Замимаи 2
ба фармони Президенти
Ҷумҳурии Тоҷикистон
аз 13 сентябри соли 2022, № 454
Оинномаи Муассисаи давлатии "Боғи Парчами миллӣ"-и муассисаи давлатии маҷмааи "Қасри миллат"-и Дастгоҳи иҷроияи Президенти Ҷумҳурии Тоҷикистон
1. МУҚАРРАРОТИ УМУМӢ
1. Муассисаи давлатии "Боғи Парчами миллӣ"-и муассисаи давлатии маҷмааи "Қасри миллат"-и Дастгоҳи иҷроияи Президенти Ҷумҳурии Тоҷикистон (минбаъд - Муассиса) тибқи қонунгузории Ҷумҳурии Тоҷикистон таъсис дода шудааст.
2. Муассиси Муассиса Президенти Ҷумҳурии Тоҷикистон (минбаъд - Муассис) мебошад.
3. Масъалаҳои ташкилию ҳуқуқии Муассиса аз ҷониби Дастгоҳи иҷроияи Президенти Ҷумҳурии Тоҷикистон (минбаъд - Дастгоҳи Президент) ҳал карда мешаванд.
4. Муассиса фаъолияташро мувофиқи Конститутсияи Ҷумҳурии Тоҷикистон, қонунгузории Ҷумҳурии Тоҷикистон, қарорҳои Муассис ва Оинномаи мазкур амалӣ менамояд.
5. Номи расмии Муассиса:
- бо забони тоҷикӣ - Муассисаи давлатии "Боғи Парчами миллӣ"-и муассисаи давлатии маҷмааи "Қасри миллат"-и Дастгоҳи иҷроияи Президенти Ҷумҳурии Тоҷикистон;
- бо забони русӣ - Государственное учреждение "Боги Парчами милли" государственное учреждение комплекс "Дворец нации" Исполнительного аппарата Президента Республики Таджикистан;
- бо забони англисӣ - State institution "Bogi Parchami milli" of state institution residence "Palace of the Nation" of the Executive Office of the President of the Republic of Tajikistan.
6. Суроғаи ҳуқуқии Муассиса: Ҷумҳурии Тоҷикистон, шаҳри Душанбе, кӯчаи Шероз, 20.
7. Муассиса дар тобеияти Муассисаи давлатии маҷмааи "Қасри миллат"-и Дастгоҳи иҷроияи Президенти Ҷумҳурии Тоҷикистон қарор дорад.
2. МАҚОМИ ҲУҚУҚИИ МУАССИСА
8. Муассиса шахси ҳуқуқӣ буда, дорои муҳр бо тасвири Нишони давлатии Ҷумҳурии Тоҷикистон ва сабти номи худ, бланк ва штампҳо бо намунаи муқарраргардида мебошад ва аз суратҳисоби ягонаи Сарраёсати хазинадории марказии Вазорати молияи Ҷумҳурии Тоҷикистон маблағгузорӣ карда мешавад.
9. Маблағгузории хароҷоти Муассиса аз ҳисоби маблағҳои дар буҷети ҷумҳуриявӣ пешбинигардида, инчунин аз ҳисоби маблағҳои махсус тибқи тартиби бо Вазорати молияи Ҷумҳурии Тоҷикистон мувофиқагардида анҷом дода мешавад.
10. Муассиса дар мувофиқа бо Дастгоҳи Президент дар асоси шартномаҳои тиҷоратӣ бо тартиби муқарраргардида ҳуқуқи истифодабарии қарзҳои бонкиро дорад.
11. Муассиса дорои дигар ҳуқуқҳое мебошад, ки қонунгузории Ҷумҳурии Тоҷикистон барои муассисаҳо муқаррар кардааст.
3. МАҚСАД ВА САМТҲОИ ФАЪОЛИЯТИ МУАССИСА
12. Мақсади асосии фаъолияти Муассиса нигоҳубин, таъмир намудан ва дар ҳолати хуб нигоҳ доштани "Боғи Парчами миллӣ", қонеъгардонии бештару хубтар дар ташкил намудани шаклҳои гуногуни манзараҳои табиӣ бо истифода аз дарахтону буттаҳои сояафкан, гулҳои ороишӣ, майсазор ва фаввораҳо дар гирду атрофии "Боғи Парчами миллӣ"-и Дастгоҳи иҷроияи Президенти Ҷумҳурии Тоҷикистон мебошад.
13. Барои амалӣ намудани мақсадҳои худ Муассиса фаъолияти зеринро ба амал мебарорад:
- дар ҳолати хуб нигоҳ доштани "Боғи Парчами миллӣ";
- таъмини фароғати фарҳангии шаҳрвандони ба боғ ҳозиршаванда;
- ташкил намудани чорабиниҳои фарҳангӣ ва фароғатӣ.
14. Муассиса метавонад тибқи тартиби муқарраргардида ба хизматрасонии пулакӣ машғул шавад. Даромади бадастовардашуда тибқи тартиби муқарраргардида ба ихтиёри Муассиса мегузарад ва дар суратҳисоби махсус ба ҳисоб гирифта мешавад.
15. Муассиса инчунин дигар намудҳои фаъолиятеро, ки қонунгузории Ҷумҳурии Тоҷикистон манъ накардааст ва ба мақсадҳои оинномавиаш мутобиқат менамояд, амалӣ менамояд.
4. МАҚОМИ ИДОРАКУНИИ МУАССИСА
16. Идоракунии Муассиса ба воситаи мақомоти зерин амалӣ карда мешавад:
- мақоми идоракунии Муассиса - Дастгоҳи иҷроияи Президенти Ҷумҳурии Тоҷикистон дар шахсияти Роҳбари Дастгоҳи иҷроияи Президенти Ҷумҳурии Тоҷикистон;
- мақоми иҷроияи Муассиса - маъмурият бо роҳбарии директори Муассиса.
17. Мақоми идоракунии давлатии Муассиса дорои ваколатҳои зерин мебошад:
- самтҳои асосии фаъолияти Муассисаро муайян менамояд;
- шумораи ниҳоии кормандони Муассисаро тасдиқ менамояд;
- фаъолияти Муассисаро назорат карда, бо асноди коргузорӣ, ҳисоботӣ ва ҳуҷҷатҳои дигар шинос мешавад;
- тавозуни муҳосибавии Муассисаро тасдиқ намуда, ҳисоботи солонаи хароҷоти молиявии фаъолияти онро назорат мекунад;
- дигар масъалаҳоеро, ки қонунгузории Ҷумҳурии Тоҷикистон ба ваколати мақоми идоракунии Муассиса мансуб донистааст, ҳал менамояд.
18. Директор ҳамчун мақоми иҷроияи Муассиса ба фаъолияти ҷории Муассиса роҳбарӣ мекунад. Директори Муассиса аз тарафи Президенти Ҷумҳурии Тоҷикистон бо пешниҳоди Роҳбари Дастгоҳи Президент ба вазифа таъин ва аз вазифа озод карда мешавад. Директори Муассиса муовин ва сармуҳосиб дорад, ки бо пешниҳоди директори Муассиса аз ҷониби Роҳбари Дастгоҳи Президент ба вазифа таъин ва аз вазифа озод карда мешаванд.
19. Директор дорои ваколатҳои зерин мебошад:
- бе ваколатнома аз номи Муассиса амал карда, роҳбарии фаъолияти Муассисаро таъмин мекунад;
- амру супоришҳои Президенти Ҷумҳурии Тоҷикистон ва Роҳбари Дастгоҳи Президентро иҷро мекунад;
- молу мулки Муассисаро тибқи тарғиби муқарраргардида ихтиёрдорӣ мекунад;
- тибқи тартиби муқарраргардида Муассисаро дар тамоми муассисаҳо ва ташкилотҳо дар ҳудуди Ҷумҳурии Тоҷикистон ва берун аз он намояндагӣ мекунад;
- ҳисоботи солона, тавозунҳои муҳосибавии Муассисаро ба Роҳбари Дастгоҳи Президент дар муҳлати муқарраршуда пешниҳод мекунад;
- кормандони Муассисаро, ба истиснои муовини директор ва сармуҳосиби Муассиса, тибқи тартиби муқарраргардида ба кор қабул ва аз кор озод менамояд, инчунин нисбат ба онҳо чораҳои ҳавасмандкунӣ ва интизомӣ меандешад;
- дорои дигар ҳукуқҳое мебошад, ки ба қонунгузории Ҷумҳурии Тоҷикистон ва мақсадҳои оинномавии Муассиса мухолифат намекунанд.
20. Назорати фаъолияти молиявию хоҷагидории Муассиса тибқи қонунгузории Ҷумҳурии Тоҷикистон амалӣ карда мешавад.
21. Муовини директори Муассиса дар сурати ҳозир набудани директори Муассиса ваколатҳои ӯро амалӣ менамояд.
5. МОЛУ МУЛК ВА ВОСИТАҲОИ МУАССИСА
22. Молу мулки Муассиса аз фондҳои асосӣ ва воситаҳои гардон, инчунин арзишҳои дигар, ки нархи онҳо дар тавозуни Муассиса нишон дода шудааст, иборат мебошад. Молу мулки Муассиса моликияти давлатӣ буда, ба Муассиса бо ҳуқуқи идораи оперативӣ дода мешавад. Муассиса ба молу мулки дар ихтиёраш гузошташуда мутобиқи мақсади фаъолияти худ дар доираи муайяннамудаи қонунгузорӣ ҳуқуқи ихтиёрдориро дорад.
23. Манбаъҳои ташкил ёфтани молу мулки Муассиса:
- молу мулке, ки Муассис бо ҳукуқи идораи оперативӣ вобаста намудааст;
- пардохти пулӣ ва моддии Муассис;
- даромадҳое, ки аз фаъолияти Муассиса ба даст омадаанд;
- қарзи бонкӣ ва манбаъҳои дигари маблағгузорӣ;
- пардохтҳои бебозгашт ва хайрияи шахсони воқеӣ ва ҳуқуқӣ;
- дигар сарчашмаҳое, ки қонунгузории Ҷумҳурии Тоҷикистон манъ накардааст.
24. Муассиса дар назди мақомоти давлатӣ мустақилона ҳисобот медиҳад, аз ҷумла оид ба супоридаии андозҳо, омор ва ғайра.
6. АЗНАВТАШКИЛДИҲӢ ВА БАРҲАМДИҲИИ МУАССИСА
25. Азнавташкилдиҳӣ ва барҳамдиҳии Муассиса бо тартиби муқаррарнамудаи қонунгузории Ҷумҳурии Тоҷикистон амалӣ карда мешавад.
Замимаи 12
ба фармони Президенти
Ҷумҳурии Тоҷикистон
аз 13 сентябри соли 2022, № 454
Оинномаи Муассисаи давлатии илмии "Боғи ботаникии Хуҷанд"-и Дастгоҳи иҷроияи Президенти Ҷумҳурии Тоҷикистон
1. МУҚАРРАРОТИ УМУМӢ
1. Муассисаи давлатии илмии "Боғи ботаникии Хуҷанд"-и Дастгоҳи иҷроияи Президенти Ҷумҳурии Тоҷикистон (минбаъд - Боғи ботаникӣ) тибқи тартиби қонунгузорӣ таъсис дода шудааст.
2. Муассиси Боғи ботаникӣ Ҳукумати Ҷумҳурии Тоҷикистон (минбаъд - Муассис) мебошад.
3. Масъалаҳои ташкилию ҳуқуқии Боғи ботаникӣ аз ҷониби Дастгоҳи иҷроияи Президенти Ҷумҳурии Тоҷикистон (минбаъд - Дастгоҳи Президент) ҳал карда мешаванд.
4. Боғи ботаникӣ фаъолияташро мувофиқи Конститутсияи Ҷумҳурии Тоҷикистон, қонунгузории Ҷумҳурии Тоҷикистон, қарорҳои Муассис ва Оинномаи мазкур амалӣ менамояд.
5. Номи расмии Боғи ботаникӣ:
- бо забони тоҷикӣ - муассисаи давлатии илмии "Боғи ботаникии Хуҷанд"-и Дастгоҳи иҷроияи Президенти Ҷумҳурии Тоҷикистон;
- бо забони русӣ - государственное научное учреждение "Боги ботаникии Хучанд" Исполнительного аппарата Президента Республики Таджикистан;
- бо забони англисӣ - state scientific institution "Boghi botaniki Khujand" of the Executive Office of the President of the Republic of Tajikistan.
6. Суроғаи ҳуқуқии Боғи ботаникӣ: Ҷумҳурии Тоҷикистон, вилояти Суғд, шаҳри Хуҷанд, кӯчаи Сирдарё, 26.
2. МАҚОМИ ҲУҚУҚИИ БОҒИ БОТАНИКӢ
7. Боғи ботаникӣ шахси ҳуқуқӣ буда, дорои муҳр бо тасвири Нишони давлатии Ҷумҳурии Тоҷикистон ва сабти номи худ, бланк ва штампҳои намунаи муқарраргардида мебошад ва аз суратҳисоби ягонаи Сарраёсати хазинадории Вазорати молияи Ҷумҳурии Тоҷикистон маблағгузорӣ карда мешавад.
8. Маблағгузории хароҷоти Боғи ботаникӣ аз ҳисоби маблағҳои дар буҷети ҷумҳуриявӣ пешбинигардида, инчунин аз ҳисоби маблағҳои махсус тибқи тартиби бо Вазорати молияи Ҷумҳурии Тоҷикистон мувофиқагардида анҷом дода мешавад.
9. Боғи ботаникӣ дар мувофиқа бо Роҳбари Дастгоҳи Президент дар асоси шартномаҳои тиҷоратӣ бо тартиби муқарраргардида ҳуқуқи истифодабарии қарзҳои бонкиро дорад.
10. Боғи ботаникӣ дорои дигар ҳуқуқҳое мебошад, ки қонунгузории Ҷумҳурии Тоҷикистон барои муассисаҳо муқаррар кардааст.
3. МАҚСАД ВА САМТҲОИ ФАЪОЛИЯТИ БОҒИ БОТАНИКӢ
11. Мақсади асосии Боғи ботаникӣ парвариш ва гирд овардани набототи минтақа, растаниҳои нодиру ороишӣ, мевадиҳандаю сояафкан мебошад.
12. Барои ноил гардидан ба мақсадҳои оинномавӣ Боғи ботаникӣ намудҳои зерини фаъолиятро амалӣ менамояд:
- истифодаи самараноки замин, бо ниҳолҳои сояафкан, мевадор, ороишӣ таъмин намудани ташкилотҳо;
- ба иқлим мутобиқгардонии растаниҳои нави фоидаовар ва ороишӣ;
- дар биноҳои махсус нигоҳ доштани растаниҳои нодир ва нобудшаванда, инчунин объектҳои ботаникие, ки хусусияти муҳими илмӣ, омӯзишӣ ва фарҳангӣ доранд;
- ташкили мавзеи истироҳат;
- ташкил ва истифодабарии гармхонаҳо;
- парвариш ва зиёдкунии растаниҳои сояафкан, мевадор, ороишӣ ва ба фурӯш баровардани онҳо;
- кушодани мағозаҳо барои фурӯши растаниҳои нодиру ороишӣ, мевадиҳанда ва сояафкан;
- ҳамкорӣ бо дигар ташкилотҳои маҳалливу хориҷӣ дар соҳаи парвариши растаниҳои нодиру ороишӣ, мевадиҳанда ва сояафкан;
- амалӣ намудани дигар намудҳои фаъолияте, ки қонунгузории Ҷумҳурии Тоҷикистон манъ накардааст ва ба мақсадҳои оинномавиаш мутобиқ мебошанд.
13. Боғи ботаникӣ метавонад тибқи тартиби муқарраргардида ба хизматрасонии пулакӣ машғул шавад. Даромади бадастовардашуда тибқи тартиби муқарраргардида ба ихтиёри Боғи ботаникӣ мегузарад ва дар тавозуни алоҳида нигоҳ дошта мешавад.
14. Боғи ботаникӣ дар доираи мақсад ва вазифаҳо мувофиқи қонунгузории Ҷумҳурии Тоҷикистон ҳуқуқ дорад фаъолияти иқтисодии хориҷиро мустақилона амалӣ намояд.
15. Бо ин мақсадҳо Боғи ботаникӣ чунин корҳоро анҷом дода метавонад:
- амалиётҳои содиротиву воридотӣ;
- ҳамкории илмию техникӣ ва истеҳсолӣ бо ташкилотҳои маҳаллӣ ва хориҷӣ;
- иштирок дар намошгоҳҳо ва ярмаркаҳои байналмилалӣ.
4. МАҚОМОТИ ИДОРАКУНИИ БОҒИ БОТАНИКӢ
16. Идоракунии Боғи ботаникӣ ба воситаи мақомоти зерин амалӣ карда мешавад:
- мақоми идоракунии Боғи ботаникӣ - Дастгоҳи Президент;
- мақоми иҷроияи Боғи ботаникӣ - маъмурият бо роҳбарии директори Боғи ботаникӣ.
17. Мақоми идоракунии Боғи ботаникӣ дорои ваколатҳои зерин мебошад:
- самтҳои асосии фаъолияти Боғи ботаникиро муайян менамояд;
- шумораи ниҳоии кормандони Боғи ботаникиро тасдиқ менамояд;
- фаъолияти Боғи ботаникиро назорат карда, бо асноди коргузорӣ, ҳисоботӣ ва ҳуҷҷатҳои дигар шинос мешавад;
- тавозуни муҳосибавии Боғи ботаникиро тасдиқ намуда, ҳисоботи солонаи хароҷоти молиявии фаъолияти онро назорат мекунад;
- дигар масъалаҳоеро, ки қонунгузории Ҷумҳурии Тоҷикистон ба ваколати мақоми идоракунии давлатии Боғи ботаникӣ мансуб донистааст, ҳал менамояд.
18. Директор ҳамчун мақоми иҷроияи Боғи ботаникӣ ба фаъолияти ҷории Боғи ботаникӣ роҳбарӣ мекунад. Директори Боғи ботаникӣ аз ҷониби Ҳукумати Ҷумҳурии Тоҷикистон ба вазифа таъин ва аз вазифа озод карда мешавад. Директори Боғи ботаникӣ муовин ва сармуҳосиб дорад, ки бо пешниҳоди директори Боғи ботаникӣ аз ҷониби Роҳбари Дастгоҳи Президент ба вазифа таъин ва аз вазифа озод карда мешаванд.
19. Директор дорои ваколатҳои зерин мебошад:
- бе ваколатнома аз номи Боғи ботаникӣ амал мекунад, роҳбарии фаъолияти Боғи ботаникиро таъмин мекунад;
- амру супоришҳои Президенти Ҷумҳурии Тоҷикистои ва Роҳбари Дастгоҳи Президентро иҷро мекунад;
- молу мулки Боғи ботаникиро тибқи тартиби муқарраргардида ихтиёрдорӣ мекунад;
- тибқи тартиби муқарраргардида Боғи ботаникиро дар тамоми муассисаҳо ва ташкилотҳо дар ҳудуди Ҷумҳурии Тоҷикистон ва берун аз он намояндагӣ мекунад;
- ҳисоботи солона, тавозунҳои муҳосибавии Боғи ботаникиро ба Роҳбари Дастгоҳи Президент дар муҳлатҳои муқарраршуда пешниҳод мекунад;
- кормандони Боғи ботаникиро, ба истиснои муовини директор ва сармуҳосиби Боғи ботаникӣ, тибқи тартиби муқарраргардида ба кор қабул ва аз кор озод менамояд, инчунин нисбат ба онҳо чораҳои ҳавасмандкунӣ ва интизомӣ меандешад;
- дорои дигар ҳуқуқҳое мебошад, ки ба қонунгузории Ҷумҳурии Тоҷикистон ва мақсадҳои оинномавии Боғи ботаникӣ мухолифат намекунанд.
20. Назорати фаъолияти молиявию хоҷагидории Боғи ботаникӣ тибқи қонунгузории Ҷумҳурии Тоҷикистон амалӣ карда мешавад.
21. Муовини директори Боғи ботаникӣ дар сурати ҳозир набудани директори Боғи ботаникӣ ваколатҳои ӯро амалӣ менамояд.
5. МОЛУ МУЛК ВА ВОСИТАҲОИ БОҒИ БОТАНИКӢ
22. Молу мулки Боғи ботаникӣ аз фондҳои асосӣ ва воситаҳои гардон, инчунин арзишҳои дигар, ки нархи онҳо дар тавозуни Боғи ботаникӣ нишон дода шудааст, иборат мебошад. Молу мулки Боғи ботаникӣ моликияти давлатӣ буда, ба Боғи ботаникӣ бо ҳуқуқи идораи оперативӣ тааллуқ дорад. Боғи ботаникӣ ба молу мулки дар ихтиёраш гузошташуда мутобиқи мақсади фаъолияти худ, дар доираи муайяннамудаи қонунгузорӣ ҳуқуқи ихтиёрдориро дорад.
23. Манбаъҳои ташкил ёфтани молу мулки Боғи ботаникӣ:
- молу мулке, ки Муассис бо ҳуқуқи идораи оперативӣ вобаста намудааст;
- пардохтҳои пулӣ ва моддии Муассис;
- даромадҳое, ки аз фаъолияти Боғи ботаникӣ ба даст омадаанд;
- қарзҳои бонкӣ ва намудҳои дигари маблағгузорӣ;
- пардохтҳои бебозгашт ва хайрияи шахсони воқеӣ ва ҳуқуқӣ;
- дигар сарчашмаҳое, ки қонунгузории Ҷумҳурии Тоҷикистон манъ накардааст.
24. Боғи ботаникӣ дар назди мақомоти давлатӣ мустақилона ҳисобот медиҳад, аз ҷумла оид ба супоридани андозҳо, омор ва ғайра.
6. АЗНАВТАШКИЛДИҲӢ ВА БАРҲАМДИҲИИ БОҒИ БОТАНИКӢ
25. Азнавташкилдиҳӣ ва барҳамдиҳии Боғи ботаникӣ бо тартиби муқаррарнамудаи қонунгузории Ҷумҳурии Тоҷикистон амалӣ карда мешавад.
