Низомномаи Ҷоизаи Ҳукумати Ҷумҳурии Тоҷикистон дар соҳаи сайёҳӣ

1. Низомномаи Ҷоизаи Ҳукумати Ҷумҳурии Тоҷикистон дар соҳаи сайёҳӣ (минбаъд - Низомнома) мақсад, талабот ва тартиби сарфароз гардонидан ба Ҷоизаи Ҳукумати Ҷумҳурии Тоҷикистонро дар соҳаи сайёҳӣ муайян менамояд.

2. Ҷоизаи Ҳукумати Ҷумҳурии Тоҷикистон дар соҳаи сайёҳӣ (минбаъд - Ҷоиза) бо мақсади ҳавасманд намудани шахсон барои дастовардҳо дар соҳаи сайёҳӣ таъсис дода шудааст.

3. Бо Ҷоиза шахсон барои дастовардҳои зерин сарфароз гардонида мешаванд:

- барои дастоварди беҳтарин дар рушди сайёҳии дохилӣ;

- барои дастоварди беҳтарин дар рушди сайёҳии байналмилалӣ;

- барои сармоягузорӣ беҳтарин дар соҳаи сайёҳӣ;

- барои навовари беҳтарин дар соҳаи сайёҳӣ;

- барои кори илмӣ (тадқиқоти)-и беҳтарин дар соҳаи сайёҳӣ;

- барои дастоварди беҳтарин дар таблиғи маҳсулоти сайёҳии Ҷумҳурии Тоҷикистон.

4. Озмун барои дарёфти Ҷоиза ҳар сол як маротиба гузаронида мешавад.

5. Эълони гузаронидани озмун дар воситаҳои ахбори омма се моҳ қабл аз баргузории он ба нашр мерасад.

6. Барои дарёфти Ҷоиза вазорату идораҳо, мақомоти иҷроияи маҳаллии ҳокимияти давлатӣ ва субъектҳои хизматрасонии сайёҳӣ ба мақоми ваколатдори давлатӣ дар соҳаи сайёҳӣ ҳуҷҷатҳои зеринро пешниҳод менамоянд:

- дастовардҳо дар рушди сайёҳии дохилӣ;

- дастовардҳо дар рушди сайёҳии байналмилалӣ;

- ҳуҷҷатҳои дахлдор вобаста ба сармоягузориҳо дар соҳаи сайёҳӣ;

- санади тасдиқкунандаи дар амал татбиқ намудани навоварӣ, ки нишон додани самаранокии иқтисодӣ ва иҷтимоиро нишон медиҳад;

- ҳуҷҷатҳои дахлдори тасдиқкунандаи ҳолати амалигардонӣ ва татбиқ гаштани корҳои илмӣ (тадқиқотӣ) дар соҳаи сайёҳӣ;

- дастовардҳо дар таблиғи маҳсулоти сайёҳии Ҷумҳурии Тоҷикистон.

7. Як муаллиф (гурӯҳи муаллифон) метавонад дар як вақт ду ва ё зиёда дастовардро барои дарёфти Ҷоиза пешниҳод намояд.

8. Барои иштирок дар озмун ҷиҳати дарёфти Ҷоиза дастовардҳое, ки муаллифи онҳо қаблан вобаста ба ҳамин дастовардҳо ба ҷоизаҳои дигари сатҳи давлатӣ пешниҳод ё сарфароз гардидааст, қабул карда намешаванд.

9. Мақоми ваколатдори давлатӣ дар соҳаи сайёҳӣ дастовардҳоро мавриди омӯзиш ва таҳлил қарор дода, ба баррасии комиссияи Ҷоизаи Ҳукумати Ҷумҳурии Тоҷикистон дар соҳаи сайёҳӣ (минбаъд-комиссия) манзур менамояд.

10. Ҷаласаҳои комиссия бо дарназардошти ба баррасии он ворид гардидани дастовардҳои мушаххас доир ба сарфароз гардонидани шахсон бо Ҷоиза гузаронида мешаванд.

11. Комиссия дастовард ва дигар ҳуҷҷатҳои пешниҳодгаштаро мавриди баррасии амиқ ва ҳамаҷониба қарор дода, доир ба сарфароз гардонидан ва ё рад кардан оид ба сарфароз гардонидан қарори асоснок қабул мекунад.

12. Ҷаласаҳои Комиссия дар он вақт ваколатнок ҳисобида мешаванд, ки агар дар онҳо аз нисф зиёди ҳайати аъзо иштирок дошта бошанд. Дар ҷаласаҳои комиссия раиси комиссия ва дар сурати набудани ӯ яке аз муовинонаш раисӣ мекунад.

13. Қарори комиссия бо овоздиҳии аксарияти аъзои дар ҷаласаи комиссия иштирокдошта қабул карда мешавад. Дар сурати баробар будани шумораи овозҳо, овози раиси комиссия ҳалкунанда мебошад.

14. Қарори дар ҷаласаи комиссия қабулшаванда бо протоколи ҷаласа, ки онро раиси комиссия ё муовини ӯ имзо мекунад, ба расмият дароварда мешавад.

15. Қарори комиссия бо қарори Ҳукумати Ҷумҳурии Тоҷикистон тасдиқ карда мешавад.

16. Қарори Ҳукумати Ҷумҳурии Тоҷикистон оид ба тасдиқи қарори комиссияи Ҷоизаи Ҳукумати Ҷумҳурии Тоҷикистон дар соҳаи сайёҳӣ дар воситаҳои ахбори омма нашр мегардад.

17. Ба шахсоне, ки ба Ҷоиза сазовор дониста шудаанд, тибқи замима ба Низомномаи мазкур диплом ва мукофоти пулӣ дода мешавад.

18. Дар ҳолати ба Ҷоиза сарфароз гардидани гурӯҳи муаллифон аз рӯйи як дастовард мукофотпулӣ дар байни онҳо баробар тақсим гардида, ба ҳар яки онҳо дар алоҳидагӣ диплом супорида мешавад.

19. Дар ҳолати вафот кардани шахсе, ки барои сазовор гардидан ба Ҷоиза ҳамчун номзад пешниҳод гардидааст, додани Ҷоиза баъд аз вафоти ӯ иҷозат дода мешавад. Диплом ҳамчун хотира ва мукофотпулӣ бо тартиби муқаррарнамудаи қонунгузории Ҷумҳурии Тоҷикистон ба ворисонаш мегузарад.

20. Мақоми ваколатдори давлатӣ дар соҳаи сайёҳӣ омори дорандагони Ҷоизаи Ҳукумати Ҷумҳурии Тоҷикистон дар соҳаи сайёҳиро пеш мебарад.

Замима

Ҳайати комиссияи Ҷоизаи Ҳукумати Ҷумҳурии Тоҷикистон дар соҳаи сайёҳӣ

Раиси комиссия - муовини Сарвазири Ҷумҳурии Тоҷикистон (сарпарасти соҳа);

Муовини раиси комиссия - сардори раёсати банақшагирии стратегӣ ва ислоҳоти Дастгоҳи иҷроияи Президенти Ҷумҳурии Тоҷикистон;

Муовини раиси комиссия - раиси Кумитаи рушди сайёҳии назди Ҳукумати Ҷумҳурии Тоҷикистон;

Котиби масъули комиссия - сардори раёсати рушди сайёҳии Кумитаи рушди сайёҳии назди Ҳукумати Ҷумҳурии Тоҷикистон.

Аъзои комиссия:

- муовини якуми раиси Кумитаи рушди сайёҳии назди Ҳукумати Ҷумҳурии Тоҷикистон;

- муовини раиси Кумитаи рушди сайёҳии назди Ҳукумати Ҷумҳурии Тоҷикистон;

- сардори шуъбаи иҷозатномадиҳии Кумитаи рушди сайёҳии назди Ҳукумати Ҷумҳурии Тоҷикистон;

- мудири бахши иқтисод ва банақшагирии Кумитаи рушди сайёҳии назди Ҳукумати Ҷумҳурии Тоҷикистон;

- намояндаи мақоми ваколатдори давлатӣ дар соҳаи фарҳанг;

- намояндаи мақоми ваколатдори давлатӣ дар соҳаи сармоягузорӣ;

- намояндаи мақоми ваколатдори давлатӣ дар соҳаи маориф ва илм.