҲУРИИ ТОҶИКИСТОН

Дар хусуси лоиҳаи Низомномаи Котиботи Қолаби «Осиёи Марказӣ- Чин»

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» фармон медиҳам:

1. Лоиҳаи Низомномаи Котиботи Қолаби «Осиёи Марказӣ - Чин» маъқул дониста шавад.

2. Вазорати корҳои хориҷии Ҷумҳурии Тоҷикистон тибқи тартиби муқарраргардида бо ҷониби Чин сана ва маҳалли ба имзо расонидани Низомномаи мазкурро мувофиқа намояд.

Президенти Ҷумҳурии Тоҷикистон Эмомалӣ Раҳмон

ш. Душанбе, аз 27 феврали соли 2025, № 970

НИЗОМНОМА дар бораи Котиботи Қолаби"Осиёи Марказӣ - Чин"

Бар асоси ҳадафу вазифаҳое, ки дар Эъломияи Сиан аз 19 майи соли 2023 баён шудаанд, Котиботи Қолаби Осиёи Марказӣ - Чин ҷиҳати мусоидати ҳамаҷониба ба ҳамкориҳои кишварҳои Осиёи Марказӣ ва Ҷумҳурии Мардумии Чин ва фаъолияти механизмҳои дахлдор таъсис дода мешавад. Низомномаи мазкур вазифаҳо, ваколатҳо, сохтор ва ҳайати Котиботи Қолаби Осиёи Марказӣ – Чин, инчунин ҳуқуқ, уҳдадориҳо ва мақоми кормандони онро муайян мекунад.

1.Муқаррароти умумӣ

1.1 Дар Низомномаи мазкур мафҳумҳо чунин маъно доранд:

1.1.1 "Қолаб" - Қолаби "Осиёи Марказӣ - Чин", ки платформаи ҳамкорӣ байни Чин ва кишварҳои Осиёи Марказӣ мебошад.

1.1.2 "Саммит" - Мулоқоти сарони давлатҳои иштирокдори Қолаби "Осиёи Марказӣ - Чин";

1.1.3 "Вохӯрии вазирони корҳои хориҷӣ" – Вохӯрии вазирони корҳои хориҷии қолаб;

1.1.4 «Механизмҳо» - вохӯриҳои сарони давлатҳо ва дигар мақомот, инчунин ташкилотҳои давлатҳои – иштирокдори Қолаб.

1.1.5 «Давлати – иштирокдор» - давлати иштирокдори Қолаб;

1.1.6 «Котиби генералӣ» - шахси мансабдор ва роҳбари Котиботи Қолаб.

1.1.7 «Котибот» - Котиботи Қолаб;

1.1.8 "Давлати ирсолкунанда" – давлати-иштирокдор, ки шаҳрвандони худро барои кор ба Котибот мефиристад;

1.1.9 «Давлати қабулкунанда» - давлати - иштирокдор, ки дар қаламрави он Котибот ҷойгир аст;

1.1.10 «Шахсони мансабдори Котибот» – шаҳрвандони давлатҳои иштирокдор, ки дар асоси квота тибқи ҷадвали штатии тасдиқшуда ба кор қабул карда мешаванд ва дар Котибот вазифаҳои бо муҳлат муқарраршударо ишғол менамоянд, аз ҷумла Котиби Генералӣ, Муовинони Котиби Генералӣ, коршиносони категорияҳои 1, 2 ва 3.

1.1.11 «Кормандони Котибот» - шаҳрвандони давлатҳои иштирокдор, ки шахсони мансабдори Котибот нестанд, берун аз ҷадвали штатӣ ба кор қабул карда мешаванд;

1.1.12 «Кормандони штатии Котибот» - шахсони мансабдори кормандони Котибот;

1.2. Котибот дар фаъолияти худ қарорҳои Саммит ва Ҷаласаи вазирони корҳои хориҷӣ, инчунин Низомномаи мазкурро ба роҳбарӣ мегирад.

2.Вазифаҳои Котибот

Котибот мақоми иҷроияи доимо амалкунандаи Қолаб буда, дорои 5 воҳиди сохторӣ аст, аз ҷумла шӯъбаҳои сиёсӣ, иқтисодӣ, гуманитарӣ, иттилоотӣ-таҳлилӣ, маъмурӣ, ки вазифаҳои зеринро иҷро мекунад:

2.1. Таъмини чораҳои тадорукотӣ, иттилоотӣ-таҳлилӣ, ҳуқуқӣ ва техникии фаъолияти Қолабро татбиқ менамояд;

2.2. Пешниҳодҳо ва маводҳои ирсолшудаи давлатҳои иштирокдорро оид ба рӯзнома, сана ва макони баргузории Саммит ва вохӯриҳои вазирони корҳои хориҷӣ таҳия ва ҷамъоварӣ мекунад.

2.3. Дар мувофиқа бо Котиби Генералӣ, Котибот ба давлатҳои иштирокдор лоиҳаҳои рӯзномаи Саммит ва Ҷаласаҳои вазирони корҳои хориҷӣ, пешниҳодҳои давлатҳои иштирокдор оид ба илова намудани рӯзнома, лоиҳаҳои ҳуҷҷатҳои барои баррасӣ дар доираи Қолаб пешниҳодшуда, инчунин маводи зарурии таҳлилӣ ва иттилоотиро мефиристад. Мавод ва ҳуҷҷатҳои дар ҳамин банд зикргардида, чун қоида, на дертар аз 20 рӯз то оғози Саммит ва Мулоқотҳои вазирони хориҷӣ фиристода мешаванд, агар мӯҳлати дигар муқаррар нашуда бошад;

2.4. Машваратҳои намояндагони давлатҳои иштирокдорро оид ба лоиҳаҳои ҳуҷҷатҳои барои баррасӣ дар Саммит ва Ҷаласаҳои вазирони корҳои хориҷӣ пешниҳодшударо ташкил менамояд;

2.5. Дар ҳамкорӣ бо кишвари мизбон таъмини чораҳои ташкилию техникии баргузории Саммит ва мулоқотҳои/вохӯриҳои вазирони корҳои хориҷиро анҷом медиҳад;

2.6. Дар таъмини иҷрои ҳуҷҷатҳое, ки дар Саммит ва вохӯриҳои вазирони корҳои хориҷӣ, қабул шудаанд, иштирок мекунад;

2.7. Сомонаи Котиботро мекушояд ва нигоҳ медорад, паёмҳои иттилоотии Қолабро омода ва нашр мекунад;

2.8. Лоиҳаи нақшаи кории Котиботро таҳия менамояд;

2.9. Аз давлатҳои иштирокдор иттилоот ва дигар маводҳои дастраси омма бударо, ки барои таъмини кори Котибот заруранд, дархост менамояд. Маҳзани иттилоотии Котибот марбут ба кори Қолаб бударо таъсис медиҳад;

2.10. Таъмини ташрифотии фаъолияти Котиби Генералӣ ва Муовинони Котиби Генералиро анҷом медиҳад;

2.11. Оид ба нақшаҳои кории Котибот пешниҳодҳо таҳия менамояд, оид ба буҷет ва ҳисоботи молиявӣ маъруза пешниҳод менамояд, баҳисобгирии муҳосибӣ, роҳбарӣ ва назорати мунтазами ҷамъоварии маблағҳо, иҷрои буҷет ва истифодаи маблағҳо ва дороиҳои Котиботро таъмин менамояд;

2.12. Робитаро бо давлатҳо ва ташкилотҳои байналмилалӣ оид ба масъалаҳои марбут ба фаъолияти Қолаб анҷом медиҳад;

2.13. Ҷиҳати таъмини техникии фаъолияти Котибот кормандонро берун аз ҷадвали штатӣ ба кор қабул мекунад;

2.14. Дар мувофиқа бо давлатҳои иштирокдор симпозиумҳои илмӣ, конференсияҳо ва дигар чорабиниҳоро ташкил менамояд. Ба мақомоти ваколатдор дар ташкили чорабиниҳои дар доираи Қолаб мусоидат мекунад.

3.Кормандони Котибот

3.1. Котиби генералӣ шахси мансабдори волоии Котибот буда, Котиботро роҳбарӣ мекунад.

Котиби генералӣ аз ҷониби сарони давлатҳои Қолаб дар асоси ризоияти якдилонаи давлатҳои иштирокдор аз ҳисоби шаҳрвандони давлатҳои иштирокдор дар асоси ротатсия бо тартиби зайл тасдиқ карда мешавад: Ҷумҳурии Мардумии Чин, Ҷумҳурии Қазоқистон, Ҷумҳурии Қирғизистон, Ҷумҳурии Тоҷикистон ва Ҷумҳурии Ӯзбекистон ба мӯҳлати се сол бе ҳуқуқи тамдид ба мӯҳлати навбатӣ.

3.2. Котиби генералӣ вазифаҳои асосии зеринро иҷро мекунад:

3.2.1. Дар Саммит ва вохӯриҳои/мулоқотҳои вазирони корҳои хориҷӣ бидуни ҳуқуқи овоз ҳузур дошта ва баромад карда метавонад;

3.2.2. Дар чорабиниҳое, ки созмонҳои байналмилалӣ ва давлатҳо мегузаронанд, аз номи Котибот метавонад ҳайатро роҳбарӣ намояд, бо намояндагони ташкилотҳои байналмилалӣ ва давлатҳо, инчунин воситаҳои ахбори омма робита барқарор намояд;

3.2.3. Дар доираи вазифаҳои худ аз номи Котибот бо баёнияҳо оид ба масъалаҳои мубрами фаъолияти Қолаб дар мувофиқа бо тарафҳо баромад мекунад;

3.2.4. Дар вохӯриҳои вазирони корҳои хориҷӣ хисоботи солона оид ба фаъолияти Котибот, пешниҳод оид ба ташаккули лоиҳаи буҷет барои соли ояндаи молиявӣ ва ҳисобот оид ба иҷрои буҷет пешкаш менамояд;

3.2.5. Мудирияти маблағҳои барои нигоҳдории Котибот пешбинишударо амалӣ мекунад;

3.2.6. Аз номи Котибот шартномаҳо (қарордодҳо) мебандад, молу мулки манқул ва ғайриманқулро ба даст меорад ва онҳоро ихтиёрдорӣ мекунад, дар бонкҳои тиҷоратӣ суратҳисобҳои бонкӣ мекушояд ва дар судҳо ҳамчун даъвогар ва ҷавобгар баромад мекунад;

3.2.7. Аз номи Котибот Созишнома байни Ҳукумати Ҷумҳурии Мардумии Чин ва Котиботи Қолаби «Осиёи Марказӣ – Чин» дар бораи шартҳои будубоши Котибот дар Ҷумҳурии Мардумии Чин ба имзо мерасонад.

3.2.8. Метавонад ваколатҳои ба ӯ додашударо ба яке аз муовинони худ вогузорад;

3.2.9. Дар доираи сохтор ва ҷадвали штатии тасдиқшудаи Котибот вазифаҳои воҳидҳои сохторӣ ва вазифаҳои шахсони мансабдори Котиботро муайян мекунад;

3.2.10. Дар мувофиқа бо давлатҳои иштирокдор ҳуқуқ дорад шумораи кормандони воҳидҳои сохтории Котиботро дар доираи шумораи умумии тасдиқшудаи Котибот аз нав тақсим намояд;

3.2.11. Дастурҳо, қоидаҳои тартиботи дохилӣ, номгӯи рӯзҳои идҳои ғайрикорӣ ва дигар санадҳои меъёриро, ки фаъолияти мӯътадили Котиботро таъмин мекунанд, қабул мекунад, инчунин бо шахсони мансабдори Котибот қарордод мебандад. Дар доираи маблағҳои буҷетӣ кормандони Котиботро дар асоси қарордод ба кор қабул мекунад.

3.3. Дар асоси пешниҳоди давлатҳои иштирокдор муовинони Котиби Генералӣ тариқи мувофиқаи байни давлатҳои иштирокдор ба мӯҳлати ду (2) сол тасдиқ мешаванд, бо ҳуқуқи тамдиди мӯҳлати он то дувоздаҳ (12) моҳ. Муовинони Котиби генералӣ наметавонанд намояндагони ҳамон давлате бошанд, ки Котиби Генералӣ аз он давлат таъин шудааст.

Як муовини якуми Котиби Генералӣ тасдиқ шудааст, ки дар байни муовинҳо дараҷаи аввалро ишғол мекунад, бо маош ва таъмини молиявии баробар бо дигар муовинони Котиби Генералӣ. Вақте ки ба вазифаи Котиби Генералӣ шаҳрванди яке аз кишварҳои Осиёи Марказӣ таъин карда мешавад, муовини якуми Котиби Генералӣ шаҳрванди Ҷумҳурии Мардумии Чин таъин карда мешавад. Ҳангоми ба вазифаи Котиби Генералӣ таъин намудани шаҳрванди Ҷумҳурии Мардумии Чин ба вазифаи муовини якуми Котиби Генералӣ шаҳрванди яке аз давлатҳои Осиёи Марказӣ мувофиқи тартиби алифбои русии давлатҳо (бо тартиби: Ҷумҳурии Қазоқистон, Ҷумҳурии Қирғизистон, Ҷумҳурии Тоҷикистон ва Ҷумҳурии Ӯзбекистон) таъин карда мешавад.

3.4. Кормандони Котибот аз 16 нафар иборат буда, аз ҷумла Котиби Генералӣ, Муовинони Котиби Генералӣ ва коршиносони категорияҳои 1, 2 ва 3, ки хизматчиёни давлатии байналмилалӣ ба ҳисоб мераванд/мебошанд. Коршиносони ҳамаи категорияҳо дар мувофиқа бо Котиби Генералӣ бо пешниҳоди давлатҳои иштирокдор дар асоси квота бо назардошти андозаи саҳмҳои ҳиссавии онҳо ба буҷети Котибот фиристода мешаванд.

3.4.1 Коршиносони ҳамаи категорияҳо тибқи қарордод ки шартҳои хизмат, ҳуқуқ, ӯҳдадориҳо, музди меҳнат ва дигар шартҳои иҷтимоии онҳоро муайян мекунад, ба мӯҳлати ду (2) сол бо ҳуқуқи тамдид кардан ба мӯҳлати навбатӣ, ба кор қабул карда мешаванд. Аз номи Котибот қарордодро/шартнома Котиби Генералӣ имзо мекунад;

3.4.2. Барои аз ҷониби шахси мансабдори Котибот иҷро накардан ё иҷрои номатлуби ӯҳдадориҳои ба зиммаи ӯ гузошташуда, Котибот метавонад пас аз машварат бо Котиби Генералӣ ва Муовинони Котиби Генералӣ давлати ирсолкунандаро огоҳ созад ва чораҳои интизомӣ татбиқ намояд, ба монанди танбеҳ, огоҳӣ дар бораи мутобиқ набудан ба вазифа ва бекор намудани шартнома. Котиби Генералӣ ӯҳдадор аст давлати ирсолкунандаро на дертар аз ду моҳ пеш аз санаи пешниҳодшудаи бекор кардани шартнома бо шахси мансабдор огоҳ мекунад ва тамоми ҳуҷҷатҳои асоснокшудаи заруриро пешниҳод мекунад. Давлати ирсолкунанда метавонад нисбат ба қарори Котиби Генералӣ норозигӣ баён кунад. Ҳама гуна ихтилофоти эҳтимолӣ оид ба масъалаҳои кадрӣ байни Котиби Генералӣ ва давлати ирсолкунанда тавассути машваратҳо ҳал карда мешаванд;

3.4.3 Давлати ирсолкунанда метавонад масъалаи пеш аз мӯҳлат бозхонд шудани шахси мансабдорро ба миён гузорад, бо назардошти он, ки дар давоми ду соли аввали баъди бастани шартнома, имкони чунин бозхонд чун қоида татбиқ намегардад, ба истиснои ҳолатҳои фавқулодда. Қарор дар бораи бозхонди шахси мансабдори Котибот (ба истиснои ҳолатҳои фавқулодда) аз ҷониби давлати ирсолкунанда на дертар аз ду моҳ пеш аз бозхонд ба Котиби Генералӣ пешниҳод мешавад. Ҳамзамон давлати ирсолкунанда Котиби Генералиро дар бораи номзади пешниҳодшуда барои иваз кардани корманди Котиботи бозхондшуда огоҳ мекунад. Мӯҳлати номзадии пешниҳодшуда набояд аз мӯҳлати пешгузашта зиёд бошад, аз ҷумла тамдиди имконпазири пешбинишуда;

3.4.4. Котибот ба шахсони мансабдори Котибот дар дарёфти биноҳои истиқоматӣ ва бастани шартномаи иҷораи он кумаки ташкилӣ ва техникӣ мерасонад;

3.4.5 Ба шахсони мансабдори Котибот рухсатии солонаи ба мӯҳлати 36 рӯзи тақвимӣ муқаррар шудааст;

3.5 Шахсони мансабдор бояд ба талаботи касбӣ, вазифаҳо ва хусусияти кори онҳо, ки онро бояд иҷро намоянд, ҷавобгу бошанд.

3.5.1. Ҳангоми иҷрои вазифаҳои худ кормандони Котибот бояд манфиатҳои ҳамаи давлатҳои иштирокдоро ба роҳбарӣ гирифта, аз ягон мақомоти давлатии давлатҳои иштирокдор дастур дархост накунанд ва дастур нагиранд, ҳамчунин ҳеҷ гуна амалеро, ки метавонад ба мақоми Котибот зарар расонад ва ё ба мавқеи онҳо ҳамчун хизматчиёни давлатии байналмилалӣ таъсир расонад бояд содир накунанд. Давлатҳои иштирокдор мақоми шахсони мансабдори Котиботро эҳтиром мекунанд ва ба онҳо дар иҷрои вазифаҳои хизматиашон мусоидат мекунанд;

3.5.2. Шахсони мансабдори Котибот ҳуқуқ надоранд:

— бо фаъолияти ба мақоми хизматчиёни давлатии байналмилалӣ номувофиқ буда машғул бошанд, аз ҷумла, истифода аз мақоми хизматии онҳо ба манфиати ҳизбу иттиҳодияҳои сиёсӣ;

— аз шахсони воқеи ва ҳуқуқи туҳфахо, мукофотҳои пулӣ, қарзҳо, ҳаққи рухсатӣ/истироҳат ва дигар подошҳоеро, ки вобаста ба иҷро ва ё иҷро накардан, ё ба таври номатлуб иҷро кардани уҳдадориҳои хизматиашон вобастаанд, гиранд;

— дар идоракунии ташкилоти тиҷоратӣ иштирок кардан ё дар фаъолияти ягон корхонаи тичоратӣ манфиати молиявӣ доштан, агар ин иштирок ё манфиати молиявӣ ба ӯ бинобар вазифаи хизматиаш имконият диҳад, ки фоида ба даст оварад;

— ба мақсадҳои ғайрирасмӣ истифода бурдани захираҳои моддию молиявӣ, иттилоотию техникӣ ва дигар амволи Котибот;

— интишор ё ба шахсони сеюм додани ҳуҷҷатҳое, ки барои паҳнкунии васеъ пешбинӣ нашудаанд;

3.5.3 То эътибор пайдо кардани Созишнома байни Ҳукумати Ҷумҳурии Мардумии Чин ва Котиботи Қолаби Осиёи Марказӣ-Чин дар бораи шартҳои будубоши Котибот дар Ҷумҳурии Мардумии Чин (минбаъд Созишнома) Котибот ва шахсони мансабдори он дар Ҷумҳурии Мардумии Чин аз имтиёзҳо ва масуниятҳои дар Конвенсияи СММ оид ба имтиёзҳо ва масуниятҳо муқарраршуда, ки 13 феврали соли 1946 қабул шудааст, истифода мебаранд. Пас аз эътибор пайдо кардани Созишнома, Котибот ва шахсони мансабдори он аз имтиёзҳо ва масуниятҳои дар Созишнома пешбинишуда истифода мебаранд.

3.6. Кормандони Котибот тибқи тартиби ягона аз ҳисоби шаҳрвандони давлатҳои иштирокдор мутобиқи қарордоди мӯҳлатнок ба кор қабул карда мешаванд, ки дар он мақом, ҳуқуқ ва ӯҳдадориҳо, маош, кафолат ва ҷубронпулии онҳо муқаррар карда мешавад. Дар асоси сафарбар кардан (секондмент) ба кор кабул кардани кормандон иҷозат дода мешавад. Музди меҳнат, кафолат, ҷубронпулӣ ва самтҳои кори чунин кормандонро давлати ирсолкунанда муқаррар мекунад.

3.7. Кормандони Котибот бояд аз ҳама гуна амал ё изҳороти оммавӣ, хаттӣ ё шифоҳӣ, ки метавонад ба Қолаб ё Котибот зарар расонанд, худдорӣ кунанд.

3.8. Кормандони Котибот дар давраи фаъолияташон бе иҷозати Котиби Генералӣ ҳуқуқ надоранд:

— тӯҳфаҳо ё ҷоизаҳо аз ҳама гуна манбаъҳои берун аз Котибот бударо қабул кунад;

— нашри/интишори асарҳо ва маколаҳое, ки ба мавзуъҳои марбут ба Котибот дахл доранд;

— маълумотеро, ки бинобар ишғоли мансабиаш ба ӯ маълум мегардад, ба максадҳои шахсӣ истифода барад.

3.9. Кормандони Котибот уҳдадоранд қоидаҳое, ки мақом ва вазифаҳои онҳоро танзим мекунад, низомномаи дохилии Котибот ва дигар дастуру фармонҳои Котиби Генералиро ба таври зарурӣ бояд риоя намоянд.

3.10. Парвандаи шахсии кормандони Котиботро воҳиди дахлдори сохтории Котибот пеш мебарад.

4.Муқаррароти ниҳоӣ

4.1. Забонҳои кории Котибот хитоӣ ва русӣ буда, дар кори ҳаррӯза ва таҳияи ҳуҷҷатҳои Котибот ва Қолаб истифода мешаванд.

4.2. Макони ҷойгиршавии Котибот - шаҳри Сиан, музофоти Шэнси, Ҷумҳурии Мардумии Чин.

4.3. Шартҳои будубоши Котибот дар қаламрави Ҷумҳурии Мардумии Чин дар асоси Созишнома муайян карда мешаванд.

4.4. Бо қарори Саммит, ки дар асоси пешниҳоди аз рӯи натиҷаҳои ҷаласаи вазирони корҳои хориҷӣ қабул мешаванд, тағйироту иловаҳо ба Низомномаи мазкур ворид шуда метавонад, ки қисми ҷудонашавандаи онро ташкил дода, бо тартиби пешбинишудаи банди 4.5-уми Низомнома эътибор пайдо мекунад.

4.5. Маҳфуздорандаи Низомномаи мазкур Вазорати корҳои хориҷии Ҷумҳурии Мардумии Чин мебошад.

Низомномаи мазкур барои имзои давлатҳои иштирокдор кушода аст.

Низомномаи мазкур аз санаи бо роҳи дипломатӣ гирифтани панҷумин огоҳиномаи хаттии давлатҳои иштирокдор дар бораи анҷом додани расмиёти дохилидавлатӣ, ки барои эътибор пайдо кардани он зарур аст, эътибор пайдо мекунад.

Барои давлати иштирокдор, ки ин Низомномаро дертар имзо мекунад, он аз санаи аз ҷониби Маҳфуздоранда гирифтани огоҳиномаи дахлдор дар бораи анҷоми расмиёти дохилидавлатӣ эътибор пайдо мекунад.

Маҳфуздоранда дар бораи санаи эътибор пайдо кардани ин Низомнома давлатҳои иштирокдор ва Котиботро огоҳ мекунад.

Нусхаи аслии Низомнома дар Маҳфуздоранда нигоҳ дошта мешавад. Маҳфуздоранда нусхаҳои тасдиқшудаи ин Низомномаро ба давлатҳои иштирокдор ва Котибот мефиристад.

4.6 Давлати иштирокдор метавонад аз Низомномаи мазкур барояд тавассути ирсоли огоҳии хаттӣ ба Мафҳуздоранда дар бораи нияти баромадан аз он, на дертар аз 6 моҳ пеш аз санаи эҳтимолии баромадан аз Низомномаи мазкур.

Ин Низомнома дар як нусхаи аслӣ ба забонҳои хитоӣ ва русӣ имзо шудааст, ки ҳарду матн эътибори якхела доранд.