Низомномаи стипендияҳои Президенти Ҷумҳурии Тоҷикистон барои хонандагону донишҷӯёни муассисаҳои таҳсилоти умумӣ, ибтидоӣ ва миёнаи касбӣ

1. Низомномаи стипендияҳои Президенти Ҷумҳурии Тоҷикистон барои хонандагону донишҷӯёни муассисаҳои таҳсилоти умумӣ, ибтидоӣ ва миёнаи касбӣ (минбаъд - низомнома) бо мақсади дастгирӣ ва ҳавасманд намудани хонандагон ва донишҷӯёне, ки рафтори намунавӣ ва хониши аъло доранд ва дар корҳои ҷамъиятӣ фаъолона иштирок мекунанд, таҳия гардида, талабот, тартиби сарфароз гардонидан ва маҳрум кардани хонандагону донишҷӯёни муассисаҳои таҳсилоти умумӣ, ибтидоӣ ва миёнаи касбиро аз стипендияҳои Президенти Ҷумҳурии Тоҷикистон (минбаъдстипендияҳо) муқаррар менамояд (қарори Ҳукумати ҶТ аз 28.05.2018 № 252).

2. Стипендияҳо аз ҷониби мақоми ваколатдори давлатии кор бо ҷавонон сарфароз гардонида мешаванд (қарори Ҳукумати ҶТ аз 24.07.2020 № 416).

3. Довталабони стипендия хонандагону донишҷӯёни муассисаҳои таҳсилоти умумӣ, ибтидоӣ ва миёнаи касбӣ, ки ба нишондиҳандаҳои зерин мутобиқат менамоянд, буда метавонанд (қарори Ҳукумати ҶТ аз 24.07.2020 № 416):

- рафтори намунавӣ ва эҳтироми хосса дар байни ҳамсинфон (ҳамкурсон) дар ду соли охир, бо дарназардошти тавсияи хаттӣ (аз ҷониби роҳбари гурӯҳ ва директори муассисаи таълимӣ) (қарори Ҳукумати ҶТ аз 28.05.2018 № 252);

- хониши аъло, ки бояд мувофиқи маълумотномаи хаттӣ оид ба ҷамъбасти баҳоҳо дар ду соли охир аз ҷониби директори муассисаи таҳсилоти умумӣ ва як соли охир аз ҷониби директори муассисаи таҳсилоти ибтидоӣ ва миёнаи касбӣ тасдиқ шуда бошад (қарори Ҳукумати ҶТ аз 28.05.2018 № 252);

- иштирок дар корҳои ҷамъиятӣ, ки он тибқи тартиби муқарраргардида аз ҷониби мақомоти маҳаллии кор бо ҷавонон муайян карда мешавад.

4. Стипендияҳо дар асоси озмун аз ҷониби мақоми ваколатдори давлатии кор бо ҷавонон ҳар сол барои як соли таҳсил (аз 1 сентябр то 1 июн) таъин карда мешаванд (қарори Ҳукумати ҶТ аз 24.07.2020 № 416).

5. Стипендияҳо барои 2950 (ду ҳазору нуҳсаду панҷоҳ) хонандагони муассисаҳои таҳсилоти умумӣ, 25 (бисту панҷ) донишҷӯёни муассисаҳои таҳсилоти ибтидоии касбӣ ва 25 (бисту панҷ) донишҷӯёни муассисаҳои таҳсилоти миёнаи касбӣ муқаррар карда мешаванд (қарори Ҳукумати ҶТ аз 28.05.2018 № 252, аз 24.07.2020 № 416).

6. Мақоми ваколатдори давлатии кор бо ҷавонон квотаҳои стипендияро дар шаҳру ноҳияҳо бо дарназардошти миқдори хонандагону донишҷӯёни муассисаҳои таҳсилоти умумӣ, ибтидоӣ ва миёнаи касбӣ муайян менамояд (қарори Ҳукумати ҶТ аз 24.07.2020 № 416).

7. Бо мақсади ташкили кор барои ба таври озмун интихоб намудани номзадҳо ҷиҳати гирифтани стипендия назди мақомоти маҳаллии кор бо ҷавонон (вилоятҳо, шаҳру ноҳияҳо) комиссияҳо аз ҳисоби кормандони мақомоти кор бо ҷавонон, маориф ва илм, фарҳанг, меҳнат, муҳоҷират ва шуғли аҳолӣ таъсис дода мешаванд (қарори Ҳукумати ҶТ аз 24.07.2020 № 416).

8. Комиссияҳои шаҳрию ноҳиявӣ (ба истиснои шаҳри Душанбе) номзадҳоро дар асоси пешниҳоди шӯроҳои педагогии муассисаҳои таълимӣ ва банди 3 Низомномаи мазкур интихоб намуда, комиссияҳои вилоятӣ ва шаҳри Душанбе мутобиқати натиҷаҳои озмунро бо талаботи гузаронидани озмун, ки тибқи ҳамин Низомнома ва дигар санадҳои меъёрии ҳуқуқӣ муайян шудааст, баҳогузорӣ намуда, протокол тартиб медиҳанд. Маводи мазкурро барои тасдиқ ба Комиссияи назди мақоми ваколатдори давлатии кор бо ҷавонон пешниҳод менамоянд. Дар сурати номутобиқатии натиҷаҳои озмун ба талаботи мавҷуда, мавод барои гузаронидани озмуни иловагӣ ба комиссияҳои шаҳрию ноҳиявӣ баргардонида мешавад. Озмуни иловагӣ дар давоми даҳ рӯз гузаронида мешавад (қарори Ҳукумати ҶТ аз 28.05.2018 № 252).

9. Низомномаи Комиссияро мақоми ваколатдори давлатии кор бо ҷавонон таҳия ва тасдиқ менамояд.

10. Комиссияҳои шаҳрию ноҳиявӣ доир ба натиҷаҳои кори худ ҳар сол то 10 август ҳуҷҷатҳои заруриро барои мувофиқа ба комиссияҳои вилоятӣ, шаҳри Душанбе пешниҳод менамоянд. Комиссияҳои вилоятӣ, шаҳри Душанбе то 20 август барои тасдиқ ба мақоми ваколатдори давлатии кор бо ҷавонон хуҷҷатҳои заруриро пешниҳод менамоянд (қарори Ҳукумати ҶТ аз 28.05.2018 № 252).

Бо мақсади таҳлилу омӯзиши мутобиқати ҳуҷҷатҳои пешниҳоднамудаи комиссияҳои вилоятӣ, шаҳрию ноҳиявӣ ва омода кардани онҳо барои тасдиқ дар назди мақоми ваколатдори давлатии кор бо ҷавонон Комиссияи ҷумҳуриявӣ оид ба стипендияҳо таъсис дода мешавад (қарори Ҳукумати ҶТ аз 28.05.2018 № 252, аз 24.07.2020 № 416).

Дар ҳолати риоя накардани талаботи низомномаи мазкур, дар муҳлати муқарраршуда пешниҳод нагардидани ҳуҷҷатҳои довталабон ба стипендия аз шаҳру ноҳияҳо, мақоми ваколатдори давлатии кор бо ҷавонон ҳуқуқ дорад квотаҳои стипендияи ба ин шаҳру ноҳияҳо пешбинишударо ба довталабони шаҳру ноҳияҳои дигар дар асоси гузаронидани озмуни иловагӣ ва қарори комиссияи босалоҳият пешниҳод намояд (қарори Ҳукумати ҶТ аз 28.05.2018 № 252, аз 24.07.2020 № 416).

11. Мақоми ваколатдори давлатии кор бо ҷавонон дар асоси санаду ҳуҷҷатҳое, ки аз ҷониби комиссияҳо пешниҳод мегарданд, инчунин мутобиқи протоколи Комиссияи назди мақоми ваколатдори давлатии кор бо ҷавонон ва қарори Ҳайати мушовараи мақоми ваколатдори давлатии кор бо ҷавонон ҳар сол то 1 сентябр рӯйхати гирандагони стипендияро барои як соли таҳсил тасдиқ мекунад (қарори Ҳукумати ҶТ аз 28.05.2018 № 252, аз 24.07.2020 № 416).

12. Пардохти стипендия ҳар моҳ бо дарназардошти фаъолияти ҷамъиятии гирандаи стипендия мутобиқи шартномаи дахлдори байни мақоми ваколатдори давлатии кор бо ҷавонон ва гирандаи стипендия аз ҷониби мақоми ваколатдори давлатии кор бо ҷавонон тибқи тартиби муқарраргардида ба анҷом расонида мешавад. Дар сурати аз ҷониби гирандаи стипендия вайрон кардани талаботи шартнома, пардохти стипендия метавонад қатъ карда шавад. Тартиб ва талаботи шартнома аз ҷониби мақоми ваколатдори давлатии кор бо ҷавонон муайян карда мешавад (қарори Ҳукумати ҶТ аз 24.07.2020 № 416).

13. Аз стипендия маҳрум кардани шахс дар ҳолати иҷро нагардидани талаботи банди 3 Низомномаи мазкур, инчунин вайрон кардани талаботи шартнома дар асоси пешниҳоди мувофиқашудаи комиссияҳои маҳаллӣ ва тибқи қарори Ҳайати мушовараи мақоми ваколатдори давлатии кор бо ҷавонон сурат мегирад. Рӯзи аз стипендия маҳрум кардани шахс аз рӯзи ба имзо расидани қарори дахлдори Ҳайати мушовара ба ҳисоб гирифта шуда, пардохти маблағи стипендия қатъ карда мешавад ва дар мӯҳлати то 10 рӯз тибқи тартиби пешбининамудаи банди 8 Низомномаи мазкур озмуни иловагӣ ташкил гардида, номзади муносиб аз ҷониби комиссияҳои маҳаллӣ интихоб ва барои тасдиқ ба мақоми ваколатдори давлатии кор бо ҷавонон пешниҳод мегардад (қарори Ҳукумати ҶТ аз 24.07.2020 № 416).

14. Ба гирандаи стипендия, ки тариқи озмуни иловагӣ тибқи тартиби Низомномаи мазкур ғолиб дониста шудааст, аз рӯзи имзои қарори дахлдори Ҳайати мушовараи мақоми ваколатдори давлатии кор бо ҷавонон маблағи стипендия пардохт карда мешавад (қарори Ҳукумати ҶТ аз 24.07.2020 № 416).

15. Комиссияи назди мақоми ваколатдори давлатии кор бо ҷавонон рӯйхати гирандагони стипендияҳоро барои маълумот ба мақоми ваколатдори давлатӣ дар соҳаи маориф пешниҳод менамояд (қарори Ҳукумати ҶТ аз 28.05.2018 № 252, аз 24.07.2020 № 416).