Замимаи 2
ба фармони Президенти
Ҷумҳурии Тоҷикистон
аз 13 сентябри соли 2022, № 454
Оинномаи Муассисаи давлатии "Боғи Парчами миллӣ"-и муассисаи давлатии маҷмааи "Қасри миллат"-и Дастгоҳи иҷроияи Президенти Ҷумҳурии Тоҷикистон
1. МУҚАРРАРОТИ УМУМӢ
1. Муассисаи давлатии "Боғи Парчами миллӣ"-и муассисаи давлатии маҷмааи "Қасри миллат"-и Дастгоҳи иҷроияи Президенти Ҷумҳурии Тоҷикистон (минбаъд - Муассиса) тибқи қонунгузории Ҷумҳурии Тоҷикистон таъсис дода шудааст.
2. Муассиси Муассиса Президенти Ҷумҳурии Тоҷикистон (минбаъд - Муассис) мебошад.
3. Масъалаҳои ташкилию ҳуқуқии Муассиса аз ҷониби Дастгоҳи иҷроияи Президенти Ҷумҳурии Тоҷикистон (минбаъд - Дастгоҳи Президент) ҳал карда мешаванд.
4. Муассиса фаъолияташро мувофиқи Конститутсияи Ҷумҳурии Тоҷикистон, қонунгузории Ҷумҳурии Тоҷикистон, қарорҳои Муассис ва Оинномаи мазкур амалӣ менамояд.
5. Номи расмии Муассиса:
- бо забони тоҷикӣ - Муассисаи давлатии "Боғи Парчами миллӣ"-и муассисаи давлатии маҷмааи "Қасри миллат"-и Дастгоҳи иҷроияи Президенти Ҷумҳурии Тоҷикистон;
- бо забони русӣ - Государственное учреждение "Боги Парчами милли" государственное учреждение комплекс "Дворец нации" Исполнительного аппарата Президента Республики Таджикистан;
- бо забони англисӣ - State institution "Bogi Parchami milli" of state institution residence "Palace of the Nation" of the Executive Office of the President of the Republic of Tajikistan.
6. Суроғаи ҳуқуқии Муассиса: Ҷумҳурии Тоҷикистон, шаҳри Душанбе, кӯчаи Шероз, 20.
7. Муассиса дар тобеияти Муассисаи давлатии маҷмааи "Қасри миллат"-и Дастгоҳи иҷроияи Президенти Ҷумҳурии Тоҷикистон қарор дорад.
2. МАҚОМИ ҲУҚУҚИИ МУАССИСА
8. Муассиса шахси ҳуқуқӣ буда, дорои муҳр бо тасвири Нишони давлатии Ҷумҳурии Тоҷикистон ва сабти номи худ, бланк ва штампҳо бо намунаи муқарраргардида мебошад ва аз суратҳисоби ягонаи Сарраёсати хазинадории марказии Вазорати молияи Ҷумҳурии Тоҷикистон маблағгузорӣ карда мешавад.
9. Маблағгузории хароҷоти Муассиса аз ҳисоби маблағҳои дар буҷети ҷумҳуриявӣ пешбинигардида, инчунин аз ҳисоби маблағҳои махсус тибқи тартиби бо Вазорати молияи Ҷумҳурии Тоҷикистон мувофиқагардида анҷом дода мешавад.
10. Муассиса дар мувофиқа бо Дастгоҳи Президент дар асоси шартномаҳои тиҷоратӣ бо тартиби муқарраргардида ҳуқуқи истифодабарии қарзҳои бонкиро дорад.
11. Муассиса дорои дигар ҳуқуқҳое мебошад, ки қонунгузории Ҷумҳурии Тоҷикистон барои муассисаҳо муқаррар кардааст.
3. МАҚСАД ВА САМТҲОИ ФАЪОЛИЯТИ МУАССИСА
12. Мақсади асосии фаъолияти Муассиса нигоҳубин, таъмир намудан ва дар ҳолати хуб нигоҳ доштани "Боғи Парчами миллӣ", қонеъгардонии бештару хубтар дар ташкил намудани шаклҳои гуногуни манзараҳои табиӣ бо истифода аз дарахтону буттаҳои сояафкан, гулҳои ороишӣ, майсазор ва фаввораҳо дар гирду атрофии "Боғи Парчами миллӣ"-и Дастгоҳи иҷроияи Президенти Ҷумҳурии Тоҷикистон мебошад.
13. Барои амалӣ намудани мақсадҳои худ Муассиса фаъолияти зеринро ба амал мебарорад:
- дар ҳолати хуб нигоҳ доштани "Боғи Парчами миллӣ";
- таъмини фароғати фарҳангии шаҳрвандони ба боғ ҳозиршаванда;
- ташкил намудани чорабиниҳои фарҳангӣ ва фароғатӣ.
14. Муассиса метавонад тибқи тартиби муқарраргардида ба хизматрасонии пулакӣ машғул шавад. Даромади бадастовардашуда тибқи тартиби муқарраргардида ба ихтиёри Муассиса мегузарад ва дар суратҳисоби махсус ба ҳисоб гирифта мешавад.
15. Муассиса инчунин дигар намудҳои фаъолиятеро, ки қонунгузории Ҷумҳурии Тоҷикистон манъ накардааст ва ба мақсадҳои оинномавиаш мутобиқат менамояд, амалӣ менамояд.
4. МАҚОМИ ИДОРАКУНИИ МУАССИСА
16. Идоракунии Муассиса ба воситаи мақомоти зерин амалӣ карда мешавад:
- мақоми идоракунии Муассиса - Дастгоҳи иҷроияи Президенти Ҷумҳурии Тоҷикистон дар шахсияти Роҳбари Дастгоҳи иҷроияи Президенти Ҷумҳурии Тоҷикистон;
- мақоми иҷроияи Муассиса - маъмурият бо роҳбарии директори Муассиса.
17. Мақоми идоракунии давлатии Муассиса дорои ваколатҳои зерин мебошад:
- самтҳои асосии фаъолияти Муассисаро муайян менамояд;
- шумораи ниҳоии кормандони Муассисаро тасдиқ менамояд;
- фаъолияти Муассисаро назорат карда, бо асноди коргузорӣ, ҳисоботӣ ва ҳуҷҷатҳои дигар шинос мешавад;
- тавозуни муҳосибавии Муассисаро тасдиқ намуда, ҳисоботи солонаи хароҷоти молиявии фаъолияти онро назорат мекунад;
- дигар масъалаҳоеро, ки қонунгузории Ҷумҳурии Тоҷикистон ба ваколати мақоми идоракунии Муассиса мансуб донистааст, ҳал менамояд.
18. Директор ҳамчун мақоми иҷроияи Муассиса ба фаъолияти ҷории Муассиса роҳбарӣ мекунад. Директори Муассиса аз тарафи Президенти Ҷумҳурии Тоҷикистон бо пешниҳоди Роҳбари Дастгоҳи Президент ба вазифа таъин ва аз вазифа озод карда мешавад. Директори Муассиса муовин ва сармуҳосиб дорад, ки бо пешниҳоди директори Муассиса аз ҷониби Роҳбари Дастгоҳи Президент ба вазифа таъин ва аз вазифа озод карда мешаванд.
19. Директор дорои ваколатҳои зерин мебошад:
- бе ваколатнома аз номи Муассиса амал карда, роҳбарии фаъолияти Муассисаро таъмин мекунад;
- амру супоришҳои Президенти Ҷумҳурии Тоҷикистон ва Роҳбари Дастгоҳи Президентро иҷро мекунад;
- молу мулки Муассисаро тибқи тарғиби муқарраргардида ихтиёрдорӣ мекунад;
- тибқи тартиби муқарраргардида Муассисаро дар тамоми муассисаҳо ва ташкилотҳо дар ҳудуди Ҷумҳурии Тоҷикистон ва берун аз он намояндагӣ мекунад;
- ҳисоботи солона, тавозунҳои муҳосибавии Муассисаро ба Роҳбари Дастгоҳи Президент дар муҳлати муқарраршуда пешниҳод мекунад;
- кормандони Муассисаро, ба истиснои муовини директор ва сармуҳосиби Муассиса, тибқи тартиби муқарраргардида ба кор қабул ва аз кор озод менамояд, инчунин нисбат ба онҳо чораҳои ҳавасмандкунӣ ва интизомӣ меандешад;
- дорои дигар ҳукуқҳое мебошад, ки ба қонунгузории Ҷумҳурии Тоҷикистон ва мақсадҳои оинномавии Муассиса мухолифат намекунанд.
20. Назорати фаъолияти молиявию хоҷагидории Муассиса тибқи қонунгузории Ҷумҳурии Тоҷикистон амалӣ карда мешавад.
21. Муовини директори Муассиса дар сурати ҳозир набудани директори Муассиса ваколатҳои ӯро амалӣ менамояд.
5. МОЛУ МУЛК ВА ВОСИТАҲОИ МУАССИСА
22. Молу мулки Муассиса аз фондҳои асосӣ ва воситаҳои гардон, инчунин арзишҳои дигар, ки нархи онҳо дар тавозуни Муассиса нишон дода шудааст, иборат мебошад. Молу мулки Муассиса моликияти давлатӣ буда, ба Муассиса бо ҳуқуқи идораи оперативӣ дода мешавад. Муассиса ба молу мулки дар ихтиёраш гузошташуда мутобиқи мақсади фаъолияти худ дар доираи муайяннамудаи қонунгузорӣ ҳуқуқи ихтиёрдориро дорад.
23. Манбаъҳои ташкил ёфтани молу мулки Муассиса:
- молу мулке, ки Муассис бо ҳукуқи идораи оперативӣ вобаста намудааст;
- пардохти пулӣ ва моддии Муассис;
- даромадҳое, ки аз фаъолияти Муассиса ба даст омадаанд;
- қарзи бонкӣ ва манбаъҳои дигари маблағгузорӣ;
- пардохтҳои бебозгашт ва хайрияи шахсони воқеӣ ва ҳуқуқӣ;
- дигар сарчашмаҳое, ки қонунгузории Ҷумҳурии Тоҷикистон манъ накардааст.
24. Муассиса дар назди мақомоти давлатӣ мустақилона ҳисобот медиҳад, аз ҷумла оид ба супоридаии андозҳо, омор ва ғайра.
6. АЗНАВТАШКИЛДИҲӢ ВА БАРҲАМДИҲИИ МУАССИСА
25. Азнавташкилдиҳӣ ва барҳамдиҳии Муассиса бо тартиби муқаррарнамудаи қонунгузории Ҷумҳурии Тоҷикистон амалӣ карда мешавад.
Замимаи 8
ба фармони Президенти
Ҷумҳурии Тоҷикистон
аз 13 сентябри соли 2022, № 454
Оинномаи Муассисаи давлатии "Маҷмӯи меҳмонхонаҳои Дастгоҳи иҷроияи Президенти Ҷумҳурии Тоҷикистон"
1. МУҚАРРАРОТИ УМУМӢ
(Фармони Президенти ҶТ аз 05.01.2024 № 670)
1. Муассисаи давлатии "Маҷмӯи меҳмонхонаҳои Дастгоҳи иҷроияи Президенти Ҷумҳурии Тоҷикистон" (минбаъд - Маҷмӯи меҳмонхонаҳо) тибқи қонунгузории Ҷумҳурии Тоҷикистон таъсис дода шудааст.
2. Муассиси Маҷмӯи меҳмонхонаҳо Президенти Ҷумҳурии Тоҷикистон (минбаъд - Муассис) мебошад.
3. Масъалаҳои ташкилию ҳуқуқии Маҷмӯи меҳмонхонаҳо аз ҷониби Дастгоҳи иҷроияи Президенти Ҷумҳурии Тоҷикистон (минбаъд - Дастгоҳи Президент) ҳал карда мешаванд.
4. Маҷмӯи меҳмонхонаҳо фаъолияташро мутобиқи Конститутсияи Ҷумҳурии Тоҷикистон, қонунгузории Ҷумҳурии Тоҷикистон, қарорҳои Муассис ва Оинномаи мазкур амалӣ менамояд.
5. Ба сохтори Маҷмӯи меҳмонхонаҳо Қароргоҳи шаҳрии Президенти Ҷумҳурии Тоҷикистон, чойхонаи "Саодат", истироҳатгоҳи "Харангон", истирохатгоҳи "Зимчуруд" дохил мешаванд.
6. Дар тобеияти Маҷмӯи меҳмонхонаҳо инҳо қарор доранд:
- Муассисаи давлатии "Боғи Ирам"-и муассисаи давлатии "Маҷмӯи меҳмонхонаҳои Дастгоҳи иҷроияи Президенти Ҷумҳурии Тоҷикистон";
- Муассисаи давлатии "Кохи Истиқлол"-и муассисаи давлатии "Маҷмӯи меҳмонхонаҳои Дастгоҳи иҷроияи Президенти Ҷумҳурии Тоҷикистон";
- Муассисаи давлатии меҳмонхонаи "Истиқлол"-и муассисаи давлатии "Маҷмӯи меҳмонхонаҳои Дастгоҳи иҷроияи Президенти Ҷумҳурии Тоҷикистон";
- Муассисаи давлатии "Боғи миллӣ"-и муассисаи давлатии "Маҷмӯи меҳмонхонаҳои Дастгоҳи иҷроияи Президенти Ҷумҳурии Тоҷикистон";
- Муассисаи давлатии меҳмонхонаи "Авесто"-и муассисаи давлатии "Маҷмӯи меҳмонхонаҳои Дастгоҳи иҷроияи Президенти Ҷумҳурии Тоҷикистон";
- Корхонаи воҳиди давлатии тарабхонаи "Чаманоро"-и муассисаи давлатии "Маҷмӯи меҳмонхонаҳои Дастгоҳи иҷроияи Президенти Ҷумҳурии Тоҷикистон" .
7. Номи расмии Маҷмӯи меҳмонхонаҳо:
- бо забони давлатӣ - Муассисаи давлатии "Маҷмӯи меҳмонхонаҳои Дастгоҳи иҷроияи Президенти Ҷумҳурии Тоҷикистон", дар шакли мухтасарМД "Маҷмӯи меҳмонхонаҳо";
- бо забони русӣ - Государственное учреждение "Гостиничный комплекс" Исполнительного аппарата Президента Республики Таджикистан, дар шакли мухтасар - ГУ "Гостиничный комплекс".
8. Суроғаи ҳуқуқии Маҷмӯи меҳмонхонаҳо: Ҷумҳурии Тоҷикистон, шаҳри Душанбе, хиёбони Рӯдакӣ, 122.
2. МАҚОМИ ҲУҚУҚИИ МАҶМӯИ МЕҲМОНХОНАҲО
9. Маҷмӯи меҳмонхонаҳо шахси ҳуқуқӣ буда, дорои молу мулк, тавозуни мустақил, ҳисобномаҳои бонкӣ, аз ҷумла ҳисобномаҳои асъорӣ, муҳр, штамп, бланкҳои фирмавӣ ва нишони молӣ мебошад, аз суратҳисоби ягонаи Сарраёсати хазинадории марказии Вазорати молияи Ҷумҳурии Тоҷикистон маблағгузорӣ карда мешавад. Маблағгузории хароҷоти Маҷмӯи меҳмонхонаҳо аз ҳисоби маблағҳои дар буҷети ҷумҳуриявӣ пешбинигардида, инчунин аз ҳисоби маблағҳои махсус тибқи тартиби бо Вазорати молияи Ҷумҳурии Тоҷикистон мувофиқагардида анҷом дода мешавад.
10. Маҷмӯи меҳмонхонаҳо тибқи қонунгузории Ҷумҳурии Тоҷикистон ҳуқуқи бо фаъолияти даромаднок машғул шудан ва анҷом додани хизматрасонии пулакиро дорад. Маҷмӯи меҳмонхонаҳо даромад ва молу мулки ба даст овардаашро тибқи тартиби муқарраргардида соҳибӣ, истифода ва ихтиёрдорӣ менамояд.
11. Маҷмӯи меҳмонхонаҳо дар мувофиқа бо Роҳбари Дастгоҳи иҷроияи Президенти Ҷумҳурии Тоҷикистон дар асоси шартномаҳои тиҷоратӣ бо тартиби муқарраргардида ҳуқуқи истифодабарии қарзҳои бонкиро дорад.
12. Маҷмӯи меҳмонхонаҳо дар мувофиқа бо Муассис ҳуқуқ дорад филиал таъсис диҳад, аз ҷумла намояндагиҳо дар хориҷа кушояд, бо тартиби муқаррарнамудаи қонунгузории Ҷумҳурии Тоҷикистон муассиси дигар ташкилотҳо бошад.
13. Маҷмӯи меҳмонхонаҳо аз рӯйи уҳдадориҳои худ барои воситаҳои асосие, ки дар ихтиёри худ дорад, ҷавобгар мебошад.
3. МАҚСАД ВА САМТҲОИ ФАЪОЛИЯТИ МАҶМӯИ МЕҲМОНХОНАҲО
14. Мақсади асосии фаъолияти Маҷмӯи меҳмонхонаҳо аз ташкили қабул, ҷойгиркунӣ ва хизматрасонии шахсони расмӣ ва ҳайатҳо, меҳмонон, дигар шаҳрвандони хориҷӣ иборат мебошад, ки бо даъвати Президенти Ҷумҳурии Тоҷикистон, Ҳукумати Ҷумҳурии Тоҷикистон ва дигар мақомоти давлатӣ ба Ҷумҳурии Тоҷикистон ташриф овардаанд.
15. Маҷмӯи меҳмонхонаҳо намудҳои зерини фаъолиятро ба амал мебарорад:
- таъмини хизматрасонии мизоҷон дар сатҳи ҷавобгӯй ба стандартҳои байналмилалӣ;
- хизматрасонии маишӣ, таъмин намудани ҷойи истироҳати меҳмонон бо таҷҳизоти зарурӣ ва технологияҳои муосир.
16. Маҷмӯи меҳмонхонаҳо дар доираи мақсад ва вазифаҳои пешбининамудаи Оинномаи мазкур мувофиқи қонунгузории Ҷумҳурии Тоҷикистон ҳуқуқ дорад фаъолияти иқтисодии хориҷиро амалӣ намояд ва вобаста ба он метавонад:
- ҳамкориро бо ташкилотҳои мамлакатҳои хориҷӣ оид ба масъалаҳои хоҷагидорӣ ва хизматрасонии меҳмонхонавӣ анҷом диҳад;
- дар мувофиқа бо Муассис филиалҳои (намояндагиҳои) худро дар хориҷи Тоҷикистон таъсис диҳад;
- дар кори фестивалҳо, конференсияҳо, симпозиумҳо, намоишгоҳҳои махсусгардонидашудаи байналмилалӣ ва ғайра иштирок намояд.
17. Маҷмӯи меҳмонхонаҳо дорои дигар ҳуқуқҳое мебошад, ки қонунгузории Ҷумҳурии Тоҷикистон барои муассисаҳо муайян кардааст.
4. МАҚОМОТИ ИДОРАКУНИИ МАҶМӯИ МЕҲМОНХОНАҲО
18. Идоракунии Маҷмӯи меҳмонхонаҳо ба воситаи мақоми идоракунии он амалӣ карда мешавад. Маҷмӯи меҳмонхонаҳо мақомоти идоракунии зерин дорад:
- мақоми идоракунии Маҷмӯи меҳмонхонаҳо - Дастгоҳи иҷроияи Президенти Ҷумҳурии Тоҷикистон дар шахсияти Роҳбари Дастгоҳи иҷроияи Президенти Ҷумҳурии Тоҷикистон;
- мақоми иҷроияи Маҷмӯи меҳмонхонаҳо - маъмурият бо роҳбарии Директори генералии Маҷмӯи меҳмонхонаҳо.
19. Мақоми идоракунӣ дорои воколатҳои зерин мебошад:
- самтҳои асосии фаъолияти Маҷмӯи меҳмонхонаҳоро муайян менамояд;
- сохтори Маҷмӯи меҳмонхонаҳоро тасдиқ менамояд;
- бо пешниҳоди Директори генералӣ муовинон, аз ҷумла муовини якум ва сармуҳосиби Маҷмӯи меҳмонхонаҳоро ба вазифа таъин ва аз вазифа озод менамояд;
- фаъолияти Маҷмӯи меҳмонхонаҳоро назорат карда, бо асноди коргузорӣ, ҳисоботӣ ва ҳуҷҷатҳои дигар шинос мешавад;
- тавозуни муҳосибавии Маҷмӯи меҳмонхонаҳоро тасдиқ намуда, ҳисоботи солонаи хароҷоти молиявии фаъолияти онро назорат мекунад;
- дигар масъалаҳоеро, ки қонунгузории Ҷумҳурии Тоҷикистон ба ваколати мақоми танзимкунандаи фаъолияти ташкилию ҳуқуқии Маҷмӯи меҳмонхонаҳо мансуб донистааст, ҳал менамояд.
20. Директори генералӣ ба фаъолияти ҷории Маҷмӯи меҳмонхонаҳо роҳбарӣ мекунад, ки бо пешниҳоди Роҳбари Дастгоҳи иҷроияи Президенти Ҷумҳурии Тоҷикистон аз ҷониби Президенти Ҷумҳурии Тоҷикистон ба вазифа таъин ва аз вазифа озод карда мешавад.
21. Директори генералии Маҷмӯи меҳмонхонаҳо дорои ваколатҳои зерин мебошад:
- бе ваколатнома амал карда, роҳбарии фаъолияти Маҷмӯи меҳмонхонаҳоро таъмин месозад;
- қарорҳои Муассисро иҷро мекунад;
- ба молу мулки Маҷмӯи меҳмонхонаҳо, ки Дастгоҳи иҷроияи Президенти Ҷумҳурии Тоҷикистон муқаррар намудааст, тибқи тартиби муқарраргардида ихтиёрдорӣ менамояд;
- тибқи тартиби муқарраргардида Маҷмӯи меҳмонхонаҳоро дар тамоми муассисаҳо ва ташкилотҳо дар ҳудуди Ҷумҳурии Тоҷикистон ва дар хориҷа намояндагӣ мекунад;
- ҳисоботи солона, тавозунҳои муҳосибавӣ, ҳисоби даромаду зарари Маҷмӯи меҳмонхонаҳоро ба Дастгоҳи иҷроияи Президенти Ҷумҳурии Тоҷикистон пешниҳод месозад;
- дар хусуси ба вазифа таъин ва аз вазифа озод намудани муовини аввал, муовини Директори генералӣ ва сармуҳосиби Маҷмӯи меҳмонхонаҳо ба Роҳбари Дастгоҳи иҷроияи Президенти Ҷумҳурии Тоҷикистон таклиф пешниҳод менамояд;
- роҳбарони ташкилотҳо ва муассисаҳои тобеъро дар мувофиқа бо Роҳбари Дастгоҳи иҷроияи Президенти Ҷумҳурии Тоҷикистон ба вазифа таъин ва аз вазифа озод мекунад;
- кормандони Маҷмӯи мехмонхонаҳоро ба истиснои муовини аввал, муовини Директори генералӣ ва сармуҳосиб ба кор қабул ва аз кор озод менамояд, нисбат ба онҳо чораҳои хавасмандкунӣ ва интизомӣ меандешад;
- оиннома ва низомномаҳои ташкилотҳои тобеъ ва филиалҳоро (намояндагиҳоро) дар мувофиқа бо Роҳбари Дастгоҳи иҷроияи Президенти Ҷумҳурии Тоҷикистон тасдиқ мекунад;
- дорои дигар ҳуқуқҳое мебошад, ки ба қонунгузории Ҷумҳурии Тоҷикистон ва мақсадҳои оинномавии Маҷмӯи меҳмонхонаҳо мухолифат намекунанд.
22. Дар сурати ҳозир набудани Директор иҷрои вазифаҳои ӯ муваққатан ба зиммаи муовини якум ва ё муовин вогузор мегардад.
23. Назорати молиявию хоҷагии фаъолияти Маҷмӯи меҳмонхонаҳо тибқи қонунгузории Ҷумҳурии Тоҷикистон амалӣ карда мешавад.
24. Муовини якум ва муовини Директори генералӣ:
- дар таҳияи барномаҳо, консепсияҳо, дурнамоҳо ва стратегияҳои рушди соҳаи Маҷмӯи меҳмонхонаҳо дар Ҷумҳурии Тоҷикистон ва самтҳои рушди Маҷмӯи меҳмонхонаҳо иштирок менамоянд;
- Маҷмӯи меҳмонхонаҳоро дар назди мақомоти давлатӣ, инчунин ташкилотҳои байналмилалӣ ва ҷамъиятӣ намояндагӣ мекунанд;
- дар ҳалли масъалаҳои вобаста ба такмили фаъолияти Маҷмӯи меҳмонхонаҳо ва ташкилию идории Маҷмӯи меҳмонхонаҳо иштирок менамоянд;
- дар муҳокимаи масъалаҳои истеҳсолӣ, хоҷагидорӣ ва иҷтимоӣ ширкат меварзанд;
- ба ғайр аз иҷрои вазифаҳои мустақими худ, инчунин дар мувофиқа бо Директори генералии Маҷмӯи меҳмонхонаҳо вазифаҳои дигари иловагиро иҷро менамоянд.
5. МОЛУ МУЛК ВА ВОСИТАҲОИ МАҶМӯИ МЕҲМОНХОНАҲО
25. Молу мулки Маҷмӯи меҳмонхонаҳо аз фондҳои асосӣ ва воситаҳои гардон, инчунин арзишҳои дигар, ки нархи он дар тавозуни Маҷмӯи меҳмонхонаҳо нишон дода шудааст, иборат мебошад. Молу мулки Маҷмӯи меҳмонхонаҳо моликияти давлатӣ буда, ба Маҷмӯи меҳмонхонаҳо бо ҳуқуқи идораи оперативӣ тааллуқ дорад. Маҷмӯи меҳмонхонаҳо ҳуқуқ дорад молу мулки дар ихтиёраш доштаашро дар доираи муайяннамудаи қонунгузорӣ ҳуқуқи ихтиёрдорӣ намояд.
26. Манбаъҳои ташкил ёфтани молу мулки Маҷмӯи меҳмонхонаҳо:
- молу мулке, ки Муассис бо ҳуқуқи идораи оперативӣ вобаста намудааст;
- пардохти пулӣ ва моддии Муассис;
- даромадҳое, ки аз фаъолияти Маҷмӯи меҳмонхонаҳо ба даст омадаанд;
- қарзи бонкҳо ва дигар манбаъҳои маблағгузорӣ;
- пардохтҳои бебозгашт ва хайрияи шахсони воқеӣ ва ҳуқуқӣ;
- дигар сарчашмаҳое, ки қонунгузории Ҷумҳурии Тоҷикистон манъ накардааст.
27. Маҷмӯи меҳмонхонаҳо дар назди мақомоти давлатӣ мустақилона аз ҷумла доир ба супоридани андозҳо, омор ва ғайра ҳисобот медиҳад.
28. Маҷмӯи меҳмонхонаҳо воситаҳои пулии худро дар ҳисобномаҳои муассисаҳои бонкӣ нигоҳ медорад ва нисбати онҳо ҳама гуна амалиёти бонкиро мутобиқи қонунгузории Ҷумҳурии Тоҷикистон амалӣ менамояд.
6. АЗНАВТАШКИЛДИҲӢ ВА БАРҲАМДИҲИИ МАҶМӯИ МЕҲМОНХОНАҲО
29. Азнавташкилдиҳӣ ва барҳамдиҳии Маҷмӯи меҳмонхонаҳо бо тартиби муқаррарнамудаи қонунгузории Ҷумҳурии Тоҷикистон амалӣ карда мешавад.
