Замимаи 2
ба фармони Президенти
Ҷумҳурии Тоҷикистон
аз 13 сентябри соли 2022, № 454
Оинномаи Муассисаи давлатии "Боғи Парчами миллӣ"-и муассисаи давлатии маҷмааи "Қасри миллат"-и Дастгоҳи иҷроияи Президенти Ҷумҳурии Тоҷикистон
1. МУҚАРРАРОТИ УМУМӢ
1. Муассисаи давлатии "Боғи Парчами миллӣ"-и муассисаи давлатии маҷмааи "Қасри миллат"-и Дастгоҳи иҷроияи Президенти Ҷумҳурии Тоҷикистон (минбаъд - Муассиса) тибқи қонунгузории Ҷумҳурии Тоҷикистон таъсис дода шудааст.
2. Муассиси Муассиса Президенти Ҷумҳурии Тоҷикистон (минбаъд - Муассис) мебошад.
3. Масъалаҳои ташкилию ҳуқуқии Муассиса аз ҷониби Дастгоҳи иҷроияи Президенти Ҷумҳурии Тоҷикистон (минбаъд - Дастгоҳи Президент) ҳал карда мешаванд.
4. Муассиса фаъолияташро мувофиқи Конститутсияи Ҷумҳурии Тоҷикистон, қонунгузории Ҷумҳурии Тоҷикистон, қарорҳои Муассис ва Оинномаи мазкур амалӣ менамояд.
5. Номи расмии Муассиса:
- бо забони тоҷикӣ - Муассисаи давлатии "Боғи Парчами миллӣ"-и муассисаи давлатии маҷмааи "Қасри миллат"-и Дастгоҳи иҷроияи Президенти Ҷумҳурии Тоҷикистон;
- бо забони русӣ - Государственное учреждение "Боги Парчами милли" государственное учреждение комплекс "Дворец нации" Исполнительного аппарата Президента Республики Таджикистан;
- бо забони англисӣ - State institution "Bogi Parchami milli" of state institution residence "Palace of the Nation" of the Executive Office of the President of the Republic of Tajikistan.
6. Суроғаи ҳуқуқии Муассиса: Ҷумҳурии Тоҷикистон, шаҳри Душанбе, кӯчаи Шероз, 20.
7. Муассиса дар тобеияти Муассисаи давлатии маҷмааи "Қасри миллат"-и Дастгоҳи иҷроияи Президенти Ҷумҳурии Тоҷикистон қарор дорад.
2. МАҚОМИ ҲУҚУҚИИ МУАССИСА
8. Муассиса шахси ҳуқуқӣ буда, дорои муҳр бо тасвири Нишони давлатии Ҷумҳурии Тоҷикистон ва сабти номи худ, бланк ва штампҳо бо намунаи муқарраргардида мебошад ва аз суратҳисоби ягонаи Сарраёсати хазинадории марказии Вазорати молияи Ҷумҳурии Тоҷикистон маблағгузорӣ карда мешавад.
9. Маблағгузории хароҷоти Муассиса аз ҳисоби маблағҳои дар буҷети ҷумҳуриявӣ пешбинигардида, инчунин аз ҳисоби маблағҳои махсус тибқи тартиби бо Вазорати молияи Ҷумҳурии Тоҷикистон мувофиқагардида анҷом дода мешавад.
10. Муассиса дар мувофиқа бо Дастгоҳи Президент дар асоси шартномаҳои тиҷоратӣ бо тартиби муқарраргардида ҳуқуқи истифодабарии қарзҳои бонкиро дорад.
11. Муассиса дорои дигар ҳуқуқҳое мебошад, ки қонунгузории Ҷумҳурии Тоҷикистон барои муассисаҳо муқаррар кардааст.
3. МАҚСАД ВА САМТҲОИ ФАЪОЛИЯТИ МУАССИСА
12. Мақсади асосии фаъолияти Муассиса нигоҳубин, таъмир намудан ва дар ҳолати хуб нигоҳ доштани "Боғи Парчами миллӣ", қонеъгардонии бештару хубтар дар ташкил намудани шаклҳои гуногуни манзараҳои табиӣ бо истифода аз дарахтону буттаҳои сояафкан, гулҳои ороишӣ, майсазор ва фаввораҳо дар гирду атрофии "Боғи Парчами миллӣ"-и Дастгоҳи иҷроияи Президенти Ҷумҳурии Тоҷикистон мебошад.
13. Барои амалӣ намудани мақсадҳои худ Муассиса фаъолияти зеринро ба амал мебарорад:
- дар ҳолати хуб нигоҳ доштани "Боғи Парчами миллӣ";
- таъмини фароғати фарҳангии шаҳрвандони ба боғ ҳозиршаванда;
- ташкил намудани чорабиниҳои фарҳангӣ ва фароғатӣ.
14. Муассиса метавонад тибқи тартиби муқарраргардида ба хизматрасонии пулакӣ машғул шавад. Даромади бадастовардашуда тибқи тартиби муқарраргардида ба ихтиёри Муассиса мегузарад ва дар суратҳисоби махсус ба ҳисоб гирифта мешавад.
15. Муассиса инчунин дигар намудҳои фаъолиятеро, ки қонунгузории Ҷумҳурии Тоҷикистон манъ накардааст ва ба мақсадҳои оинномавиаш мутобиқат менамояд, амалӣ менамояд.
4. МАҚОМИ ИДОРАКУНИИ МУАССИСА
16. Идоракунии Муассиса ба воситаи мақомоти зерин амалӣ карда мешавад:
- мақоми идоракунии Муассиса - Дастгоҳи иҷроияи Президенти Ҷумҳурии Тоҷикистон дар шахсияти Роҳбари Дастгоҳи иҷроияи Президенти Ҷумҳурии Тоҷикистон;
- мақоми иҷроияи Муассиса - маъмурият бо роҳбарии директори Муассиса.
17. Мақоми идоракунии давлатии Муассиса дорои ваколатҳои зерин мебошад:
- самтҳои асосии фаъолияти Муассисаро муайян менамояд;
- шумораи ниҳоии кормандони Муассисаро тасдиқ менамояд;
- фаъолияти Муассисаро назорат карда, бо асноди коргузорӣ, ҳисоботӣ ва ҳуҷҷатҳои дигар шинос мешавад;
- тавозуни муҳосибавии Муассисаро тасдиқ намуда, ҳисоботи солонаи хароҷоти молиявии фаъолияти онро назорат мекунад;
- дигар масъалаҳоеро, ки қонунгузории Ҷумҳурии Тоҷикистон ба ваколати мақоми идоракунии Муассиса мансуб донистааст, ҳал менамояд.
18. Директор ҳамчун мақоми иҷроияи Муассиса ба фаъолияти ҷории Муассиса роҳбарӣ мекунад. Директори Муассиса аз тарафи Президенти Ҷумҳурии Тоҷикистон бо пешниҳоди Роҳбари Дастгоҳи Президент ба вазифа таъин ва аз вазифа озод карда мешавад. Директори Муассиса муовин ва сармуҳосиб дорад, ки бо пешниҳоди директори Муассиса аз ҷониби Роҳбари Дастгоҳи Президент ба вазифа таъин ва аз вазифа озод карда мешаванд.
19. Директор дорои ваколатҳои зерин мебошад:
- бе ваколатнома аз номи Муассиса амал карда, роҳбарии фаъолияти Муассисаро таъмин мекунад;
- амру супоришҳои Президенти Ҷумҳурии Тоҷикистон ва Роҳбари Дастгоҳи Президентро иҷро мекунад;
- молу мулки Муассисаро тибқи тарғиби муқарраргардида ихтиёрдорӣ мекунад;
- тибқи тартиби муқарраргардида Муассисаро дар тамоми муассисаҳо ва ташкилотҳо дар ҳудуди Ҷумҳурии Тоҷикистон ва берун аз он намояндагӣ мекунад;
- ҳисоботи солона, тавозунҳои муҳосибавии Муассисаро ба Роҳбари Дастгоҳи Президент дар муҳлати муқарраршуда пешниҳод мекунад;
- кормандони Муассисаро, ба истиснои муовини директор ва сармуҳосиби Муассиса, тибқи тартиби муқарраргардида ба кор қабул ва аз кор озод менамояд, инчунин нисбат ба онҳо чораҳои ҳавасмандкунӣ ва интизомӣ меандешад;
- дорои дигар ҳукуқҳое мебошад, ки ба қонунгузории Ҷумҳурии Тоҷикистон ва мақсадҳои оинномавии Муассиса мухолифат намекунанд.
20. Назорати фаъолияти молиявию хоҷагидории Муассиса тибқи қонунгузории Ҷумҳурии Тоҷикистон амалӣ карда мешавад.
21. Муовини директори Муассиса дар сурати ҳозир набудани директори Муассиса ваколатҳои ӯро амалӣ менамояд.
5. МОЛУ МУЛК ВА ВОСИТАҲОИ МУАССИСА
22. Молу мулки Муассиса аз фондҳои асосӣ ва воситаҳои гардон, инчунин арзишҳои дигар, ки нархи онҳо дар тавозуни Муассиса нишон дода шудааст, иборат мебошад. Молу мулки Муассиса моликияти давлатӣ буда, ба Муассиса бо ҳуқуқи идораи оперативӣ дода мешавад. Муассиса ба молу мулки дар ихтиёраш гузошташуда мутобиқи мақсади фаъолияти худ дар доираи муайяннамудаи қонунгузорӣ ҳуқуқи ихтиёрдориро дорад.
23. Манбаъҳои ташкил ёфтани молу мулки Муассиса:
- молу мулке, ки Муассис бо ҳукуқи идораи оперативӣ вобаста намудааст;
- пардохти пулӣ ва моддии Муассис;
- даромадҳое, ки аз фаъолияти Муассиса ба даст омадаанд;
- қарзи бонкӣ ва манбаъҳои дигари маблағгузорӣ;
- пардохтҳои бебозгашт ва хайрияи шахсони воқеӣ ва ҳуқуқӣ;
- дигар сарчашмаҳое, ки қонунгузории Ҷумҳурии Тоҷикистон манъ накардааст.
24. Муассиса дар назди мақомоти давлатӣ мустақилона ҳисобот медиҳад, аз ҷумла оид ба супоридаии андозҳо, омор ва ғайра.
6. АЗНАВТАШКИЛДИҲӢ ВА БАРҲАМДИҲИИ МУАССИСА
25. Азнавташкилдиҳӣ ва барҳамдиҳии Муассиса бо тартиби муқаррарнамудаи қонунгузории Ҷумҳурии Тоҷикистон амалӣ карда мешавад.
Замимаи 3
ба фармони Президенти
Ҷумҳурии Тоҷикистон
аз 13 сентябри соли 2022, № 454
Оинномаи Муассисаи давлатии маҷмааи "Кохи Ваҳдат"-и Дастгоҳи иҷроияи Президенти Ҷумҳурии Тоҷикистон
1. МУҚАРРАРОТИ УМУМӢ
1. Муассисаи давлатии маҷмааи "Кохи Ваҳдат"-и Дастгоҳи иҷроияи Президенти Ҷумҳурии Тоҷикистон (минбаъд - Маҷмаа) тибқи қонунгузории Ҷумҳурии Тоҷикистон таъсис дода шудааст.
2. Муассиси Маҷмаа Президенти Ҷумҳурии Тоҷикистон (минбаъд - Муассис) мебошад.
3. Масъалаҳои ташкилию ҳуқуқии Маҷмаа аз ҷониби Дастгоҳи иҷроияи Президенти Ҷумҳурии Тоҷикистон (минбаъд - Дастгоҳи Президент) ҳал карда мешаванд.
4. Маҷмаа фаъолияташро мувофиқи Конститутсияи Ҷумҳурии Тоҷикистон, қонунгузории Ҷумҳурии Тоҷикистон, қарорҳои Муассис ва Оинномаи мазкур амалӣ менамояд.
5. Номи расмии Маҷмаа:
- бо забони тоҷикӣ - Муассисаи давлатии маҷмааи "Кохи Ваҳдат"-и Дастгоҳи иҷроияи Президенти Ҷумҳурии Тоҷикистон;
- бо забони русӣ - Государственное учреждение комплекс "Кохи Вахдат" Исполнительного аппарата Президента Республики Таджикистан;
- бо забони англисӣ - State institution residence "Kokhi Vahdat" of the Executive Office of the President of the Republic of Tajikistan.
6. Суроғаи ҳуқуқии Маҷмаа: Ҷумҳурии Тоҷикистон, шаҳри Душанбе, хиёбони Рӯдакӣ, бинои 107/1.
2. МАҚОМИ ҲУҚУҚИИ МАҶМАА
7. Маҷмаа шахси ҳуқуқӣ буда, дорои муҳр бо тасвири Нишони давлатии Ҷумҳурии Тоҷикистон ва сабти номи худ, бланк ва штампҳои намунаи муқарраргардида мебошад ва аз суратҳисоби ягонаи Сарраёсати хазинадории марказии Вазорати молияи Ҷумҳурии Тоҷикистон маблағгузорӣ карда мешавад.
8. Маблағгузории хароҷоти Маҷмаа аз ҳисоби маблағҳои дар буҷети ҷумҳуриявӣ пешбинигардида, инчунин аз ҳисоби маблағҳои махсус тибқи тартиби бо Вазорати молияи Ҷумҳурии Тоҷикистон мувофиқагардида анҷом дода мешавад.
9. Маҷмаа дар мувофиқа бо Дастгоҳи Президент дар асоси шартномаҳои тиҷоратӣ бо тартиби муқарраргардида ҳуқуқи истифодабарии қарзҳои бонкиро дорад.
10. Маҷмаа дорои дигар ҳуқуқҳое мебошад, ки қонунгузории Ҷумҳурии Тоҷикистон барои муассисаҳо муайян кардааст.
3. МАҚСАД ВА САМТҲОИ ФАЪОЛИЯТИ МАҶМАА
11. Мақсади асосии фаъолияти Маҷмаа аз ташкили гузаронидани чорабиниҳо дар сатҳи Президенти Ҷумҳурии Тоҷикистон, Ҳукумати Ҷумҳурии Тоҷикистон, қабул ва хизматрасонии шахсони расмӣ, ҳайатҳо, меҳмонон ва дигар шахсон иборат мебошад.
12. Маҷмаа вазифаҳои зеринро иҷро менамояд:
- ҳамчун маркази ҷамъиятию сиёсӣ ва фарҳангӣ барои ташкил ва гузаронидани чорабиниҳои онҳо шароити зарурӣ муҳайё месозад;
- ҳуҷҷатҳои коргузориро мутобиқи тартиби муқаррарнамудаи қонунгузории Ҷумҳурии Тоҷикистон пеш мебарад;
- дар асоси шартнома толорҳои Маҷмааро бо нархномаи тасдиқнамудаи Дастгоҳи иҷроияи Президент барои истифода медиҳад;
- барои гузаронидани конференсияҳо, мизҳои мудаввар, вохӯрию ҷамъомадҳо, тантанаҳои ҷашнӣ ва консертҳо мусоидат менамояд;
- нигоҳдорӣ, таъмири бино ва таҷҳизоти Маҷмааро таъмин менамояд.
13. Маҷмаа метавонад тибқи тартиби муқарраргардида ба фаъолияти даромаднок машғул шавад. Фоидаи бадастовардашуда тибқи тартиби муқарраргардида ба ихтиёри Маҷмаа мегузарад ва он дар суратҳисоби махсус ба ҳисоб гирифта мешавад.
14. Маҷмаа дигар намудҳои фаъолиятеро, ки қонунгузории Ҷумҳурии Тоҷикистон манъ накардааст ва ба мақсадҳои оинномавиаш мутобиқанд, амалӣ менамояд.
4. МАҚОМОТИ ИДОРАКУНИИ МАҶМАА
15. Идоракунии Маҷмаа ба воситаи мақомоти зерин амалӣ карда мешавад:
- мақоми идоракунии Маҷмаа - Дастгоҳи иҷроияи Президенти Ҷумҳурии Тоҷикистон дар шахсияти Роҳбари Дастгоҳи иҷроияи Президенти Ҷумҳурии Тоҷикистон;
- мақоми иҷроияи Маҷмаа - маъмурият бо роҳбарии директори Маҷмаа.
16. Мақоми идоракунии Маҷмаа дорои ваколатҳои зерин мебошад:
- самтҳои асосии фаъолияти Маҷмааро муайян менамояд;
- шумораи ниҳоии кормандони Маҷмааро тасдиқ менамояд;
- фаъолияти Маҷмааро назорат карда, бо асноди коргузорӣ, ҳисоботӣ ва ҳуҷҷатҳои дигар шинос мешавад;
- тавозуни муҳосибавии Маҷмааро тасдиқ намуда, ҳисоботи солонаи хароҷоти молиявии фаъолияти онро назорат мекунад;
- дигар масъалаҳоеро, ки қонунгузории Ҷумҳурии Тоҷикистон ба ваколати мақоми идоракунии Маҷмаа мансуб донистааст, ҳал менамояд.
17. Мақоми иҷроияи Маҷмаа - директор ба фаъолияти ҷории Маҷмаа роҳбарӣ мекунад. Директори Маҷмаа аз тарафи Президенти Ҷумҳурии Тоҷикистон бо пешниҳоди Роҳбари Дастгоҳи Президент ба вазифа таъин ва аз вазифа озод карда мешавад. Директори Маҷмаа муовин ва сармуҳосиб дорад, ки бо пешниҳоди директори Маҷмаа аз ҷониби Роҳбари Дастгоҳи Президент ба вазифа таъин ва аз вазифа озод карда мешаванд.
18. Директор дорои ваколатҳои зерин мебошад:
- бе ваколатнома аз номи Маҷмаа амал мекунад, роҳбарии фаъолияти Маҷмааро таъмин мекунад;
- амру супоришҳои Президенти Ҷумҳурии Тоҷикистон ва Роҳбари Дастгоҳи Президентро иҷро мекунад;
- молу мулки Маҷмааро тибқи тартиби муқарраргардида ихтиёрдорӣ мекунад;
- тибқи тартиби муқарраргардида Маҷмааро дар тамоми муассисаҳо ва ташкилотҳо дар ҳудуди Ҷумҳурии Тоҷикистон ва берун аз он намояндагӣ мекунад;
- ҳисоботи солона, тавозунҳои муҳосибавии Маҷмааро ба Роҳбари Дастгоҳи Президент дар муҳлатҳои муқарраршуда пешниҳод мекунад;
- кормандони Маҷмааро, ба истиснои муовини директор ва сармуҳосиби Маҷмаа, тибқи тартиби муқарраргардида ба кор қабул ва аз кор озод менамояд, инчунин нисбат ба онҳо чораҳои ҳавасмандкунӣ ва интизомӣ меандешад;
- дорои дигар ҳуқуқҳое мебошад, ки ба қонунгузории Ҷумҳурии Тоҷикистон ва мақсадҳои оинномавии Маҷмаа мухолифат намекунанд.
19. Назорати фаъолияти молиявию хоҷагидории Маҷмаа тибқи қонунгузории Ҷумҳурии Тоҷикистон амалӣ карда мешавад.
20. Муовини директори Маҷмаа дар сурати ҳозир набудани директори Маҷмаа ваколатҳои ӯро амалӣ менамояд.
5. МОЛУ МУЛК ВА ВОСИТАҲОИ МАҶМАА
21. Молу мулки Маҷмаа аз фондҳои асосӣ ва воситаҳои гардон, инчунин арзишҳои дигар, ки нархи онҳо дар тавозуни Маҷмаа нишон дода шудааст, иборат мебошад. Молу мулки Маҷмаа моликияти давлатӣ буда, ба Маҷмаа бо ҳуқуқи идораи оперативӣ тааллуқ дорад. Маҷмаа ба молу мулки дар ихтиёраш гузошташуда мутобиқи мақсади фаъолияти худ дар доираи муайяннамудаи қонунгузорӣ ҳуқуқи ихтиёрдориро дорад.
22. Манбаъҳои ташкил ёфтани молу мулки Маҷмаа:
- молу мулке, ки Муассис бо ҳуқуқи идораи оперативӣ вобаста намудааст;
- пардохтҳои пулӣ ва моддии Муассис;
- даромадҳое, ки аз хизматрасонии Маҷмаа ба даст омадаанд;
- қарзҳои бонкӣ ва намудхои дигари маблағгузорӣ;
- пардохтҳои бебозгашт ва хайрияи шахсони воқеӣ ва ҳуқуқӣ;
- дигар сарчашмаҳое, ки қонунгузории Ҷумҳурии Тоҷикистон манъ накардааст.
23. Маҷмаа дар назди мақомоти давлатӣ мустақилона ҳисобот медиҳад, аз ҷумла оид ба супоридани андозҳо, омор ва ғайра.
24. Маҷмаа воситаҳои пулии худро дар суратҳисоби ташкилотҳои қарзӣ нигоҳ медорад ва нисбати онҳо ҳама гуна амалиёти бонкиро мувофиқи қонунгузорӣ иҷро менамояд.
6. АЗНАВТАШКИЛДИҲӢ ВА БАРҲАМДИҲИИ МАҶМАА
25. Азнавташкилдиҳӣ ва барҳамдиҳии Маҷмаа бо тартиби муқаррарнамудаи қонунгузории Ҷумҳурии Тоҷикистон амалӣ карда мешавад.
