Ҳукумати Ҷумҳурии Тоҷикистон

ҚАРОР

Дар бораи таъсиси корхонаи воҳиди давлатии "Тоҷагропромэкспорт"

Мутобиқи моддаи 125 Кодекси граждании Ҷумҳурии Тоҷикистон, моддаи 5 Қонуни Ҷумҳурии Тоҷикистон "Дар бораи корхонаҳои давлатӣ" ва моддаи 56 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1. Корхонаи воҳиди давлатии "Тоҷагропромэкспорт" таъсис дода шавад.

2. Агентии содироти назди Ҳукумати Ҷумҳурии Тоҷикистон масъалаҳои ташкилию ҳуқуқии корхонаи воҳиди давлатии "Тоҷагропромэкспорт"-ро тибқи қонунгузории Ҷумҳурии Тоҷикистон ҳал намояд.

3. Агентии содироти назди Ҳукумати Ҷумҳурии Тоҷикистон якҷо бо Кумитаи давлатии сармоягузорӣ ва идораи амволи давлатии Ҷумҳурии Тоҷикистон корхонаи воҳиди давлатии "Тоҷагропромэкспорт"-ро бо бино таъмин намояд.

4. Агентии содироти назди Ҳукумати Ҷумҳурии Тоҷикистон дар мувофиқа бо Вазорати молияи Ҷумҳурии Тоҷикистон маблағгузории фаъолияти корхонаи воҳиди давлатии "Тоҷагропромэкспорт"-ро оид ба харид, захира, нигоҳдорӣ, борпечонӣ ва содироти маҳсулоти рақобатпазир ба хориҷи кишвар аз ҳисоби маблағҳои буҷетӣ ва ғайрибуҷетӣ ҳал намояд.

5. Ба қарори Ҳукумати Ҷумҳурии Тоҷикистон аз 6 августи соли 2018, №396 "Дар бораи Агентии содироти назди Ҳукумати Ҷумҳурии Тоҷикистон" тағйиру иловаи зерин ворид карда шаванд:

- банди 2 дар таҳрири нав ифода карда шавад:

"2. Низомнома, сохтори дастгоҳи марказӣ, нақшаи идоракунӣ ва номгӯи ташкилотҳои системаи Агентии содироти назди Ҳукумати Ҷумҳурии Тоҷикистон тасдиқ карда шаванд (замимаҳои 1,2,3 ва 4).";

 - замимаи 4 илова карда шавад (замима мегардад).